Allir vegir liggja til…Southampton?

Grasið er grænt, vatn er blautt og Liverpool ætlar að kaupa dýran leikmann af Southampton. Já, þeir eru nokkrir hlutir í heiminum sem maður getur treyst á að muni aldrei nokkurn tíman breytast sama hvað við reynum að telja okkur trú um að það muni gerast.

Adam Lallana, Rickie Lambert, Dejan Lovren og Nathaniel Clyne hafa allir farið hið fræga ferðalag á milli Southampton og Liverpool til að undirrita samning og nú virðist margt benda til þess að Sadio Mane eigi að vera sá fimmti á nokkrum árum til að fara þessa fræknu för.

Það hefur lengi verið hlegið eða grátið af þessari stefnu Liverpool að kaupa alla þessa leikmenn frá Southampton en það virðist vera eitthvað sem truflar félagið ekki neitt og virðist ekki eiga að bregða út af vananum.

Við skulum samt halda niður í okkur andanum og bíða með að gleðjast eða reiðast yfir kaupum á Sadio Mane en slúðrið virðist vera að hitna og því verður maður að taka þetta fyrir. Sérstaklega þar sem þetta gætu orðið ein af dýrustu kaupunum í sögu Liverpool ef af þeim verður.

Nú hefur Liverpool keypt eins og áður segir fjóra leikmenn frá Southampton á síðustu árum og eru þeir, enn í dag, að skipta stuðningsmönnum Liverpool upp í tvo hópa. Annað hvort eru menn að kunna vel að meta þessa leikmenn og kaupin á þeim eða mönnum finnst það hafa verið dauðsynd að fjárfesta í þeim.

Þegar við rýnum aðeins í þessi fjögur kaup þá held ég að allir geti líklega sammælst um að öskubuskuævintýrið með Rickie Lambert hafi ekki endað eins og í Disney sögu svo það er þá að minnsta kosti eitt þeirra sem hefur án nokkurs vafa klúðrast. Á hinn bóginn virðast tólf milljónda punda kaup Liverpool á Nathaniel Clyne hafa verið mjög góð og Liverpool fékk afar góðan bakvörð á fínum aldri á tiltölulega lítinn pening. Allir sammála um að það hafi verið bara hin ágætustu kaup? Ok, flott höldum áfram.

Þau tvö sem eru mikið hitamál fyrir stuðningsmenn félagsins eru kaupin á Adam Lallana og Dejan Lovren sem báðir kostuðu yfir tuttugu milljónir punda. Til að byrja með náðu þeir ekki beint að brillera frá fyrsta degi, Lovren gekk illa að finna sig og gerði mörg slæm – sum jafnvel alveg ævintýraleg – mistök í vörninni og varð gerður nokkurs konar táknmynd að falli Liverpool úr toppbaráttu niður í meðalmennskuna. Lallana meiddist á undirbúningstímabilinu, kom frekar seint til baka og virtist lengi vel þurfa að vinna upp tapaðan tíma hvað varðar líkamlegt form og þess háttar og kemur inn í lið sem var ekki á góðum stað.

Þeir virðast þó með tímanum spyrna sér í botninn og byrja að sýna sín réttu andlit. Lallana fór að spila með meira og betra sjálfstrausti og hlutirnir fóru að ganga betur fyrir hann og Lovren fór að finna aftur sjálfstraustið sem hann virtist hafa tapað. Báðir virtust átta sig á þyngslunum sem það að klæðast merkjum Liverpool getur haft í för með sér og efldust við það.

Í ár, sérstaklega eftir að Klopp tók við af Brendan Rodgers, hafa þeir unnið sig upp í lykilhlutverk í liðinu og jafnvel fengið mikla efasemdarmenn til að breyta um skoðun. Lallana virðist vera orðinn einn af mikilvægari hlekkjum í sóknar- og varnaraðferðunum sem Klopp vill sjá lið sitt nota og hefur hann ekki farið leynt með aðdáun sína og þakklæti á hans hæfileikum. Dejan Lovren hefur komið inn í hjarta varnarinnar og verið feykilega öflugur ásamt Mamadou Sakho og verður líklega áfram með sæti sitt í upphafi næstu leiktíðar.

Persónulega er ég mikill stuðningsmaður þeirra Lovren og Lallana svo ekki láta það koma ykkur á óvart ef ykkur finnst þessi umfjöllun mín á þeim eitthvað smá lituð. Ef þið eruð ekki enn farin að meta eiginleika þessara leikmanna og sætta ykkur við kaup Liverpool á þeim þá skal ég rökræða það við ykkur við betra tækifæri!

Þá að Sadio Mane aftur. Miðað við, að mínu mati, vel heppnuð kaup Liverpool á leikmönnum frá Southampton þá verð ég að viðurkenna að það að Liverpool gæti keypt hann frá þessu liði truflar mig ekki mikið. Þarna er á ferð hörku kantmaður á besta aldri sem hefur hraða, tækni, staðsetningar og tímasetningar á hlaupum í miklum klassa, hann er fínn í pressunni og fyrst fremst er hann mjög mikil ógn fyrir framan mark andstæðingana – bæði hvað stoðsendingar og mörk varðar.

Það eru að sjálfsögðu enn hlutir sem hann þarf að vinna í og bæta en það eru flestir leikmenn þannig. Ég er nokkuð spenntur fyrir Mane – þó hann sé nú ekki stærsta nafnið í bransanum þá er hann líklega einhvers staðar í flokkunum þar rétt á eftir og hefur enn svigrúm til að verða enn þá betri, sérstaklega ef hann nær ögn meiri stöðugleika í leik sinn.

Takist Liverpool að fá hann í sínar raðir þá verð ég mjög ánægður með það og afar spenntur að sjá hann spila fyrir okkur undir stjórn Jurgen Klopp. Fókusum á því sem hann gerir fyrir liðið frekar en kaupverð, dæmum hann eins og við ættum að gera með Lallana, Lovren og fleiri.

Við sjáum hvað setur í þessum málum en eitt er víst að allir vegir Liverpool virðast einhvern veginn alltaf leiða aftur til Southampton.