Juve á morgun, 2. lota! (uppfært)

Það er komið að því. Annað kvöld mæta okkar menn Juventus í seinni leik liðanna í 8-liða úrslitum Meistaradeildarinnar, að þessu sinni í Tórínó. Okkar menn unnu 2-1 sigur í fyrri leiknum á Anfield í síðustu viku og hafa því forskot fyrir morgundaginn. Juventus verður að vinna, sem gerir þá sennilega bara hættulegri ef eitthvað er. Þetta forskot okkar, 2-1 sigur, getur verið fljótt að fara á morgun. Juventus þurfa bara að skora eitt mark, þeim nægir 1-0 sigur til að fara áfram.

Hins vegar gætu okkar menn farið langt á því að ná að skora mark á útivelli á morgun. Þannig að spurningin er alltaf sú hvort að okkar menn leggjist í vörn á morgun eða hvort að þeir reyni að sækja og ná markinu. Ég held að sannleikurinn liggji einhvers staðar þarna á milli, að okkar menn muni reyna að halda hreinu umfram allt og síðan vera sniðugir með þau föstu leikatriði og færi sem þeir fá.

Líklegt byrjunarlið okkar á morgun er frekar óvíst að þessu sinni. Steven Gerrard er meiddur og þeir Morientes og Pellegrino mega að sjálfsögðu ekki spila. Þá verða örugglega einhverjar breytingar gerðar eftir helgina, en nokkrir af svokölluðum ‘lykilmönnum’ okkar ollu verulegum vonbrigðum gegn Man City á laugardag.

Þá vitum við ekki fyrr en bara rétt fyrir leik hvort að Xabi Alonso verður í liðinu. Hins vegar held ég að Rafa muni á morgun velja að stilla upp 4-5-1 og verði það annað af tveimur liðum, háð því hvort Xabi byrjar inná eða ekki:

Ef Alonso er ekki með á morgun sé ég Antonio Núnez koma inní liðið, á hægri vænginn, og García færa sig inná miðjuna. Eða að Smicer komi inn fyrir Alonso á miðjuna. En er samt nokkuð viss um að, í fjarveru fyrirliðans muni Rafa setja bæði Biscan og Welsh inná miðjuna með Alonso/García/Smicer til að tryggja að þeir nái ekki yfirburðastöðu á miðjunni.

Svo vitum við ekkert hvort Carson eða Dudek spilar í markinu á morgun. Vörnin og Baros frammi er alveg sjálfgefið. Það er ljóst að í svona 4-5-1 kerfi mun miiikið mæða á Milan Baros. Ef við eigum að skora mark/mörk á morgun verða þau annað hvort að koma úr föstum leikatriðum, eða þá að Baros verður að gjöra svo vel og búa þau til. Hann getur það alveg, ég hef tröllatrú á Baros annað kvöld.

UTAN VALLAR: Ef það er eitthvað sem ég hef áhyggjur af á morgun, þá er það allt húllumhæ-ið fyrir utan leikinn. Ekki aðeins hefur nær eingöngu verið fjallað um fjarveru Steven Gerrard & endurkomu Xabi Alonso og Djibril Cissé fyrir þennan leik, heldur virðist vera mikill ótti meðal stjórnenda LFC að enskir aðdáendur muni lenda í barsmíðum á vellinum á morgun. Ég vona innilega að ekkert gerist, að við getum bara átt frábært fótboltakvöld hvort liðið sem hefur betur. En engu að síður er ég drullustressaður um að eitthvað gerist á morgun, eitthvað sem mun ýfa upp þetta mikla sár sem þessir tveir klúbbar deila með sér.

MÍN SPÁ: Ég veit ekkert. Ætla ekki að spá fyrir um úrslit í kvöld en ég þori með nokkurri vissu að segja að við vinnum ekki á morgun. Það er alveg mögulegt, sérstaklega þar sem þeir virðast ætla að vanmeta getu liðsins án Steven Gerrard, en engu að síður er það mjög ólíklegt. Okkar helsti séns á morgun felst að mínu mati í að skora mark á útivelli, þar sem við erum ekki þekktir fyrir að halda hreinu í vetur. Vonandi ná okkar menn að draga kanínur upp úr hattinum og gera það sem til þarf til að koma liðinu í undanúrslitin…

…þar sem Chelsea bíða, reiðubúnir að sigra okkur einu sinni enn í vetur. Við sjáum nú til með það 😉

En allavega, annað kvöld ætti að verða gríðarlega spennandi fyrir Liverpool-stuðningsmenn og ég óska okkar mönnum góðs gengis og ykkur stuðningsmönnunum óska ég góðrar kvöldstundar. Áfram Liverpool!!!

---

**Smá viðbót (Einar Örn)**: Mér fannst Benitez nú gefa sterklega í skyn að Alonso myndi byrja á bekknum og hugsanlega koma inná í síðari hálfleik. Ef svo er, þá er svo sem erfitt að gera sér grein fyrir því hvernig Rafa stillir upp.

Eitt, sem mér hefur dottið í hug er að hafa Nunez þarna inná miðjunni með Biscan, þar sem að mér hefur fundist hann berjast vel og skila varnarhlutverkinu. Hann hefur einnig talsvert meiri reynslu en til dæmis Welsh.

En auðvitað er miðjan án Alonso, Gerrard og Hamann náttúrulega alveg fáránleg. Það er alveg ljóst að það mun gríðarlega mikið mæða á Igor Biscan. Hann á vanalega sína bestu leiki *án* Steven Gerrard, svo við skulum vona að það gerist núna.

En mikið væri maður nú samt rólegri ef Didi Hamann væri með á morgun. Hann var búinn til fyrir svona leiki og yrði algjörlega ómetanlegur. Ég spái því að Dudek verði í markinu og að hann nái að klára boltana, sem á hann koma.

**OG SVO SKORAR MILAN BAROS!!!**

En það er ljóst að allir leikmennirnir þurfa að berjast einsog ljón allan tímann. Mér er nákvæmlega sama þótt leikurinn verði ekki áferðarfallegur, bara að menn berjist einsog brjálæðingar fyrir sæti í undanúrslitum. Við getum þetta alveg!

KOMA SVO!!!

**Áfram Liverpool!!!**