Search

Menu
Search

Latest stories

  • Stelpurnar mæta Palace

    2 Comments

    Það er búið að vera landsleikjahlé hjá stelpunum, en í dag snúa þær aftur og heimsækja Crystal Palace – botnliðið – kl. 14:00.

    Stóru fréttirnar í kringum félagið eru þær að klúbburinn ákvað loksins að tími Matt Beard hjá félaginu væri liðinn, og hann var látinn fara frá félaginu. Það er því Amber Whiteley sem stýrir liðinu í dag, og þetta er í annað sinn sem hún færir sig tímabundið úr aðstoðarþjálfarastafinu því hún tók líka við þegar Vicky Jepson var látin fara á sínum tíma.

    Það má velta fyrir sér ástæðum uppsagnarinnar, og að sumu leyti má segja að hann hafi kannski fengið ósanngjarna meðferð frá yfirstjórn félagsins. Því vissulega kom hann félaginu aftur upp í efstu deild, og náði þar að auki 4. sæti á síðasta tímabili. En svo hefur gengið snúist við á þessu tímabili, og liðið er núna í neðri helming deildarinnar. Ef leikstíllinn eins og hann var undir Matt hefði verið skemmtilegri þá væri maður líklega brjálaður. En vissulega var það þannig að oft lét liðið undan pressu andstæðinganna með því að spila til baka á markmann sem svo þrumaði boltanum upp völlinn. Vonandi kemur skemmtilegra upplegg í staðinn, hvort sem það kemur með Amber eða með nýjum stjóra sem klúbburinn hlýtur að vera að leita að og er vonandi með einhvern í sigtinu nú þegar.

    Nóg um það. Svona stillir Amber upp liðinu sínu í sínum fyrsta leik:

    Laws

    Fisk – Bonner – Matthews – Hinds

    Höbinger – Kerr – Holland

    Smith – Roman Haug – Kapocs

    Bekkur: Micah, Parry, Clark, Evans, Nagano, Shaw, Bartel, Daniels, Enderby

    Leanne Kiernan meiddist eitthvað með landsliðinu og er því frá í dag, en manni heyrist að hún verði ekki frá lengi. Hannah Silcock er líka frá og lenti víst í einhverju bakslagi í sínum meiðslum. Þá er Jas Matthews komin til baka og fer beint í miðvarðarhlutverkið, en þær Yana Daniels hafa jú verið að spila nánast allar stöður vallarins.

    Ceri Holland er að spila sinn 100. leik fyrir félagið, og gæti hægt og bítandi verið að spila sig inn í þann hóp sem á flesta leiki í efstu deild fyrir félagið. Vonum a.m.k. að þeir verði talsvert fleiri enda er hún ein sú öflugasta í liðinu.

    Það er líka áhugavert að sjá hvaða leikmenn Amber er að velja, t.d. var Matt með Teagan Micah sem sinn aðalmarkvörð, en hún fer á bekkinn og Rachael Laws verður á milli stanganna í dag. Nokkuð ljóst að þetta er staða sem nýr stjóri mun örugglega horfa til þegar kemur að endurnýjun í sumar. Líka áhugavert að það á greinilega að byrja í 433 í dag, en ekki í 352 eins og Matt var langmest að nota.

    Í liði Palace er að finna Annabel Blanchard sem kom úr akademíu Liverpool og var þar á sama tíma og Missy Bo. Katie Stengel er hins vegar ekki á skýrslu, sem er eins gott enda stórhættuleg. Væri alveg til í að hafa hana ennþá innanborðs í leikmannahóp Liverpool.

    Nú svo spilar U21 liðið á sama tíma, við munum sjá nöfn þar eins og Harvey Davies, Nallo, Mabaya, McConnell, Nyoni, Kone-Doherty og Ngumoha í byrjunarliði – og Jay Spearing á bekk. Sá leikur verður sýndur á LFCTV.

    Stelpurnar okkar verða svo sýndar á Youtube eins og venjulega, og eins og áður sagði þá hefst leikurinn kl. 14.

    KOMA SVO!!!!

  • Liverpool 2-0 Newcastle

    26 Comments

    Mörkin

    1-0 Szoboszlai (11.mín)

    2-0 MacAllister (63.mín)

    Hvað gerðist markvert í leiknum?

    Atvik fyrri hálfleiks voru þessi:

    • Salah tekinn niður, eða…allavega dæmt á hann innan teigs. Víti hefði verið eðlilegt, aukaspyrna á hann var út úr korti, ekki skoðað í VAR. Veit einhver í alvöru af hverju?
    • Markið frá Szobo, frábærlega gert.
    • Upphlaup sem sköpuðu ekki endilega markskot eða xG, t.d. sendingar í hæla í tvígang og þannig möguleikar sem ekkert varð úr.
    • Eitt gott færi hjá annars frekar daufu Newcastle liði. Óvenju dauft fyrir þá.

    Atvik seinni hálfleiks:

    • Smá pressa frá Newcastle í fyrsta hluta hálfleiksins.
    • Virkuðu samt ekki mjög ógnandi – kannski er að færast meiri ró yfir varnarleik Liverpool.
    • Markið frá MacAllister gulltryggði eiginlega sigurinn, Newcastle voru eiginlega aldrei nálægt markinu, Allison átti rólegan dag.
    • Fleiri færi hjá okkur, skiptingar, leikurinn fjaraði út.

    Í mínum huga var rosalegur meistarabragur á liðinu. Margir í kringum mig voru stressaðir en mér fannst yfirbragð leiksins aldrei stefna þremur stigum í hættu. Liðið er orðið virkilega sjóað, leikmennirnir eru bara að spila leiki lífs síns margir hverjir. Þessar tvær síðustu frammistöður eru bara ótrúlegar í lok 5 leikja tarnar á 15 dögum eða hvað það er. Þeir virkuðu mjög frískir og léttir á sér sérstaklega í byrjun eftir að hafa hlaupið úr sér lungu, eyru, nýru og taugar á sunnudaginn (Szobo…hóst…Szobo). Og Díaz líka.

    Hvað réði úrslitum?

    Ég held ég sé alltaf búinn að skrifa þetta sem ástæðu síðan ég byrjaði að skrifa skýrslur hérna: gæði leikmanna. Gæði starfsliðsins. Gæðin á matnum í mötuneytinu. Liverpool Football Club er bara á virkilega góðum stað og stendur sig betur en flest önnur félög á flestum sviðum. Það þurfti ekki einu sinni Arne Slot á hliðarlínuna, Johnny Heitinga stýrði þessu eins og hann hefði aldrei gert neitt annað.

    Hverjir stóðu sig vel?

    Lélegastur í dag var Alisson. Bara af því að hann þurfti akkúrat að gera eiginlega ekki neitt. Hinir 10 spiluðu nokkurn veginn óaðfinnanlega. Það má alveg gagnrýna eitt og annað hjá hinum og þessum en liðið er bara eins og frábærasta vél sem klikkar bara ekki. Bestu leikmenn liðsins í dag voru Dominic Szoboszlai og Luis Díaz. Þeir voru frábærir, Szobo er að breytast í eitthvað ofurmenni núna upp á síðkastið. Salah var rólegur en hann átti að fá víti og var með stoðsendingu. Semjiði við hann!

    Hvað hefði mátt betur fara?

    Ekkert. Arsenal gerði jafntefli, forystan er núna 13 stig.

    Umræðan eftir leik

    Þið krossfestið mig þá bara fyrir jinxmeistaragráðuna mína. Titillinn er í augsýn. 13 stig, Arsenal getur mest náð 87 stigum, þeir eru aldrei að fara yfir 80 stig á þessu tímabili. Þeir eru með 1 stig úr síðustu 2 leikjum, 4 stig úr síðustu 3 leikjum og 2 stig að meðaltali í leik frá byrjun tímabils. Og núna eru þeir senterslausir. Ef eitthvað er þá er stigasöfnunin þeirra upp á ca. 2 stig í leik að fara lækkandi. Ef 80 stig duga og við erum með 67, þá dugar að vinna 4 leiki af 10. 6 af þeim eru á heimavelli. Takk fyrir. Þið leiðréttið mig ef þetta er rangt hjá mér. Það þarf klúður sem aldrei hefur sést áður til að klúðra þessum titli. Við erum ekki að fara að gera það.

     

    Hvað er framundan?

    Vikuhlé. Getum andað aðeins. Szobo þarf að fá smá nudd, pott, helst smá sól og hita og kannski sauna. PSG eftir viku, við erum á siglingu og göngum vonandi bara frá PSG í fyrri leiknum. Ef ekki þá eigum við bouncing Anfield í seinni leiknum og mýsnar frá París eru ekki að fara neitt í gegnum þann leik.

    Ég segi eins og Daníel eftir Man City sigurinn: Munið krakkar: þetta er ekkert sjálfsagt. Njóta þess á meðan það er.

  • Liðið og leikþráður

    21 Comments

    Liverpool stillir svona upp:

    Newcastle teflir fram eftirtöldum leikmönnum:

    Nick Pope

    Lewis Hall – Dan Burn – Fabian Schar – Tino Livramento

    Joe Willock – Sandro Tonali – Bruno Guimares

    Anthony Gordon – Callum Wilson – Jacob Murphy

    Fátt sem kemur á óvart og Hannes er með 8/11 rétta.

    YNWA

     

  • Upphitun: Generalprufa á úrslitaleik deildarbikarsins

    14 Comments

    Viðbót: Það er búið að dæma Slot í tveggja leikja bann eftir viðskipti hans við Oliver í Everton leiknum og Hulshoff, aðstoðarmaður Slot, eins leiks bann og mun þetta taka í gildi strax í kvöld og verður því Heitinga á hliðarlínunni hjá okkar mönnum í kvöld. Heitinga verður þá fyrsti þjálfari Liverpool sem hefur spilað eða þjálfað Everton síðan William Barkley, einn af stofendum félagsins, þjálfaði liðið.

    Á morgun mæta Newcastle menn á Anfield og etja kappi við okkar menn en rúmlega tveimur vikum síðar mætast liðin á Wembley í úrslitaleik deildarbikarsins. Fyrri leikur liðanna var æsispennandi og endaði með 3-3 jafntefli eftir að Schar skoraði jöfnunarmark á lokamínútum leiksins eftir mistök frá Kelleher.

    Í gegnum tíðina hafa þessi lið átt nokkra ansi þekkta leiki og tilfinningin sú að Newcastle er alltaf ansi erfiður leikur og því kom mér á óvart að sjá að Newcastle hefur ekki unnið gegn Liverpool frá 2015 þar sem Wijnaldum var meðal markaskorara Newcastle, og þeir hafa ekki unnið á Anfield síðan 1994 þegar þeir unnu 2-0 sigur með mörkum frá Rob Lee og Andy Cole.

    Það mun þó ekki hjálpa okkur á morgun, Newcastle eru að berjast um að komast aftur í Meistaradeildina á næsta ári en eiga í erfiðleikum með að byggja upp stöðugleika. Það sést einmitt vel í síðustu sex leikjum þeirra þar sem þeir hafa unnið þrjá og tapað þrem. Þeir unnu virkilega góðan sigur gegn Nottingham Forest um helgina en voru þó nálægt því að kasta honum frá sér undir lokinn og á undan því steinlágu þeir gegn Manchester City.

    Okkar menn hinsvegar komust í ellefu stiga forustu þegar Arsenal missteig sig um helgina meðan Liverpool vann sannfærandi 2-0 sigur gegn Manchester City og því komnir með nokkra putta á Englandsmeistaratitilinn. Morgundagurinn verður líka áhugaverður þar sem Arsenal spilar erfiðan leik gegn Nottingham Forest og hefst þeirra leikur 45 mínútum á undan okkar og gæti slæmt gengi þeirra þar gefið okkur auka kraft inn í þennan leik.

    Býst við að sjá liðið svona á morgun en það verður áhugaverðast að sjá hvað hann gerir á miðsvæðinu. Szoboszlai, MacAllister og Gravenberch hafa allir spilað mikið undanfarið en allir byrjuðu þeir ásamt Jones gegn City og ég geri ráð fyrir að MacAllister fái sér sæti á bekknum á morgun. Gakpo og Jota snúa þá aftur í byrjunarliðið og Diaz myndi þá fá hvíld fyrir Meistaradeildarleikinn eftir viku.

    Spá

    Held að þetta verði mikill markaleikur þar sem tvær nokkuð heitar sóknarlínur mætast og Liverpool endi á að vinna í 3-2 leik þar sem Isak og Gordon reynast okkur erfiðir en sóknarmenn okkar reynast þeim enn verr.

  • Gullkastið – Sex stiga helgi

    17 Comments

    Síðasta helgi var líklega besta helgi tímabilsins fyrir Liverpool þegar Man City var loksins lagt á Etihad í deildarleik og það í kjölfarið á tapi Arsenal á Emirates vellinum. Ekki alltaf sem úrslitin á þessum olíuvöllum falla svona með okkur.
    Það var dregið í Meistaradeildinni, hörku vendingar í deildinni, Everton og Man Utd eru m.a. bara þremur stigum á eftir Liverpool, sko samanlagt. Næst er það svo hið heita/kalda Newcastle lið, generalprufa fyrir úrslitaleikinn í deildarbikarnum.

    Stjórnandi: Einar Matthías
    Viðmælendur: SSteinn og Maggi

    Þökkum að vanda samstarfsaðilum þáttarins fyrir að hjálpa okkur að halda síðunni úti.

    Afsláttarkóði í febrúar á WoktoWalk.is – 25% afsláttur með afsláttarkóðanum Liverpoolerubestir

    MP3: Þáttur 510

  • City 0 – 2 Liverpool – farið þið núna að trúa okkur?

    41 Comments

    Í dag var fyrsta skiptið þar sem Travelling Kop söng “And now you’re gonna believe us, we’re going to win the league!”.

    Og full ástæða til. Liðið er núna með 11 stiga forystu á Arsenal – hafa reyndar spilað einum leik meira – en núna hafa líkurnar á því að Liverpool nái í 20. titilinn í vor líklega aldrei verið jafn miklar á þessu tímabili eins og núna.

    Mörkin

    0-1 Salah (14. mín)
    0-2 Szoboszlai (37. mín)

    Hvað gerðist markvert í leiknum?

    Við sáum mögulega hlið á Liverpool sem hefur ekki mikið sést hingað til, en kannski er þetta lið og leikstíll sem er búinn að þróast í hausnum á Slot eftir leikina gegn Everton og Villa. Semsagt, liðið lá að mestu baka til, spilaði sig skynsamlega fram, pressaði á vel skilgreindum stöðum á vellinum og klukkunni, og nýtti svo færin sem gáfust.

    Fyrsta markið kom eftir korter. City hafði verið meira með boltann þegar þeir töpuðu honum við að spila út, og þar kom pressan fyrst almennilega við sögu. Szoboszlai fékk boltann á hættulegum stað eftir að leikmenn City höfðu tapað honum, gaf á Díaz sem vann horn. Jújú, þið munið þessi föstu leikatriði sem hafa skilað litlu sem engu á tímabilinu? Nema að nú drógu okkar menn upp úr rassvasanum rútínu beint af æfingasvæðinu, þar sem Macca tók hornið, gaf á Szobo sem var á markteigshorninu nær, hann gaf beint á Salah sem var við vítapunktinn og Salah skoraði. Smá heppni því skotið hjá Salah fór í varnarmann, og sendingin frá Szobo var ekkert fjarri því að vera veidd af varnarmanni, en stundum þarf meistarheppni. Hún kom þarna.

    Svo þegar vel var liðið á hálfleikinn gaf Trent langa sendingu fram, Szoboszlai hefði verið rangstæður ef hann hefði farið í boltann en hann sleppti því og lét Salah eftir að taka hlaup upp kantinn sem hann og gerði. Salah spilaði inn í teig, fann þar Szoboszlai ekkert fjarri sama stað þar sem Salah hafði skorað áður, og Dom gerði engin mistök þegar hann renndi boltanum gegnum klofið á varnarmanni og í nærhornið, Ederson reyndi ekki einusinni við boltann sem þó var ekkert það mikið úti við stöng.

    City héldu svo að þeir hefðu minnkað muninn þegar Marmoush komst í gegn og skoraði, en hann var vel rangstæður þegar hann fékk sendinguna inn fyrir og markið réttilega dæmt af.

    Í síðari hálfleik sýndi Liverpool svo gríðarlega agaðan leik. Kannski ekki mesta skemmtanagildið í slíkum bolta, en ég tek samt skemmtanagildið við það að vinna City á Etihad framyfir allan daginn. City komust einfaldlega hvorki lönd né strönd þó þeir væru mun meira með boltann, Doku var hvað eftir annað að spila sig upp að endamörkum en svo kom ekkert út úr því. Í reynd voru það okkar menn sem voru nær því að skora, og gerðu það reyndar einusinni en Dom var naumlega rangstæður sem kom í ljós við VAR yfirferð. Díaz átti líka gott skot sem Ederson varði.

    Endo fékk óvenju margar mínútur og spilaði eins og samúræinn sem hann er. Elska þennan leikmann.

    Semsagt, okkar menn spiluðu eins og meistarar, og í uppbótartíma fór stúkan að syngja lagið sem var sungið svo glatt á vormánuðum 2020.

    Hvað réði úrslitum?

    Það má segja að Slot hafi ráðið úrslitum, einfaldlega með taktík. Hann spilaði í reynd ekki með neina níu, en Curtis og Szoboszlai voru í falskri níu. Þetta var því kannski meira eins og 4-2-4, en mjög fljótandi samt. Nú svo var það vinnusemin í leikmönnum sem gerði gæfumunin. Szoboszlai var sívinnandi allan leikinn og er líklega að hlaupa heim til Liverpool í þessum rituðu orðunum. Macca og Gravenberch unnu mjög óeigingjarnt starf, þetta var svona leikur þar sem miðjan okkar sýnir að hún er ein sú besta í heiminum.

    Hverjir stóðu sig vel?

    Nafnbótin “maður leiksins” fer til Dominik Szoboszlai í dag, með Mohamed Salah mjög nálægt og í reynd ættu þeir að deila nafnbótinni. En liðið allt á hrós skilið, og Slot reyndar líka.

    Hvað hefði mátt betur fara?

    Tja…

    Mér dettur eiginlega ekkert í hug. Eini leikmaðurinn sem þarf eitthvað að hugsa sinn gang held ég að sé Darwin Nunez, sem fékk ekki eina einustu mínútu í dag. Ég er samt ekki viss um að það sé búið að afskrifa hann innan herbúða Liverpool eins og margir Liverpool aðdáendur hafa gert. En það kemur í ljós á næstu vikum. Ég yrði ekkert hissa þó Slot sé að halda áfram að vinna með honum, og hann fái sín tækifæri til að spreyta sig. En það er ljóst að þessi leikur hefði aldrei farið eins og hann gerði nema af því að Salah og Szobo nýttu færin sín.

    Umræðan eftir leik

    Helsti punkturinn er auðvitað þetta 11 stiga forskot sem liðið er núna með á Arsenal (og 20 stig á City, en það er bara ekki lengur eitthvað sem skiptir máli). Jújú, Arsenal á leik til góða, en þeir spila næst gegn Forest, United, Chelsea, Fulham og Everton, plús svo tvo leiki við PSV í Meistaradeildinni þarna inn á milli. Þetta er bara fjarri því að vera eitthvað auðvelt prógram, jafnvel leikurinn gegn United sem verður á Old Trafford. Við getum farið að láta okkur líða vel með stöðuna, rétt eins og Travelling Kop sýndi undir lokin.

    En gleymum samt ekki að það er ekki búið að afhenda bikarinn ennþá. Það eru ennþá 11 leikir sem okkar menn þurfa að mæta í í deildinni, og það þarf að ná eins góðum úrslitum eins og hægt er í þeim leikjum. Staðan er núna sú að 7 þeirra eru heima en 4 á útivelli. PPG á heimavelli er í dag 2.42 ÞRÁTT FYRIR tapið gegn Forest í haust, og á útivelli er liðið með PPG upp á 2.33 (og er n.b. með bætingu upp á 7 stig samanborið við sambærilega útileiki á síðasta tímabili, en -3 í samanburði á heimaleikjum).

    Semsagt: staðan er frábær, en þetta er EKKI BÚIÐ. Það er ekki þar með sagt að ef (eða þegar!) liðið tapar næst stigum – eða jafnvel leik, guð forði okkur – að þá sé allt í einu liðið ómögulegt, eigendurnir hálfvitar fyrir að hafa ekki keypt fullt af leikmönnum, og allt í hers höndum. Munum það.

    Liverpool og Arsenal mætast á Anfield þann 10. maí. Í fullkomnum heimi þá verða okkar menn búnir að tryggja sér titilinn þá, og Arsenal þurfa vonandi bara að standa heiðursvörð fyrir strákana okkar.

    Tölum svo aðeins um Mo Salah. Hann er núna búinn að jafna Gordon Hodgson í markaskorun hjá félaginu, og er jafn honum í þriðja sæti. LFC: viljið þið PLÍS semja við hann og gefa honum þó ekki nema eitt tímabil til viðbótar? Salah ÞARF að fá möguleikann á að komast í 2. sætið. Líklega nær hann Rush aldrei, enda spilaði Rush það lengi fyrir Liverpool að hans met fellur mögulega aldrei.

    Hvað er framundan?

    Newcastle koma í heimsókn á Anfield á miðvikudaginn. Það verður fjarri því að vera eitthvað léttur leikur, þeir sýndu a.m.k. í fyrri hálfleik gegn Forest af hverju það skyldi enginn vanmeta þá – og sýndu svo í seinni af hverju svona margir vanmeta þá. Svo er frí um næstu helgi því þá verður spilað í FA bikarnum, og á miðvikudag eftir rúma viku er það svo meistaradeildin. Engin ástæða til að hugsa of langt fram í tímann, nú er það bara leikurinn á miðvikudaginn.

    Munið krakkar: þetta er ekkert sjálfsagt. Njóta þess á meðan það er.

  • Liðið gegn City

    28 Comments

    Hollendingurinn fljúgandi – Cody Gakpo – er kominn aftur, en byrjar á bekk. Annars virðist Slot lifa eftir orðtakinu að rótering sé fyrir aumingja:

    Bekkur: Kelleher, Tsimikas, Quansah, Endo, Elliott, Nunez, Gakpo, Chiesa, Jota

    Vonum bara að menn hafi náð að endurheimta almennilega eftir Villa leikinn.

    Alveg sæmilegustu möguleikar til að endurnýja í framlínunni ef og þegar menn verða þreyttir, en líklega mun Slot ekki skipta út á miðju eða í vörn nema hann neyðist til.

    3 stig væru frábær, 1 stig væri enginn heimsendir. Mikið væri svo líka gaman ef menn sleppa við meiðsli.

    KOMA SVO!!!!!

  • Heimsókn á Etihad á morgun – tækifæri til að stinga af

    6 Comments

    Á morgun mun Liverpool heimsækja Man City í leik sem hefur talist sem hápunkturinn í strembinni leikjahrynu Liverpool í febrúar mánuðinum sem hefur svona því miður kannski ekki farið alveg eins og maður hefði óskað eftir jafntefli gegn Everton og Aston Villa en eftir úrslit dagsins í dag þá er staðan alls ekki slæm þar sem Arsenal tapaði gegn West Ham og er bilið núna átta stig þegar bæði lið eru búin að spila 26 leiki.

    Pressan á Liverpool er því kannski bæði aðeins minni og aðeins meiri fyrir leikinn á morgun eftir þessi úrslit í dag. Liverpool er því enn með þetta þriggja leikja forskot á Arsenal og hefur svigrúm til að mistakast án þess að það bitni það mikið á þeim ef ekki tekst að landa öllum þremur stigunum. Rosa fín staða það en sigur þýðir að Liverpool fer yfir stóra hindrun og ætti ellefu stiga forskot – þó Arsenal ætti leik inni – og sú staða yrði rosalega góð þar sem nokkrar áhugaverðar viðureignir eru framundan hjá báðum liðum.

    Nóg um hvað gæti orðið og förum í það sem verður og það er leikurinn á morgun. Eins og áður segir hafa úrslit og jafnvel frammistöður Liverpool undanfarna leiki ekkert verið 10 af 10, nokkrar daufar og misjafnar frammistöður og úrslit sem hefðu svo sannarlega mátt vera betri svo það er klárlega svigrúm til bætinga og morgundagurinn fínn tími til að koma þeim af stað.

    Arne Slot hefur sagt að Gakpo, sem hefur misst af síðustu tveimur leikjum og er orðinn algjör lykilmaður í liðinu, sé pínu touch and go með það hvort hann verði klár í leikinn og væri frábært ef hann væri það. Bradley fór meiddur út af gegn Villa og verður ekki með frekar en Joe Gomez og ég held að það séu svona helstu og jafnvel einu fjarverurnar hjá Liverpool fyrir leikinn. Meira að segja Slot og Hulshoff, aðstoðarmaður hans, verða á hliðarlínunni en þeir bíða eftir að fá úrskurðað hve marga leiki þeir fá í bann fyrir rauðu spjöldin eftir leikinn gegn Everton.

    Man City eru auðvitað enn án Rodri og þeir Akanji og Stones ættu að vera fjarverandi. Spurning er með Haaland sem fékk einhvern hnykk á hnéð í síðasta deildarleik þeirra og þurfti að fara út af. Hann var á bekknum gegn Real Madrid þegar þeir voru slegnir út úr Meistaradeildinni en kom ekkert inn á þó þeir hafi þurft að skora til að eiga möguleika á að komast áfram. Það er því spurning hvort hann sé alveg heill og geti spilað í eða byrjað leikinn á morgun, ef hann er í standi þá eflaust gerir hann það en spurning annars hvort þetta sé leikurinn sem Guardiola myndi finnast hann þurfa að spila honum ef því fylgir áhætta á að meiðslin yrðu verri og hann lengra frá.

    Ólíkt Liverpool þá eyddi Man City töluverðum fjárhæðum í janúar glugganum og virðast nokkrir af nýju leikmönnunum vera byrjaðir að stimpla sig inn þá sérstaklega sóknarmaðurinn Omar Marmoush sem lengi vel var orðaður við Liverpool sem eftirmaður Salah og hann skoraði þrennu í síðasta deildarleik. Þá hefur mér fundist miðjumaður Nico Gonzalez komið ágætlega inn í þetta hjá þeim líka en miðverðirnir tveir eru mjög hráir og lítið sýnt hingað til.

    Gengi og frammistöður Man City hefur svo sannarlega ekki verið á pari við það sem maður hefur þurft að venjast undanfarin ár og hafa þeir í ansi mörgum leikjum virkað mjög slakir til baka og afskaplega bitlausir og hugmyndasnauðir í sóknarleiknum. Samkvæmt því öllu þá má alveg færa rök fyrir því að ef það er gott að mæta þeim á útivelli en við vitum það öll að það er líklega aldrei góður tími til að mæta þeim því þeir eru alltaf líklegir til að geta sett allt í fimmta gír og verið nær ósnertanlegir ef sá hátturinn er á þeim.

    Það má því alls ekki búast við fyrirfram þægilegum leik á morgun og hvorugt liðana vilja selja sig ódýrt og gefa frá sér stig. Liverpool þarf stigin til að færast nær titlinum og Man City þurfa öll stig sem þeir geta fengið í baráttu sinni við að tryggja sér sæti í Meistaradeildinni á næstu leiktíð.

    Alisson

    Trent – Konate – Van Dijk – Robertson

    Mac Allister – Gravenberch – Szoboszlai

    Salah – Diaz – Gakpo

    Hef ekki hugmynd um hvernig eða hvort Arne Slot muni rótera eitthvað í þessum leik þar sem það kemur svo leikur gegn Newcastle á Anfield á miðvikudaginn en þykir líklegra að hann gæti tekið einhverjar breytingar þar. Robertson hefur spilað svolítið mikið undanfarið og mögulega er einhver Tsimikas rótering þarna en hugsa að það verði frekar í næsta leik. Mögulega gæti Jones komið inn í eitthvað hlutverk á miðjunni en ég reikna með að þessir þrír byrji. Ef Gakpo er heill þá held ég að hann byrji og Diaz komi inn í þennan leik sem fölsk nía en ef Gakpo er ekki heill þá mun Diaz vera á kantinum og Jota eða Nunez leiða línuna.

    Sjáum hvað setur, það væri nú rosalega fínt að fá þrjú stigin á morgun en eftir úrslit dagsins þá gæti eitt stig bara verið í lagi. Sjáum til, þetta verður líklega hörku leikur.

  • Aston Villa 2 – 2 Liverpool

    62 Comments

    0-1 Mo Salah 29 mín

    1-1 Tielemans 38. mín

    2-1 Watkins  45.mín

    2-2 Trent  61.mín

    Liverpool byrjuðu leikinn í dag ágætlega og voru búnir að fá nokkur tækifæri sem þeim tókst ekki að koma á ramman áður en Salah kom liðinu yfir á 29.mínútu með sínu 24 deildarmarki í ár eftir góðan undirbúning frá Jota. Aðeins níu mínútum seinna tókst Villa að jafna þegar klafst í teignum endaði á því að Szoboszlai skallaði boltann beint fyrir fæturna á Tielemans sem skoraði auðveldlega.

    Strax eftir markið voru Liverpool nálægt því að taka forustuna á ný þegar Jota slapp í gegn en skot hans fór langt framhjá. Í uppbótatíma fyrri hálfleiks tóku Villa svo forustuna þegar það kom fyrirgjöf inn í teiginn og af einhverjum ástæðum fylgdi enginn Watkins á eftir sem skoraði með skalla.

    Eftir fyrstu mínúturnar í seinni hálfleik fóru Liverpool að taka völdin í leiknum og uppskáru svo loks. Fyrst átti Jota skot í þverslá og mínútu seinna jafnaði Trent leikinn þegar MacAllister kom boltanum á Salah sem sótti í átt að teignum, gaf svo á Trent sem átti skot í Mings og þaðan í netið.

    Á mínútunum sem fylgdu komu nokkur færi Liverpool þar sem Szoboszlai og Salah voru nánast búnir að spila sig í gegnum vörn Villa manna og Jota átti skalla yfir markið. Slot gerði þá tvöfalda skiptingu þar sem Jota og Trent fóru útaf fyrir Nunez og Bradley. Vissulega margir leikir á fáum dögum þessi misseri en Trent var búinn að vera að vaxa inn í leikinn og skora jöfnunarmarkið.

    Stuttu eftir skiptinguna fékk Nunez sannkallað dauðafæri þar sem Szoboszlai gaf boltann þver yfir teiginn og Nunez skaut yfir markið undir pressu en með það fyrirgefur ekki það að það var enginn í markinu þar sem Martínez hafði mætt Szoboszlai. Eitt af klúðrum tímabilsins.

    Eftir þetta fór allur kraftur úr okkar mönnum Villa skoraði en sem betur fer var það rangstæða. Bradley meiddist og þurfti að fara af velli eftir að hafa komið inn á og á lokamínútunum fengu Villa tvö fín færi til að klára leikinn en sem betur fer endaði 2-2

    Bestu menn Liverpool

    Salah skilar af sér marki og stoðsendingu í enn eitt skiptið á tímabilinu. Jones var flottur í pressunni og Trent var að líta vel út þegar hann var tekinn af velli.

    Vondur dagur

    Líklegast slakasti leikur Gravenberch á þessu tímabili en verðum að fyrirgefa það því í fljótu bragði man ég ekki eftir öðrum slökum leik hjá honum á tímabilinu, leiðréttið mig ef það er rangt. Hinsvegar verður Nunez að vera hér menn bara verða að klára svona færi og tók svo ótal rangar ákvarðanir í kjölfarið. Jota hefði líka mátt gera betur í sínu færi og er það helst færanýting og kærulaus varnarleikur sem kostar okkur í dag.

    Umræðan

    • Gefum Arsenal tækifæri á að minnka munin og setjum enn meiri pressu á leik okkar manna gegn City um helgina.
    • Það er hægt að kvarta sig sáran undan færanýtingu og ekkert rangt við það en að skora tvö mörk gegn Everton og Villa og labba ekki út með þrjú stig er sárt og verðum að fara verjast betur en í síðustu leikjum ef við ætlum að sigla heim þessum titli.
    • Síðan er alveg punktur í þessu að Villa eru ekki mikið í því að tapa á heimavelli í ár. Þeir töpuðu fyrsta heimaleiknum sínum gegn Arsenal en hafa síðan unnið sex og gert sjö jafntefli, með leiknum í dag.

    Næsta verkefni

    Við lokum næstu umferð með síðdegis leik á sunnudegi á Etihad gegn Manchester City sem áttu erfitt kvöld í kvöld þegar þeir féllu úr leik í Meistaradeildinni gegn Real Madrid og vonandi mun það sitja í þeim um helgina.

  • Byrjunarliðið gegn Villa

    75 Comments

     

    Bekkur: Kelleher, Bradley, Quansah, Tsimikas, Elliott, Endo, Nunez, Chiesa og Diaz

    Áhugavert lið í dag þar sem Diaz fær hvíld en í stað Chiesa eða Nunez úti vinstra meginn virðist vera að Jones eða Szoboszlai byrji þar í dag.

Load More
Congratulations. You've reached the end of the internet.

© 2019 KOP.is

Back to Top
Close