Bolton á morgun

Það er ekki lengur stundlegur friður fyrir þessum leikjum öllum saman, en það er BARA jákvætt. En næst er það erfiður útileikur gegn harðjaxla liði Bolton. Bolton hafa ekki verið að heilla neina með fallegri knattspyrnu, en þeir hafa spilað sinn bolta og náð í raun betri árangri síðustu árin en búist hafði verið við af þeim. Þeir eru af þessum gamla enska skóla í sínum leikstíl og halda sig við hann. Þeir eru sérlega erfiðir viðureignar og það þýðir oft lítið annað en að mæta þeim með sömu hörkunni og þeir nota, annars ertu bara skilinn eftir í duftinu. Sjálfstraust okkar manna ætti að vera í botni núna. Þrír sigurleikir í röð og því ætti sálartetrið að vera í góðu lagi. Bolton koma líka fullir sjálfstrausts í leikinn, enda voru þeir fyrsta liðið til að leggja lið Portsmouth að velli, og það sem meira er, þeir voru fyrsta liðið til að skora hjá þeim sunnanmönnum.

Það hefur ekkert gengið alltof vel hjá Liverpool að spila á Reebok Stadium undanfarið. Frá 1997 hafa liðin spilað þar sex sinnum í deildinni og hefur aðeins einn þeirra unnist. Við unnum þar 3-2 árið 2002 með mörkum frá Milan Baros (2) og Emile Heskey. 3 leikir hafa endað með jafntefli og Bolton hafa svo sigrað í tveimur. Sem sagt, langt frá því að vera ásættanlegur árangur á þessum velli. Síðan við unnum síðast á þessum velli, þá hefur margt og mikið breyst hjá okkur. Þeir Steven Gerrard, Jamie Carragher og Sami Hyypia spiluðu leikinn, og svo kom John Arne Riise inná sem varamaður. 12 leikmenn af 16 manna hópnum sem spilaði þá, mun því pottþétt ekki vera í liðinu á morgun. Það er sæmileg uppstokkun.

Lið Bolton á ekki í miklum meiðslavandræðum þessa dagana. Þrír menn eru frá vegna meiðsla og telst í rauninni aðeins einn þeirra vera fastamaður í liði þeirra, þ.e. R.Gardner. Hinir tveir eru þeir Q.Fortune og H.Pedersen. Þeir munu því væntanlega stilla upp nánast sínu sterkasta liði. Það er í rauninni voðalega lítið meira um liðið þeirra að segja. Þeir eru sterkir varnarlega, virðast ekki vera að fá á sig mörg mörk. Að mér sýnist, þá hafa þeir ekki ennþá fengið mark á sig á heimavelli og heil 3 mörk í heildina. Þeir hafa reyndar ekki verið að skora mikið heldur. Heil 5 mörk í 6 leikjum og þrjú þeirra hafa komið á heimavelli. Það er því nokkuð ljóst að okkar menn þurfa að vera grimmir er sóknarleikinn varðar.

Þá að okkar mönnum. Ekkert nýtt komið fram er meiðslamál varðar, og það þýðir bara eitt. Það er ennþá jafn fáránlega erfitt að spá fyrir um það hvernig liðið verður skipað. Ég er handviss um að Riise kemur inn í bakvörðinn fyrir Aurelio, en ég býst samt fastlega við varnarsinnaðri uppstillingu og að Brassinn okkar verði á vinstri kantinum fyrir framan Norðmanninn. En hver mun spila í vörninni? Finnan er pottþéttur hægra megin en hverju ætlum við að fórna fyrir hvað í miðvörðunum? Við þurfum klárlega hæðina hjá Hyypia. Við þurfum óþrjótandi baráttu Carra. Við þyrftum líka á að halda að fá rólegheitin og yfirvegunina hjá Agger. Nico spilar frammi hjá Bolton og það er erfitt að dekka hann, og því í rauninni erfitt verk fyrir Rafa að stilla þessu upp. Ég ætla að spá því að hann taki gamla miðvarðarparið og spili því í þessum leik. Sem sagt, Carra og Sami.

Ég er nokkuð viss um að hann mun einnig finna pláss fyrir Gerrard, Xabi og Momo á miðjunni. Það er einmitt í svona leikjum sem Momo er gjörsamlega ómissandi. Hörku þarf að mæta með hörku og það er enginn sem gerir það betur en Momo. Eina spurningin í mínum huga varðandi miðjuna er það hvort hann setur Stevie á hægri kantinn og spilar með tvo framherja, eða hvort hann heldur sig við Pennant og setur Stevie inn í holuna fyrir aftan framherjann. Ég tippa á að Stevie verði á kantinum og frammi komi Rafa til með að stilla aftur upp þeim Crouch og Kuyt (var reyndar lengi að spá í að tippa á þá Crouch og Bellamy). Ég spái því að liðið verði svona:

Enn og aftur þá eru akkúrat engar líkur á að maður nái að hitta á þetta. Ég myndi ekkert hoppa hæð mína í loft af undrun ef við sæjum Robbie nokkur Fowler byrja frammi. Ég yrði heldur ekkert hissa á að sjá Bellamy í liðinu, frekar en Pennant, Zenden, Garcia eða Gonzalez. Breiddin er svo ótrúlega mikil að þetta er útilokað og aðeins Rafa veit hvernig liðið verður. Ég ætla að halda áfram að vera bjartsýnn fyrir hönd okkar manna og spái ég því sigri á morgun. Mér finnst yfirbragð liðsins vera orðið allt annað og ég hef núna alltaf á tilfinningunni að við getum skorað í næstu sókn. Það er eitthvað sem ég fann ekki fyrir núna í upphafi tímabils.

Bekkurinn: Dudek, Agger, Pennant, Gonzalez og Bellamy.

2-1 fyrir okkar menn og málið er dautt. Eigum við ekki að giska á að Crouch haldi áfram sinni iðju við markaskorun og að fyrirliðinn hjálpi til og skori enn eitt sigurmarkið sitt á ferlinum.

Koma svo…