Í þessu uppgjöri munum við fara yfir hvernig þeim leikmönnum gekk sem að Liverpool ákvað að lána út síðasta leiktímabil. Það voru alls 11 leikmenn sem léku stærstan hluta tímabilsins fyrir önnur lið að láni og hér verður farið yfir hvernig þeim gekk og hvað sumarið telst líklegt til að fela í sér fyrir framtíð þeirra. Við tökum þetta í óreglulegri og tilviljanakenndri röð.
Nat Phillips Derby County
Költ-hetjan Nat fór enn á ný á lán í Championship deildina í vetur, nú til nýliðanna í Derby County. Hann byrjaði frekar rólega, var inn og út úr liðinu en þegar líða tók á tímabilið festi hann sig í sessi hjá nýjum stjóra. Hápunkturinn var þegar hann skoraði sigurmark í mikilvægasta leik liðsins og tryggði þeim sigur gegn Hull City, úrslit sem að urðu til þess að lokum að liðið hélt sér uppi. Hann endaði tímabilið sem fastamaður í liðinu, lék alls 32 deildarleiki og er í miklum metum hjá aðdáendum Derby. Stjóri þeirra var skýr í lok tímabils um að hann myndi vilja halda Phillips hjá Derby næsta tímabil.
Einkunn og útlit Við látum Nat fá 8,0 fyrir tímabilið. Hann er nýorðinn 28 ára og er nú að fara inn í síðasta árið á samningi sínum. Það eru allar líkur á að hann verði nú seldur frá félaginu. Mörg lið í Championship horfa hýrt til hans og Leeds hefur líka verið nefnt. Hann verður seldur og við fáum um 5 milljónir fyrir hann.
Rhys Williams Morecambe
Partnerinn hans Nat er næstur á blað. Rhys hefur satt að segja átt býsna erfitt frá því að hann lék 19 leiki með aðalliðinu 2020-2021, mörg lán hingað til hafa skilað fáum leikjum. Í vetur var hann sendur til Morecambe í D-deildinni og þar varð hann loks fastamaður hjá liði. Hins vegar gekk liðinu afleitlega og lauk á því að falla út úr deildarkeppninni. Kappinn lék 40 leiki í deild, en í líklega slökustu vörn deildarkeppninnar.
Einkunn og útlit Hann fær 5,0 fyrir að spila fullt af leikjum en í vondu, mjög vondu, liði. Samningur hans eins og Nat á eitt ár eftir en það virðist þó vera klárt að LFC er tilbúið að láta hann fá frjálsa sölu. Í öllu falli mun hann ekki fá mínútur hjá LFC og hverfur án greiðslu á lán eða frjálsri sölu.
Owen Beck Blackburn Rovers
Líklegast þekktastur fyrir það að vera frændi Ian Rush en kappinn er líka býsna frambærilegur vinstri bakvörður sem fór í Championship deildina í vetur eftir árangursríka veru hjá Dundee árið áður. Hann kom mjög sterkur inn í lið Blackburn sem fór vel af stað í deildinni en tvær slæmar tognanir aftan í læri sló hann út af laginu og hann náði ekki að leika með liðinu seinni part deildarinnar. Lék að lokum 24 leiki fyrir Blackburn og skoraði 1 mark.
Einkunn og útlit Við setjum á hann 7,0 fyrir frábæran fyrri hluta þar sem hann virkilega var að fá athygli en svo komu meiðslin inn. Hann verður 23ja ára á árinu og mun mæta til æfinga með aðalliðinu í sumar, mögulega fá mínútur í æfingaleikjum eins og hann hefur áður fengið. Það eru þó ekki miklar líkur á því að hann eigi framtíð hjá LFC og slúðrið er að hann verði lánaður aftur í Championship deildina, eða þá mögulega seldur á um 5 milljónir punda. Það er smá séns að góð frammistaða í sumar myndi gefa honum tækifæri til að verða hluti af stærri hóp LFC.
Ben Doak Middlesborough
Klárlega mest spennandi lánið í vetur. Doak sannarlega verið í umræðunni sem framtíðarleikmaður Liverpool og ákvörðun félagsins var að senda hann til liðs þar sem hann fengi mikið að spila sem aðalmaður. Það varð strákurinn strax hjá Boro’, liði sem var í efri helmingnum og að spila aggressívan sóknarfótbolta. Frammistöðurnar virkilega góðar og í nóvember var hann valinn besti ungi leikmaður B- til D-deilda þann mánuð. Í janúar buðu úrvalsdeildarlið 20 milljónir punda í kappann en fengu neitun, talið að lágmarksverð til að fá hann keyptan yrðu 30 milljónir. Hins vegar reið ógæfan yfir í þeim mánuði og hann meiddist það alvarlega að tímabilinu lauk án fleiri leikja. Hann var þó farinn að geta æft í maí og er sagður vera heill og tilbúinn í næstu verkefni.
Einkunn og útlit Hann fær 9,0 fyrir tímabilið. Bara meiðslin að stoppa hann frá fullu húsi. Það er klárt að hann verður mættur í Kirkby 8.júlí og mun þar fá að sýna sig fyrir Slot og félögum. Í dag eru þó meiri líkur á því að hann verði lánaður eða seldur til liðs í Úrvalsdeildinni eða svipað sterkum deildum. Þar værum við að tala um 30+ milljónir ef af sölu yrði. Gott sumar gæti hiklaust endurvakið von hans um LFC-framtíð
Dominic Corness Gillingham
Corness átti gott tímabil í Sviss leiktíðina ´23 – ´24 og var ætlunin að lána hann í svipaðan styrkleikaflokk í vetur en meiðsli komu í veg fyrir það síðasta haust. Hann lék nokkra leiki með U21s árs liðinu áður en hann var svo lánaður til Gillingham í febrúa. Þar náði hann aðeins að leika þrjá leiki til vors í D-deildinni.
Einkunn og útlit Hann fær 1,0 í einkunn enda veturinn vondur. Nú í síðustu viku var tilkynnt að hann fengi að fara frítt frá LFC og verður því samningslaus 1.júlí.
Kaide Gordon Norwich/Portsmouth
Gordon var keyptur 16 ára frá Derby og miklar vonir voru bundnar við hann – er jú methafi á Anfield sem yngsti markaskorari félagsins í FA cup. Mikið af meiðslum hafa hindrað hans feril og í vetur var ætlunin að endurstilla hann með láni í næstefstu deild. Fyrri helmingurinn af tímabilinu var í Norwich þar sem hann kom við sögu í 10 leikjum, LFC var ósátt við hversu lítil tækifæri hann fékk, kallaði hann til baka í janúar og sendi til Portsmouth þar sem hann fékk 4 leiki til vors. 13 af þessum 14 leikjum kom hann inná sem varamaður, bæði í liðum um miðja næstefstu deild.
Einkunn og útlit Setjum 3,0 á þennan vetur hjá Kaide, vetur sem átti að sparka honum í gang en virkaði bara þveröfugt. Hann er til sölu en samningurinn er langur og dýr og því líklegt að aftur verði reynt að lána hann til að svo að lokum fáist þokkalegt verð fyrir hann. Verður bara 21s árs í ár svo að það er ekkert útilokað að hann hrökkvi í gang.
Stefan Bajcetic RB Salzburg / Las Palmas
Verulega spennandi ungur maður sem eins og sumir hér að framan hefur verið í meiðslabrasi. Því var ákveðið að vetrinum skyldi varið í að finna honum mínútur í gæðaliði. Hann fór til Austurríkis og lék fyrir Pep Lijnders en þegar sá var rekinn lét Bajcetic strax vita af því að hann vildi fara annað og það varð úr að honum var kippt til baka og sendur til Spánar þar sem hann fór til Las Palmas. Sólin á Mallorca virkaði vel á hann og hann varð að lokum fastamaður í liðinu sem þó féll úr efstu deild. Í heildina spilaði hann 33 leiki á tímabilinu og skoraði eitt mark.
Einkunn og útlit Hann fær 8,0 – margir af leikjunum í Austurríki voru innákomur sem varamaður og hann var í ströggli þar en hins vegar var Spánardvölin fín og lauk með honum sem fastamanni. Honum eru ætlaðar mínútur nú í sumar og mun fá séns á að spila sig inn í stóru myndina hjá LFC. Hann hefur hins vegar alveg látið í ljós að hann vill verða aðalmaður í liði og útilokaði alls ekki að fara aftur til Spánar, sagðist kunna mjög við leikstílinn þar. Þar gæti komið til lán en þá líka sala sem yrði á svipuðum stað og hjá Doak. Minnst 30 millur.
Callum Scanlon Millwall
Scanlon er einn af þeim leikmönnum sem LFC binda miklar vonir við. Öskufljótur vinstri bakvörður með fullt af hraða og sköpun, leikið töluvert af yngri landsleikjum og fengið töluvert af sumarmínútum. Í vetur var ákveðið að hann þyrfti kjöt og mínútur og sendur í framhaldi til suður London í “ljónshreiðrið” The Den hjá nöglunum í Millwall. Dálítið í anda vetursins þá flaug hann af stað og hann skoraði og lagði upp í fyrstu leikjunum. Þeir urðu þó bara fjórir vegna meiðsla og hann hefur verið meira og minna í Liverpool í endurhæfingu.
Einkunn og útlit Skellum á hann 5,0 því hann fékk fullt af fyrirsögnum í þessum fáu leikjum. Hann mun fá mínútur í sumar og stefnan er að gera aðra tilraun til að lána hann í Championship, Millwall eru mjög spenntir.
Lewis Koumas Stoke
Koumas kom óvænt inn hjá Klopp, er með markanef og aggressívur framherji. Það voru mörg lið um hituna en að lokum var ákveðið að hann færi eins og margir aðrir til Championshipliðs þó að fyrst hafi skoska deildin og LeagueOne talið líklegri kostur. Koumas fór því til Stoke þar sem hann náði að koma við sögu í 49 leikjum þó meira en helmingur hafi verið sem varamaður þá er það sannarlega fínasti árangur. Hann skoraði 2 mörk og gaf 4 stoðsendingar á leiðinni. Stuðningsmenn Stoke voru eilítið beggja blands með kappann þó, vantaði svolítið upp á stöðugleikann en margt flott á ferðinni.
Einkunn og útlit Hann fær alveg 8,0 fyrir það að fá svo mikinn spiltíma í mjög erfiðri deild og hjá liði sem var að ströggla. Sýnir ákveðið traust. Þessi strákur verður 20 ára í haust og er nú orðinn fastur í landsliðshóp Wales, nokkuð sem mun bara styrkja hann. Stefnan er að lána hann aftur, annað hvort í topplið í Championship eða liðs á meginlandinu. Við munum sjá hann fá sumarmínútur fyrst samt.
Luke Chambers Wigan
Annar vinstri bakvörður, fengið sumarmínútur og verið í lánum. Bakmeiðsli hafa hrjáð hann allan ferilinn og sama var í vetur. Náði aðeins 15 leikjum í LeagueOne hjá Wigan en stóð sig vel þegar hann náði að spila.
Einkunn og útlit Fær 5,0 fyrir veturinn, fínar frammistöður en mikið um meiðsli. Líklegur í annað lán frekar en sölu en á ekki framtíð hjá LFC. Meira verið að lána til að hækka verðmiðann. Wigan hafa hug á að fá hann, en á frjálsri sölu.
Calvin Ramsay Wigan/Kilmarnock
Keyptur fyrir 6 milljónir punda frá Aberdeen en meiðsli og í kjölfarið algert sjálfstraustshrun hafa þýtt það að hann er bara dálítið kominn út í kuldann. Hann lék í heildina 12 leiki fyrir Wigan en náði aldrei að festa sig neitt í sessi og var kippt til baka og sendur upp til Skotlands í janúar þar sem hann kom nánast ekkert við sögu.
Einkunn og útlit Blessaður karlinn fær 2,0 í einkunn. Einfaldlega misheppnuð kaup og í vetur varð alveg ljóst að hann kemst ekkert lengra nema að fá að kveðja þessa LFC-martröð. Liðið vill selja hann fyrir “cut-price” og talað er um að einhver lið í Skotlandi hafi áhuga á þessum strák sem átti frábært upphaf með Aberdeen og á landsleiki fyrir Skota. Eigum við segja milljón í bankann frekar en nýtt lán?
Luca Stephenson Dundee United
Kappinn fékk fínar sumarmínútur 2024 og þá að mestu á miðsvæðinu og í kjölfarið var ákveðið að senda hann á lán. Mörg lið lýstu áhuga en ákveðið var að senda hann til Skotlands í efstu deild. Þar varð hann lykilmaður í spútnikliði Dundee United sem lauk keppni í 5.sæti og leika í Conference deildinni á næsta ári. Hann lék að mestu sem vængbakvörður í 3-4-3 leikkerfi og endaði á að leika 34 af 38 keppnisleikjum liðsins og var nú nýlega valinn besti ungi leikmaður liðsins. Grjótharður með mikla hlaupagetu og olli mikilli lukku á meðal aðdáenda liðsins.
Einkunn og útlit Hann fær alveg solid 9,0 út frá lykilhlutverkinu en vissulega deildin ekki rosalega sterk. Stjóri Dundee United er mjög skýr með að hann vill kaupa kappann og það er ekki ólíklegt að sú verði raunin. Hann verður 22ja ára og alveg ljóst að hann komst í gluggann í vetur. Þó er ekki ólíklegt að hann fái sumarmínútur fyrst og yrði þá lánaður aftur og þá til sterkara liðs.
Samantekt
Heilt yfir þá var veturinn ágætur þegar kemur að því að senda leikmenn á lán. Það var þó enginn sem náði þannig árangri að hægt sé að reikna með því að frammistaðan hafi skilað viðkomandi sterku tilkalli til að verða hluti af hópnum sem ver meistaratitilinn. Langlíklegastur þar er Bajcetic og þar á eftir má horfa til Ben Doak og Owen Beck. Það er mjög líklegt að þeir verði í leikmannahópnum gegn Preston. Það er þó allt eins líklegt að góðar frammistöður þeirra þýði hærri verðmiða og sölu líkt og við reiknum með hjá Nat Phillips og þar gætum við séð Luca Stephenson líka. Þetta væri að skila töluverðum milljónum í kassann. Corness og Rhys Williams munu fara án greiðslu og svo eru bæði Ramsay og Chambers til sölu fyrir klink. Við munum sjá Koumas og Scanlon lánaða næsta vetur og ákvörðun um þá tekin í framhaldinu.
Liverpool hefur ákveðið að stokka upp í U18 og U21 liðunum með því að skipta þar um þjálfara og það hefur verið umræða um það í vor að áherslan á öfluga yngri leikmenn hafi aðeins lent úti á kanti. Því hefur verið talað um það að færri leikmenn verði lánaðir frá félaginu næsta tímabil og það gæti alveg þýtt að einhver nöfn hér að ofan verði á Kirkby í stað þess að vera sendir á lán. Lokapistillinn í uppgjöri vetrarins verður um yngri liðin og þá skoðum við líka hvaða nöfn væru líklegust til að fá mínútur í sumar og/eða svo fara á lán.
Daníel Sigurgeirsson
Maggi
Einar Matthías
