Mánudagspælingar

Í dag er mánudagur; fimm umferðum er lokið í Úrvalsdeildinni og skollið á tveggja vikna hlé vegna landsleikja, forkeppni Meistaradeildarinnar er búin og búið að draga í riðla fyrir sjálfa keppnina, leikmannaglugginn er lokaður fram í janúar og fyrir vikið finnst mér við hæfi að við stöldrum aðeins við og íhugum byrjun tímabilsins.

Tölfræðin

Liverpool FC hefur spilað sex leiki á tímabilinu. Í þeim leikjum …

• Hefur liðið skorað 16 mörk, sem gerir 2.67 mörk að meðaltali í leik. Þá hafa alls níu leikmenn skorað þessi fimmtán mörk (sjálfsmark Lauren hjá Villa er það sextánda), en það hlýtur að vera jákvætt að svo margir (þar á meðal allir fjórir framherjarnir) leikmenn skuli vera komnir á blað strax.
• Hefur liðið fengið á sig tvö mörk, bæði úr vítaspyrnum. Fyrra vítið kom vegna klaufaskaps Carragher og/eða heppni Villa, en boltinn hrökk í höndina á honum. Um vítaspyrnudóminn gegn Chelsea þarf ekki að fjölyrða. Eftir stendur sú staðreynd að engu liði hefur enn tekist að brjóta vörn Liverpool á bak aftur með spilamennsku sinni.
• Pepe Reina hefur leikið alla þessa sex leiki í marki Liverpool og haldið hreinu í fjórum þeirra. Sem er frábær tölfræði, ef hann getur haldið áfram að halda hreinu í fjórum af hverjum sex leikjum á liðið eflaust eftir að setja einhvers konar met í að halda hreinu í vetur. Þ.e.a.s., liðið á eftir að bæta metið sem Pepe Reina á nú þegar. 😉
• Mörk liðsins hafa skipst þannig: Torres (3), Voronin (3), Alonso (2), Kuyt (2), Gerrard, Babel, Crouch, Sissoko, Hyypiä. Fyrir utan Nicolas Anelka hjá Bolton er Torres markahæstur í Úrvalsdeildinni eftir fimm umferðir (hann á líka leik til góða í þeim efnum). Torres er þegar búinn að skora einu marki minna en Andriy Schevchenko skoraði allt tímabilið í fyrra í Úrvalsdeildinni. Torres er búinn að skora jafn mikið og allt Manchester United-liðið í deildinni. Oft er talað um að nýir leikmenn þurfi tíma til að aðlagast ensku deildinni. Það á ekki við hér. 🙂
• Í þessum sex leikjum er Rafa Benítez búinn að nota 20 leikmenn, þar af 18 í Úrvalsdeildinni. Þeir tveir sem hafa bara spilað í Evrópu eru Sebastian Leto og Lucas Leiva.
• Af þessum 20 leikmönnum hafa aðeins tveir spilað hverja einustu mínútu af tímabilinu hingað til; Pepe Reina … og Alvaro Arbeloa. Sem segir mér að sá síðarnefndi sé orðinn lykilmaður í plönum Rafa Benítez.

Úrvalsdeildin

Hvað getur maður sagt? Eftir fimm umferðir er Liverpool FC á toppi Úrvalsdeildarinnar, með einn leik til góða og yfirburða markatölu á við hin toppliðin. Þökk sé stórsigrinum gegn Derby County er liðið með meira en tvöfalt betri markatölu en liðið með næstbestu markatöluna. Það á þó eflaust eftir að jafnast út yfir tímabilið; fyrir það fyrsta eiga Derby-menn eftir að heimsækja hin stórliðin líka, og svo eru fleiri ár síðan við skoruðum meira en bæði Man Utd og Arsenal í deildinni.

Aðalatriðið í þessu er það að við töluðum og töluðum um það í sumar að slæm byrjun í haust, fjórða árið í röð undir stjórn Rafa Benítez, yrði einfaldlega ekki liðin og að afsakanirnar væru uppurnar. Hann fékk að kaupa þá sem hann vildi í sumar og byrjaði með nær heilan hóp í haust og því var kominn tími til að “borga eða þegja”, eins og sagt er. Sem betur fer hefur Rafa borgað sig í þessum fyrstu leikjum og aðeins dómaraskandall ársins hindrar það að liðið sé með 100% sigurhlutfall í öllum leikjum tímabilsins. Við vitum að það er enn mikið eftir af tímabilinu og að það vinnur ekkert lið titilinn í ágúst, en svona byrjun var einmitt það sem liðið þurfti. Menn þurftu að losna við hræðsluna sem fylgir því að byrja illa og fá smá sjálfstraust í kjölfarið. Það er núna komið, enda er nærri því hver eina blaðagrein sem fjallar um Úrvalsdeildina eftir þessa helgi að spyrja sig að því sama: “Getur Liverpool virkilega unnið titilinn?”

Það jákvæðasta við byrjun liðsins í Úrvalsdeildinni er hins vegar spilamennska liðsins. Eins og fram kom hér að ofan hefur Rafa þegar notað átján leikmenn í þessum fjórum deildarleikjum – tveir heima og tveir á útivelli – en það virðist ekki hafa haft nein áhrif á spilamennskuna. Hann stillti upp sama byrjunarliði í fyrsta leiknum úti gegn Aston Villa og heima gegn Chelsea og í báðum leikjum lék það lið virkilega vel og var með öll völd á vellinum. Gegn Sunderland úti hvíldi hann nokkra leikmenn, auk þess sem Gerrard var frá vegna tábrots, og hann varð fyrir því óláni að missa bæði Hyypiä og Carragher útaf meidda í þeim leik. Það kom þó ekki að sök, þar sem þeir leikmenn sem komu inn í staðinn spiluðu í raun ekkert verr heldur en Carra, Gerrard og hinir lykilmennirnir sem voru fjarri góðu gamni. Um helgina spilaði liðið svo án Carra og Gerrard og slátraði Derby County. Það er kannski ekki hægt að lesa of mikið út úr þeim leik, þar sem Derby-liðið var svo lélegt, en fyrir nokkrum árum síðan hefðum við verið í vandræðum með svona lið án Gerrard. Í ár erum við með lið sem er búið að skora tólf mörk í þremur leikjum án fyrirliðans. Það kallast breidd, gott fólk.

Næsti deildarleikur er eftir tólf daga á útivelli gegn Portsmouth. Lið Harry Redknapp tapaði fyrir Arsenal á útivelli um helgina og Chelsea á útivelli í mjög jöfnum leik fyrir viku síðan, en þar áður höfðu þeir m.a. náð jafntefli heima gegn Manchester United. Þeir unnu okkur á Fratton Park á síðasta tímabili, þannig að þetta verður erfiður leikur. Það er þó ljóst að okkar menn munu mæta í þann leik fullir sjálfstrausts eftir sterka byrjun, enda toppliðið í deildinni.

Meistaradeildin

Liðið vann Toulouse, 1-0 á útivelli og 4-0 á heimavelli, og tryggði sér fyrir vikið þátttökurétt í Meistaradeild Evrópu fjórða árið í röð. Búið er að draga í riðla og er Liverpool í riðli A ásamt Porto, Marseille og Besiktas. Fyrsti leikur liðsins er eftir hálfan mánuð, á útivelli gegn Porto.

Í raun má segja að liðið hafi farið í gegnum forkeppnina af meira öryggi nú en þeir eru vanir. Undir stjórn Rafa Benítez hefur liðið tvisvar á þremur árum komið með góða forystu úr útileiknum í seinni leikinn á Anfield og tapað þar 1-0. Því var maður ögn stressaður fyrir heimaleikinn gegn Toulouse, en það reyndist óþarfi. Liðið vann þann leik auðveldlega.

Hvað riðilinn sem er framundan varðar er ljóst að þetta eru þrjú erfið lið sem við erum að fara að mæta. En þannig er Meistaradeildin; menn hafa fyrir því að komast í keppni hinna bestu og hún stæði ekki undir nafni ef menn mættu ekki erfiðum andstæðingum. Þetta eru þrjú lið sem geta öll unnið okkar menn og því er alls ekki öruggt að liðið komist upp úr riðlinum, en eins og liðið hefur leikið í þessari keppni undir stjórn Rafa Benítez og eins vel og liðið er að byrja tímabilið nú í haust getum við vart annað en verið bjartsýnir og hlakkað til þessara leikja.

Hið neikvæða

Í raun er aðeins þrennt sem skilur eftir sig súrt bragð í munni eftir byrjun tímabilsins:

• Rob Styles. Ef hann hefði sinnt starfi sínu værum við með fullt hús stiga í deildinni. En svona er þetta bara stundum. Það er erfitt að sætta sig við að hafa verið rændir tveimur stigum gegn Chelsea, en lífið er ekki alltaf sanngjarnt. Vonandi jafnar þetta sig út yfir leiktíðina, ég mun allavega ekki vorkenna Chelsea ef þeir verða rændir einhverjum stigum í vetur. C’est la vie.
• Meiðsli Carragher og Gerrrad. Þau komu reyndar á góðum tíma, þeir misstu af leikjum gegn Toulouse og Derby á heimavelli og svo tveggja vikna landsleikjahléi, en það er engu að síður slæmt að hafa misst þá einmitt þegar liðið var að komast í spilaform. Vonandi fer Gerrard sér ekki að voða með enska landsliðinu í næstu viku og við fáum þá báða heila inn fyrir næsta deildarleik.
• Pako Ayesteran, hægri hönd Rafa Benítez og hans nánasti samstarfsmaður síðustu ellefu árin, er hættur hjá Liverpool FC. Það skal enginn efast um það að þetta er mikil blóðtaka fyrir Benítez og liðið. Hverjar svo sem ástæðurnar eru skipta ekki öllu máli að mínu mati, það hlýtur að hafa verið eitthvað óleysanlegt fyrst þessir miklu vinir skildu að skiptum á svona mikilvægum tíma fyrir liðið. Nú þarf hins vegar að horfa til framtíðar og vona að þetta muni ekki kosta liðsmóralinn eða álag á Benítez í vetur.

Niðurstaða

Sem sagt, fyrir utan nokkur skakkaföll hefur Liverpool FC undir stjórn Rafa Benítez byrjað tímabilið virkilega vel, betur en maður þorði hreinlega að vona. Liðið er að spila skemmtilegan bolta, skora 2.67 mörk að meðaltali í leik og breiddin virðist vera mikil. Það munar um það að nýju leikmennirnir virðast allir hafa fundið sig strax í liðinu og þá sérstaklega að Torres er að spila eins og þetta sé tíunda tímabil hans hjá Liverpool, ekki það fyrsta. Það er einfaldlega gaman að vera Liverpool-aðdáandi um þessar mundir því eins skemmtilegt og það er að rifja upp glæstar minningar og góða tíma fortíðar, þá er ekkert jafn skemmtilegt í dag og björt framtíð. 🙂

Ég get ekki beðið eftir næsta leik.