Hamann & Benítez verða lengur.

Einar, ég veit þú verður hundfúll þegar þú lest þetta, en Benítez er víst reiðubúinn að bjóða Didi Hamann nýjan samning og tryggja sér þannig þjónustu Þjóðverjans næstu tvö-þrjú árin, að minnsta kosti.

Mitt mat er það í raun og veru að ég er ánægður ef hann verður lengur. Ég hefði verið hundfúll ef þetta hefði verið Houllier að bjóða Hamann nýjan samning, þar sem Hamann átti sæti sitt í byrjunarliðinu víst undir stjórn Houlliers. En Benítez hefur þegar sýnt okkur að hann ætlar sér ekki að nota Hamann í alla leiki, hann hefur meira að segja haft hann á bekknum í stöku leikjum eftir að Gerrard meiddist.

Hamann er ennþá einn sá besti í bransanum í því sem hann gerir. Þetta svokallaða skítadjobb á miðjunni, sem enginn miðjumaður fær nóg hrós fyrir. Didier Deschamps vann þetta í mörg ár hjá Juventus, síðan Chelsea, og heims- og Evrópumeisturum Frakka. Patrick Vieira hefur sinnt þessu um árabil hjá Arsenal, Marcel Desailly gerði þetta að listgrein hjá AC Milan og svo mætti lengi telja. Hamann telst fyllilega í sama hópi og þessir menn, enda þótt Klinsmann hafi misst trú á honum í haust og hætt að velja hann í landsliðið hefur hann verið einn mikilvægasti hlekkur þýska landsliðsins undanfarin ár. Það eru einfaldlega fáir betri en Hamann í að vinna boltann af miðjumönnum andstæðinganna, og skila honum svo til manna eins og Xabi Alonso og Steven Gerrard, sem eiga að stjórna spilinu.

Vandamálið með Hamann hefur aldrei verið skortur á getu heldur bara það að leikur hans, sem miðjumanns, er allt of einhæfur. Eins góður og hann er í varnar- og stopparavinnunni þá er hann steingeldur í sóknaraðgerðum. Hann hittir svona þremur langskotum á markið á ári, og fer jafnan þeirra eitt inn með glæsibrag. En að öðru leyti þá er mjög lítið sem Didi Hamann leggur af mörkum til sóknarinnar hjá Liverpool – og þegar hann spilar á miðjunni hjá okkur erum við bara með þrjá miðjumenn sem geta sótt, sem er ekki alltaf það sem við þörfnumst.

Munið eftir leiknum í UEFA keppninni, febrúar 2001, þegar við unnum Roma á útivelli 2-0 og Owen skoraði bæði mörkin? Í þeim leik var maður eins og Dietmar Hamann ómetanlegur. Hann var stöðugur þyrnir í síðu Rómverja og stöðvaði miðjuspil þeirra einn síns liðs. Það var einn af þessum leikjum hans sem standa upp úr á ferlinum.

Að sama skapi þá sást vel hversu mikilvægur hann er í svona erfiðum útileikjum, þar sem varnarvinnan þarf að vera á hreinu, í því hvernig Liverpool lék gegn Bayer Leverkusen í 8-liða úrslitum Meistaradeildarinnar ári síðar. Þá virtumst við vera á leið í undanúrslitin þangað til Houllier tók Hamann útaf – sem eru í dag talin ein af hans stærstu mistökum sem stjóra – og eftir það óðu þeir Lucio (miðvörður) og Michael Ballack (miðjumaður) upp í gegnum vörnina okkar miðja hvað eftir annað, þar sem enginn var þar fyrir framan til að kóvera vörnina.

Á móti kemur leikur eins og í gær, gegn Blackburn, þar sem við vorum að sækja fast og pressa stíft í leit að jöfnunarmarki, og svo sigurmarki. Og í þeim leik sást vel hversu mikill akkilesarhæll Hamann er þegar við erum að sækja. Hann vann nokkra bolta í þessum leik en honum gekk erfiðlega að skila boltanum frá sér á samherja, og byggja upp sóknir. Allt of oft enduðu sóknir okkar á ótímabæran hátt með því að hann gaf frá sér boltann.

Þannig að Hamann er ekki jafn alhliða leikmaður og Gerrard eða Alonso, en það breytir því ekki að mínu mati að við getum glaðst yfir því að hann framlengi samning sinn við Liverpool FC. Hann mun ekki spila alla leiki og ég held að hann verði orðinn varamaður fyrir þá Gerrard og Alonso áður en um langt líður … en þegar við þörfnumst þess sem hann gerir best, þá verður ekki ónýtt næstu árin að geta kallað hann inn í liðið.

Hver veit nema við þurfum að spila erfiðan útileik við lið eins og Juventus eða Barcelona í Meistaradeildinni eftir áramót? Ef það gerist, þá veit ég að ég verð feginn að hafa Hamann í mínu liði.

Nú, Hamann er ekki sá eini sem verður lengur en fram á næsta sumar hjá Liverpool. Rafa Benítez segist hafa rætt við konuna sína um það að búa sig undir að vera í Liverpool næstu 15 árin. Sem hlýtur að gleðja okkur mjög mikið.

Hann hefur greinilega horft á menn eins og Wenger (9 ár) og Ferguson (17 ár) og hugsað með sér að til að ná sama árangri og þeir, og til að vera nefndur í sömu andrá og þeir, er ekki nóg að vinna titil með Liverpool. Hann verður að vinna titla – í fleirtölu – og gera það yfir margra ára bil. Ég veit ekki með ykkur en mér léttir allavega að vita að hann ætli ekki að vinna eina dollu með okkur og svo hlaupa til Real Madríd við fyrsta boð. Þetta eru góðar fréttir.

Vill einhver veðja hvort að Hamann endar sem þjálfari í starfsliði Benítez? 🙂