Samkeppnin

Það styttist heldur betur í að enski boltinn fari að rúlla að nýju og í næstu viku setjum við líklega inn spá fyrir tímabilið og opnum umræðu á það. En þó það sé alls ekki búið að loka leikmannaglugganum og búist sé við því að öll liðin eigi eftir að bæta hópinn fyrir 31.ágúst langar mig að renna lauslega yfir okkar helstu keppinauta næsta tímabil og sjá hvað hefur gengið á hjá þeim. Hjá okkur virðist bjartsýnin hafa aukist töluvert undanfarið þó hún sé bara sýnishorn af því sem oft hefur verið á þessum árstíma, en er það eins hjá stuðningsmönnum andstæðinganna? (gaman væri að fá þeirra sjónarmið hérna líka).

Við erum að velta fyrir okkur hugsanlegri sölu á klúbbnum í öðrum þræði og höldum henni bara að mestu þar.

Arsenal

Ég er á því að Arsenal hafi alla burði til að fara ansi nærri því í ár að landa titlinum, þeir hafa verið að byggja upp lið undanfarin ár sem er komið á fínan aldur núna. Ljóst er þó að liðið þarf að bæta við sig fyrir tímabilið og líklega verður það nú gert.

Það hefur verið mikið fjallað um það að Liverpool hafi landað stærsta bitanum á free transfer markaðnum en ég er ekki ennþá sannfærður um að Cole toppi Marouane Chamakh sem Wenger landaði í lok síðasta tímabils. Þar er á ferðinni leikmaður sem gæti orðið skuggalegur undir stjórn Wenger og er klárlega mjög mikil bæting á Eduardo sem fór til Úkraínu á dögunum. Eins eiga þeir Robin Van Persie alveg inni og ef hann helst heill er þar á ferðinni einn besti sóknarmaður deildarinnar. Bendtner er síðan enn einn meiðslapésinn sem getur nýst ágætlega ef hann helst heill. Þannig að sóknin er flott hjá Arsenal, betri en í fyrra vil ég meina. Þeir eiga síðan líklega einhverja unga pjakka sem geta spilað sókn en ég þekki það ekki nógu vel utan Theo Walcott sem er bæði kanntur og sóknarmaður.

Aðal fréttaefni þessa árs hefur verið miðjan hjá Arsenal, eða n.t.t. Cesc Fabregas sem virðist ætla að vera áfram hjá liðinu sökum þrjósku Wenger og stjórnar Arsenal sem einfaldlega vill ekki selja hann. Mjög aðdáunarvert hjá þeim að gefa Barca puttann og segja Fabregas að standa við sinn samning enda hafa Barca sett ný viðmið í skítlegum aðferðum við að setja pressu á Fabregas, ég held að allir leikmenn Barca hafi talað um hann í sumar. En Fabregas er klárlega hjartað í þessu liði og einn allra besti leikmaður deildarinnar og mjög mikilvægur liðinu. Ef hann er heill og með hausinn í lagi er Arsenal að fara spila flottann bolta. Fyrir framan hann getum við sett Arshavin sem er frábær leikmaður (besti í heiminum ef hann myndi bara spila við Liverpool). Hann telst auðvitað eiginlega sem sóknarmaður en hvar svo sem þið plantið honum niður þá er þetta leikmaður á heimsmælikvarða. Eins er Nasri fínn leikmaður og sama á við um Vela og þeir eru a.m.k. mjög góðir squad leikmenn.

Ótrúlegt en satt þá virðast þeir ennþá sakna Flamini á miðjunni, Alex Song, Diaby eða Denilson hafa aldrei fyllt þetta skarð ýmist vegna meiðsla eða getuleysis og eru enn á ný spurningarmerki fyrir þetta tímabil, held þó að þetta sé staða sem þeir eru farnir að hafa minni áhyggjur af núna. Eins gæti þetta tímabil orðið stórt fyrir Ramsey en það er leikmaður sem ég tel vera í hárréttu liði fyrir sig, enda Wenger óhræddur að gefa svona ungum pjökkum tækifæri. Þetta er ennþá mjög efnilegur leikmaður ef lappirnar á honum verða ekki kubbaðar niður, aftur.

Bakvarðastöðurnar hjá Arsenal eru í fínu lagi þrátt fyrir að Eboue eitt takmarkaðasta eintak Englands sé back up-ið hægra megin.

En mark og miðverðir gætu orðið aðal vandamál nallara í ár. Úr vörninni skilst mér að Campell og Silvestre séu farnir á braut sem kannski er ekki mesta áfall í sögunni. Eins held ég að Gallas sé farinn og er það öllu verra mál fyrir Wenger að fylla. Að lokum er síðan Senderos loksins farinn. Eftir standa Vermalen sem var mjög góður í fyrra, Djourou sem er alltaf meiddur og Laurent Koscielny sem nýr leikmaður og afar típískur fyrir Wenger. Þ.e.a.s. óþekktur frakki með ágætt profile.

Í markinu er Almunia ótúlegt en satt ennþá málið og Fabianski veitir honum keppni. Klárlega veik staða hjá nöllurum sama hvað þið reynið að tala Almunia upp og hefur t.a.m. Mark Schwarzer verið orðaður við liðið.

Þannig að þetta Arsenal lið er ekki mjög ósvipað og í fyrra, þá lentu þeir í miklu meiðslaveseni en gætu orðið mjög sterkir í ár. Þurfa samt klárlega að versla og það stendur víst til.

Aston Villa

Villa hefur verið klúbbur sem selur leikmenn áður en þeir kaupa og eftir að hafa endaði í topp 6 þrjú ár í röð án þess að vera nógu nálægt meistaradeildarsæti virðist þetta ætla að verða erfitt sumar fyrir þá. Milner sem fyllti skarð Gareth Barry frábærlega í fyrra virðist vera að fara sömu leið nema hvað Milner færi líklega bara á bekkinn hjá City. Eins er Ashley Young orðaður frá klúbbnum og því óljóst hvernig hópurinn verður og þ.a.l. hvað þarf að kaupa mikið í staðin. Þetta eru tveir leikmenn sem báðir teljast sem byrjunarliðsmenn hjá Villa og þar er mun minna róterað með leikmenn heldur en hjá mörgum öðrum liðum.

Þetta er annars alveg sterkur hópur og stjórinn hefur náð að kreista gríðarlega mikið út úr þessu liði. Þeim vantar samt alltaf sóknarmann sem skorar meira en 15 mörk á tímabili og ég á erfitt með að sjá þá bæta sig á þessu tímabili.

Chelsea

Ensku meistararnir hafa styrkt liðið sitt gríðarlega það sem af er þessum leikmannaglugga, Joe Cole er farinn á frjálsri sölu og í staðin hafa þeir keypt Yossi Benayoun!!!! En þetta rándýra lið er auðvitað ennþá fáránlega gott og stjórinn sannaði það strax í fyrstu tilraun á Englandi að hann kann þetta alveg. Þeir hafa losað sig við gamlar kempur eins og Ballack og ekki er vitað með menn eins og Deco en þarna erum við að tala um leikmenn sem voru að komast á aldur.

Vörnin hjá Chelsea hefur verið fáránlega sterk og virðist ekkert breytast mikið í ár, Terry og Carvalho eru ennþá með bestu miðvörðum í heiminum. Alex er sæmilegasta back up alveg. Cashley Cole er einn besti bakvörður í heimi í dag og Ivanovic og Boswinga eru mjög góðir hægramegin. Já svo eiga þeir Yuri Zhirkov uppá að hlaupa.

Á miðjunni eru þeir líklega búnir að endurheimta Essien sem er besti leikmaður í heimi í sinni stöðu þegar hann er heill, án vafa. Lampard við hliðina á honum er mikilvægasti leikmaður liðsins. Malouda og Kalou hafa verið að aðlagast betur í enska boltanum undanfarin ár og eru klárlega góðir leikmenn. Svo verður nokkuð spennandi að sjá hvernig Benayoun passar inn i þetta.

Frammi eru ennþá þeir Drogba og Anelka og báðir eru þeir að komast á aldur. Þeir hafa verið orðaðir við Torres í allt sumar og líklega eigum við eftir að fá ein risakaup frá Chelski núna í ágúst.

Ennþá sama lið og þeir voru í fyrra, að lang mestu leiti. Cole og Ballack væru stórt blow fyrir flest öll lið í heiminum en ég efa að þetta setji Chelsea of mikið út af sporinu.

Everton

Það er í raun nokkuð magnað hvað nágrannar okkar hafa haldist sterkir undanfarin ár og fyrir þetta tímabil eru þeir með nokkuð ágætt lið sem ætti a.m.k. að haldast á svipuðum slóðum og þeir hafa verið undanfarin ár. Helstu fréttir það sem af er þessu ári af leikmannamálum hjá þeim eru þær að þeir misstu Dan Gosling mjög klaufalega frá sér til Newcastle og eins þá keyptu þeir sóknarmanninn Jermaine Beckford sem hefur verið helsta hetja Leeds undanfarin ár og gæti orðið spennandi leikmaður hjá Everton.

Mér finnst margt vera líkt með Aston Villa og Everton og eftir þetta tímabil held ég að Everton verði ofar en Villa.

Howard er reyndur markmaður í EPL og hefur verið góður hjá Everton. Þeir eiga fjóra góða miðverði í Jagielka, Yobo, Heitinga og Distin sem er nýkominn til þeirra. Hibbert hefur síðan verið öflugur hægra megin og Baines vinstra megin.

Fyrir utan fyrirliðann (Neville systirin) þá er miðjan bara mjög öflug hjá þeim, Bilyaletdinov á vinstri kanntinum er góður leikmaður og Osman á hægri er ágætur uppalinn leikmaður (minnir mig). Fellaini, Arteta og Cahill jafnast síðan á við bestu miðjumenn deildarinnar og Pienaar er gott uppfyllingarefni.

Frammi hafa þeir slatta af svona B klassa sóknarmönnum eins og Saha, Beckford, Yakubu og Anichebe sem allir geta verið frábærir þegar sá gallinn er á þeim.

Þeir hafa síðan mjög góðan stjóra og þessir hópur lítur satt best að segja betur út hjá þeim en ég hélt.

Man City

Fyrir ekki svo mörgum árum var City í bullandi fjárhagsvandræðum og fallbaráttu. Þeir höfðu góð not fyrir útbrenda Liverpool leikmenn eins og McManaman og Fowler og voru bara svona temmilega þægilegur nágranni. Núna án  þess að þeir hafi gert nokkurn skapaðan hlut eða getað rassgat í yfir hálfa öld eða svo er verið að orða þá við Torres og Gerrard og því er ekki einu sinni tekið sem gríni. Ég er svosem ekki að saka þá um neitt og staða City er eitthvað sem ég vill sjá Liverpool vera nær því að vera í heldur en við erum núna. En þeir unnu klárlega í lottóinu og þeir, rétt eins og aðrir nýríkir fjárglæframenn eiga allt bögg skilið sem á þá kemur.

Ég nenni ekki einu sinni að fara út í hópinn hjá þeim, hann má sjá hér. Í sumar hafa bæst við óþekktir leikmenn eins og Jerome Boateng leikmaður í HM liði Þjóðverja, Alexander Kolorov vinstri bakvörður sem var á ítalíu sem kom fyrir um 19 millur enda vantar Bridge samkeppni. Að auki kom David Silva einhver heitasti bitinn á markaðnum í mörg ár frá Valencia og Yaya Toure sem var hjá einu besta liði sögunnar. Í fyrra kom bróðir hans fyrir engu minni pening. Þetta er einfaldlega bara bull og ég efa að þetta sé eitthvað sem við púllarar viljum sjá hjá okkar klúbbi, þó við viljum sjá núverandi stöðu stórbætta.

En burtséð frá því þá er ekki hægt að líta framhjá City í ár, þeir bara hljóta að gera helvíti sterka atlögu í ár og ég er nokkuð pottþéttur á að þeir  verða a.m.k. í topp 4 í ár.

Því miður.

Manchester United

Það er ekki mjög gott að sjá fyrir hvernig staðan er á United liðinu í dag, þeir eru í ekkert mikið betri fjárhagsstöðu en Liverpool virðist vera og lítið hefur verið talað um líkleg ofurkaup á þeim bænum þó það sé auðvitað ekkert útilokað. Fyrir þetta tímabil hafa þeir fengið hinn spennandi Hernandez frá Mexíkó og eins hefur Chris Smalling loksins gengið til liðs við liðið og mun hann keppa við Ferdinand, Evans og Vidic um miðvarðarstöðuna. Á móti er Tosic farinn frá félaginu.

Í markinu verður Van Der Sar líklega áfram fyrsti kostur þó hann sé alveg við það að detta inn á Hrafnistu. Vörnin er annars eins og í fyrra nema hvað Smalling og Da Silva bræður koma líklega til með að spila mikið í ár. Neville er orðinn 35 ára og því líklega ekki að fara spila mjög mikið. Það hefur reyndar ekki verið alveg ljóst hvort Vidic verði áfram hjá klúbbnum og líklega fer hann fram á sölu núna fyrst Torres er ekkert að fara frá Englandi.

Ferguson hefur sagt að á þessu tímabili ætli hann að nota mikið af ungum leikmönnum og af þeim er nóg hjá United. Frammi er síðan ennþá Rooney og núna fær hann þennan Hernandez líka ásamt því að Berbatov er þarna ennþá….já og hann Júdas litli.

Maður vanmetur ALDREI United og þetta er klárlega ennþá afar sterkt lið. En það er erfitt að sjá það eins og staðan er í dag að þeir hafi bætt sig mikið það sem af er fyrir þetta tímabil. En þeir hafa haldið stöðugleika hjá klúbbnum og allir leikmenn sem þar eru vita að hverju þeir ganga, kannski dugar það. Giggs og Shcoles verða líklega í minna hlutverki í ár og því spennandi að sjá hvort ungdómurinn geti tekið við keflinu.

Tottenham

Loksins tókst Spurs að stíga skrefið og ná í meistaradeildina, við bara gátum ekki gefið þeim betri séns og þeir nýttu hann vel. Augljóslega er þetta mjög gott lið og með góðan stjóra en þeir hafa ennþá ekki svo ég viti bætt neinu merkilegu við hópinn, ekki frekar en þeir hafa selt frá sér leikmenn.

Í markinu verður Gomes sem er frábær markmaður þegar hann er með sjálfstraustið í lagi, stórkostlegur þegar það er ekki í lagi btw.

Í vörninni hafa þeir tvo góða í hverja stöðu þó óneitanlega sé erfitt að treysta á leikmenn eins og Woodgate og King, sérstaklega á CL tímabili.

Miðjan er afar öflug og ef Modric helst heill eru þeir þar með einn besta leikmann deildarinnar. Tímabilið gæti líka verið mikilvægt fyrir Huddelstone, Jenas, Lennon og Bentley. Svo voru Palacios og Kranjcar báðir stórir póstar á síðasta timabili og ættu að vera það í ár líka. Það var t.d. bara glæpur hvað þeir fengu Kranjcar ódýrt.

Hvað sóknina varðar þá skil ég ekki alveg hvað þeir eru að spá. Peter Crouch er sterklega orðaður í burtu og Keane var nú á láni í fyrra þannig að þá eru bara Defoe og Pavlyuchenko eftir. Persónulega myndi  ég ekki hrófla mikið til þarna, Eiður Smári fyrir Keane kannski en ég sé ekki mikla þörf á að bæta við.

Spurs verða allavega klárlega sterkir þó ég geri sterklega ráð fyrir því að þeir komi til með að finna fyrir því að þeir eru í meistaradeildinni í ár. Þeir eiga afar líklega eftir að bæta eitthvað við hópinn á næstu dögum.

Sum up:

Arsenal ætti að vera nokkuð sterkara í ár, Villa gæti átt erfiðara ár framundan, Chelsea verða svipaðir og er klárlega ekki búnir að segja sitt síðasta á markaðnum í ár. Everton gætu bætt sig frá síðasta tímabili á meðan City er bara bull og verður klárlega mun sterkara í ár. United er á svipuðum stað og gætu orðið spennandi með þessa ungu pjakka sem verið hafa hjá þeim undanfarin ár og eru að verða tilbúnir skv. Rauðnef. Spurs gætu síðan lent í smá veseni vegna álags og aukinnar pressu en hafa alla burði til að verða mjög sterkir áfram.

Vonandi verður þetta bara ekki þannig aftur að við óskum þess heitast að tímabilið verði flautað af eftir 9 mánaða þrautargöngu.

Þetta er auðvitað alls ekki tæmandi upptalning og vafalaust gleymi ég einhverju, en það er ljóst að baráttan er orðin alveg svakalega hörð og Liverpool þarf breytast mikið til að detta ekki afturúr.

Babú