Swansea á morgun

Swansea mætir á Anfield á morgun og er staða liðanna ansi ólík fyrir leik. Partýið virðist vera búið í Wales og liðið hefur verið á hraðri niðurleið á þessu tímabili. Tíð þjálfaraskipti hafa ekkert hjálpað til og satt að segja er erfitt að sjá fyrir sér að þeir bjargi sér úr þessu. Ekki að það sé vonlaust, þeir eru bara stigi frá 17.sæti og liðin í kring eru svosem svipað léleg.

Fyrri leikur liðanna var einn erfiðasti leikur Liverpool á þessu tímabili og má segja að okkar menn hafi rétt náð að merja sigurinn þar. Stjórinn var rekinn í kjölfarið og eftir það hefur botninn endanlega dottið úr leik liðsins. Bandarískir eigendur liðsins réðu Bob Bradley, samlanda sinn en hafa nú rekið hann aftur.

Swansea hefur fengið á sig þrjú mörk eða meira í sjö af síðustu tíu leikjum sem segir mikið til um hversu illa liðið saknar Ashley Williams í vetur. Þeir hafa fengið á sig 49 mörk það sem af er tímabili sem er jafn mikið og Liverpool er búið að skora í vetur. Paul Clement fyrrverandi stjóri Derby tók við liðinu fyrir Arsenal leikinn og þrátt fyrir ágæta spilamennsku á köflum í þeim leik tapaðist sá leikur 0-4. Ágæta spilamennsku segi ég en það eru meira orð Jurgen Klopp frekar en mín. Hann sagði á blaðamannafundi fyrir leik að hann hefði sjaldan séð eins mikla bætingu á einu liði á eins stuttum tíma en satt að segja veit ég ekki hvert hann er að fara með því enda skíttapaði Swansea leiknum.

Klopp: "We don't only watch results, we watch performances, so we know about their quality."

— This Is Anfield (@thisisanfield) 20 January 2017

Gylfi Sig er þeirra langbesti leikmaður í dag en hann hefur lengst af í vetur verið að spila sem fremsti miðurmaður eða nánast sem sóknarmaður. Hann er auðvitað frábær í þeirri stöðu og hefur komið með beinum hætti að rétt tælpega helmingi marka liðsins, en það er spurning hvort kraftar hans væru ekki betur nýttir aftar á vellinum eins og við þekkjum úr landsliðinu.

Frammi eiga þeir síðan alvöru sóknarmann í Llorente og er spurning hvað þeir halda honum lengi. Ótrúlegt hvað þetta lið er búið að veikjast hratt á skömmum tíma og algjör synd að Gylfi sé að eyða sínum bestu árum í ekki betra liði.

Ekki að þetta sé bókaður sigur hjá Liverpool, það er helst gegn þessum liðum sem okkar menn hafa verið að hiksta og er fyrri leikur liðanna ágæt viðvörun.

Gylfi Sig verður samt alls ekki eini Íslendingurinn á Anfield á morgun. Líklega hafa sjaldan verið eins margir Íslendingar í einu í Liverpool. Kop.is er með 70 manna ferð og við vitum af fjölmörgum öðrum á þessum leik. Ljóst að það verður töluvert partý í kvöld og annað kvöld, hjá öllum nema auðvitað Kristjáni Atla sem verður farinn að sofa 21:30, á slaginu.

Við hvetjum annars þá Íslendinga sem eru úti að nota #kopis á samfélagsmiðlum til að leyfa okkur hinum að vera með, við lofum að blóta ykkur að mestu bara í hljóði.

Staðan á okkar hóp er aðeins að skána miðað við undanfarnar vikur en eins og Klopp sagði á blaðamannafundunum fyrir leikinn þá hefur ekkert af toppliðunum lent í eins miklu veseni og Liverpool undanfarið, hann bætti einnig við að liðið hefði staðið sig ágætlega þrátt fyrir það.

Coutinho spilaði klukkutíma gegn Plymouth gagngert til að spila sig í form, hann hefur ekki byrjað leik síðan Kop.is fór síðast á Anfield og því við hæfi að hann komi aftur inn í byrjunarliðið (í deildarleik) núna um helgina enda Kop.is mætt aftur.

Clyne byrjar að æfa aftur í dag og er talinn líklegur fyrir morgundaginn, Henderson er einnig klár en hann finnur að sögn Klopp ennþá fyrir hælmeiðslunum sem hafa verið að plaga hann undanfarin ár og er það vægast sagt gríðarlegt áhyggjuefni. Við fáum nánast ekkert break frá meiðslum eða annarskonar fjarvistum hjá okkar lykilmönnum.

Mál Joel Matip er ekki ennþá komið á hreint þegar þetta er skrifað, fáránlegt mál frá upphafi til enda en lítið hægt að gera á meðan FIFA er með buxurnar á hælunum stamandi stanslaust í símann.

Sadio Mané var síðan alls ekki að skilja memo-ið. Hann er langbesti leikmaður Senegal og voru þeir fyrsta liðið til að tryggja sig áfram upp úr riðlunum í Afríkukeppninni, fari það í kolbölvað bara. Held að ég hafi aldrei haldið eins lítið með neinu liði.

Það verður því spennandi að sjá hvað Klopp gerir á morgun í fjarveru Mané enda nokkrir möguleikar í stöðunni. Byrjunarliðið ætla ég að skjóta á að verði eitthvað á þessa leið.

Mig grunar að Clyne verði ekki hent beint í byrjunarliðið og Trent Alexander-Arnold haldi sæti sínu í þessum leik. Matip ætti að koma beint inn fái hann leikheimild. Miðað við blaðamannafund Klopp held ég að Henderson sé einnig frekar tæpur og verði á bekknum í þessum leik.

Endurkoma Coutinho gerir það að verkum að Lallana ætti að fara aftur á miðjuna sem er hans besta staða. Firmino ætti að vera öruggur með sitt sæti en óvissan verði helst um það hver kemur inn fyrir Mané. Ég ætla að tippa á Sturridge, hann var reyndar alls ekki góður gegn Plymouth en var tekinn af velli öfugt við Origi sem gæti bent til þess að Klopp hafi verið að spara hann fyrir leik helgarinnar.

Spá: Sama hvernig við stillum þessu upp þá á Liverpool að vera með meira en nóg í sínu vopnabúri til að vinna Swansea og kominn tími til að liðið vinni leiki aftur sannfærandi. Þetta hefur verið allt of mikið maus undanfarið en lagast vonandi núna með endurkomu Coutinho. Spái að þetta fari 4-2 í fjörugum leik.