Já nú hefst fjörið. Riðlakeppni Meistaradeildar Evrópu hefst á morgun og byrja okkar menn að heimsækja Marseille. Það er ekki langt síðan við spiluðum þar síðast, og meira að segja var pistlahöfundur einmitt staddur á þeim leik. Frábær leikur þá og frábær úrslit. Það er hreinlega alltaf sérstakt andrúmsloft í gangi þegar þessi Meistaradeildarkvöld renna upp. Það er sérstök stemmning í Liverpool borg, en það er líka sérstök stemmning á öldurhúsum Íslands. Fyrir mér eru þessi kvöld þau bestu í boltanum og er maður með fiðring í maganum allann daginn í vinnunni.

Það er ekki ennþá farið af manni brosið eftir leikinn á laugardaginn og enn mikið talað um hann. Ég fékk þá tilfinningu strax eftir þann leik að ég vildi bara fá næsta leik sama kvöld, ég var svo spenntur og ánægður. Líklega hefðu leikmenn ekki verið sammála mér í því, væntanlega þreyttir eftir átökin, en ég er engu að síður viss um að á meðan þeir eru í svona stuði þá vilja þeir að leikirnir komi á færibandi og vilja byggja upp „momentum“.

Marseilli liðið var svona fyrirfram að mínum dómi, slakasta lið riðilsins. Ekki misskilja mig, þeir sýndu það á síðasta tímabili að þeir geta svo sannarlega bitið frá sér og það má alls ekki vanmeta þá. En engu að síður að þá er þetta útivöllur sem ég vil fá 3 stig frá. Nú er enginn Djibril Cissé hjá þeim, en hann setti nú svo sem ekki mikið mark sitt á leiki liðanna á síðasta tímabili. Bolo Zenden er reyndar ennþá þarna, og þrátt fyrir allt og allt þá er hann ágætis knattspyrnumaður. Þetta lið getur alveg strítt hvaða liði sem er á góðum degi. Við þurfum bara að passa að morgundagurinn verði ekki góður dagur hjá þeim.

Mér fannst allt annað að sjá okkar menn í síðasta leik. Mun meira flæði í leik liðsins og menn að bjóða sig og hlaupa í svæði, mun meira en í leikjunum á undan. Það er mikið talað um að Man.Utd hafi hreinlega verið að leika illa, en reyndin er engu að síður sú að þú kemur ekkert inn í leiki með hangandi haus og hvað þá svona stóra leiki. Enda sýndu þeir fyrstu 10-15 mínúturnar að þeir voru sko klárir í slaginn. Því segi ég það að við létum þá líta illa út því við fórum og lokuðum á spil þeirra og leyfðum þeim ekki að ná upp sínu spili. Þetta fannst mér vera grundvallar breyting hjá okkur og vonast ég til þess að sjá áframhald á þessu á morgun. Sjálfstraust skiptir gríðarlegu máli í fótbolta, og mér fannst okkar menn geisla af því eftir því sem á leið leikinn á laugardaginn.

Eitt sem mér finnst þó standa upp úr, við eigum Gerrard og Torres algjörlega inni. Þeir hafa hvorugir sett virkilegt mark sitt á þetta tímabil og einmitt vegna þessa er ég bara tiltölulega bjartsýnn á liðið okkar. Auðvitað eru engir titlar unnir í september, en mér finnst liðið vera hreinlega heilsteyptara en oft áður. Ég er viss um að Rafa mun fara hægt í sakirnar með þá félaga og ég hreinlega býst við að sjá þá báða á bekknum í næsta leik líka. Fréttir herma að Mascherano sé líka tæpur á meiðslum og gæti vel verið að Lucas fengi sénsinn á móti Marseille. Ég hef hreinlega ekki heyrt af frekari meiðslum hjá okkur og því ætla ég að skjóta á þetta lið með fyrirvara með það (Breytt útfrá nýjum meiðslafréttum):

Bekkur: Cavalieri, Degen, Agger, Mascherano, Babel, Gerrard og Torres.

Við getum alveg unnið með þetta lið og Lucas þarf að fá leiki til að þróast sem fótboltamaður. Ég treysti honum fullkomlega í verkið og Javier veitir hreinlega ekki af hvíldinni og að jafna sig alveg af þessum meiðslum. Það vilja margir fá Babel inn í byrjunarliðið og það getur alveg verið að Rafa taki Yossi út fyrir hann. Ég held þó ekki þar sem reynsla þess síðarnefnda kemur að góðum notum. Ég ætla að spá því að við vinnum 1-2 baráttusigur og loksins, loksins, loksins skorar Robbie fyrir okkur. Hitt markið verður svo skorað af Kuyt, enda vanur því þegar kemur að Meistaradeildinni.