Upphitun: Brighton mæta á Anfield

Þá er komið að heimaleik númer 2 á tímabilinu, og í þetta sinn mæta lærisveinar Chris Hughton – öðru nafni United banar síðustu umferðar – og freista þess að ná stigi eða stigum á Anfield. Sagan er þeim þó ekkert sérstaklega hliðholl, a.m.k. ekki ef síðustu ár eru skoðuð, því Brighton fór síðast með 3 stig frá Anfield þegar Ronald Reagan var forseti Bandaríkjanna, Centerford með J. Geils band var efst á Billboard listanum, Falklandseyjastríðið var rétt óhafið, og Jarmilla Kratosvilova var fljótust í 400m hlaupi kvenna. Í þeim leik sem fór fram þann 6. mars árið 1982 (fyrir þau ykkar sem voruð ekki búin að átta ykkur á árinu nú þegar) skoraði Andy Ritchie sigurmarkið á 40. mínútu, en ástand vallarins var slíkt að Ian Rush hefði átt að jafna þegar hann skaut boltanum á autt markið en boltinn stoppaði í drullusvaðinu fyrir framan markið. Það kann e.t.v. að þykja svartsýni og bölmóður að rifja upp svona leiki, en á móti verður að líta á það að Liverpool vann deildina þetta árið – og það næsta. Reyndar urðu Ipswich í öðru sæti, svo það er óhætt að fullyrða að staðan hafi örlítið breyst síðan þá.

Ef síðustu 5 leikir liðanna í öllum keppnum eru skoðaðir mætti svosem halda að þetta verði bara létt æfing fyrir okkar menn. Í þessum leikjum hefur Liverpool skorað 20 mörk en Brighton 5. En eins og úrslit síðustu helgar sýna okkur, þar sem Brighton sáu til þess að United menn fóru stigalausir frá Falmer Stadium, þá er þetta lið sem getur alveg spilað fótbolta og unnið leiki.

Andstæðingarnir

Eins og kunnugt er kom Brighton aftur upp í Úrvalsdeildina fyrir síðasta tímabil eftir að hafa síðast verið í efstu deild leiktíðina 1982-1983. Það voru svosem ekki margir sem reiknuðu með því að liðið héldi sér uppi, t.d. spáðum við kop.is pennar liðinu samtals í 19. sæti í spánni sem við gáfum út fyrir ári. En liðið gerði gott betur en það, og endaði í 15. sæti. Sætið í deildinni var tryggt fyrir síðasta leik liðsins, sem var einmitt á Anfield, og fór 4-0 eins og ætti að vera okkur í fersku minni, þar bæði Solanke og Robertson opnuðu markareikninga sína hjá félaginu.

Brighton sátu ekki aðgerðalausir í sumarglugganum eins og sumir. Eitthvað var um það að leikmenn væru keyptir en lánaðir strax til annarra liða. Eftirfarandi leikmenn hafa síðan bæst í hópinn:

• Florin Andone, sóknarmaður frá Deportivo la Coruna
• Bernardo Fernandes, varnarmaður frá RB Leipzig
• David Button, markvörður frá Fulham
• Bissouma, miðjumaður frá Lille
• Alireza Jahanbakhsh, vængmaður frá AZ Alkmaar
• Anders Dreyer, vængmaður frá Esbjerg
• Martin Montoya, bakvörður frá Valencia

Íranski leikmaðurinn Alireza Jahanbakhsh er jafnframt dýrasti leikmaður sem Brighton hefur keypt, og kom á kringum 17m punda. Af þessum leikmönnum var þó Montoya sá eini sem rataði í byrjunarliðið í síðasta leik, en Button, Bissouma, Bernardo og Jahanbakhsh voru allir á bekknum. Bernardo byrjaði þó inná í fyrsta leik liðsins á tímabilinu, þar sem liðið tapaði fyrir Watford 2-0 á útivelli.

Það virðist vera ólíklegt að Hughton nái að stilla upp sama liði eins og vann United, því Lewis Dunk yfirgaf völlinn á hækjum eftir þann leik. Leiðinlegt, því maður hefði alveg verið til í að sjá þríeykið Bong-Duffy-Dunk á Anfield. Það er þó ekki algjörlega útilokað að hann verði leikfær.

Jæja, nóg um andstæðingana. Þetta var farið að hljóma eins og pistill í hópnum “Algjörlega óáhugaverðar fótboltaupplýsingar” á Facebook.

Okkar menn

Það eru engar stórfréttir af okkar mönnum. Þeir leikmenn sem eru í langtímameiðslum eru Chamberlain og Brewster, við megum teljast heppin ef Chamberlain sést eitthvað á þessu tímabili, og Brewster kemur örugglega ekki til með að sjást fyrr en undir lok ársins. Þá er Lovren ekki ennþá farinn að æfa með liðinu, og á blaðamannafundinum fyrir leikinn talaði Klopp um að hann reiknaði ekki með honum fyrr en eftir landsleikjahlé í fyrsta lagi. Aðrir leikmenn virðast vera bara í góðu lagi. Matip er kominn aftur eftir meiðsli, sem veitir ekki af enda ekki um auðugan garð að gresja í miðvarðarmálum. Fyrir vikið fékk Nat Phillips að spila með U23 liðinu sem gerði 1-1 jafntefli við City í kvöld (föstudagskvöld). Klavan er farinn eins og kom fram í síðustu upphitun, og Karius er væntanlega bara rétt ófarinn. Einhverjar þreifingar voru á milli Liverpool og Dortmund varðandi Origi, en það ku hafa dottið upp fyrir, svo Klopp sér alveg eins fyrir sér að halda honum, en ef svo fer myndi Solanke líklega fara á lán. Og já klúbburinn reiknar með að Markovic sé á útleið, sem er bara sama leið og hann er búinn að vera á síðastliðin 2 ár.

Af öllu framansögðu held ég að Klopp sé einfaldlega ekki að fara að rugga bátnum neitt, og muni væntanlega bara hlaða í sama byrjunarlið og í fyrstu tveim leikjunum:

Ef ég ætti að veðja á einhverja breytingu, þá væri það einna helst að Henderson komi inn, og þá annaðhvort fyrir Milner eða Winjaldum, en ég ætla að spá þessu svona. Klopp talaði reyndar um það á blaðamannafundinum að það væri alls ekkert víst að liðið haldist óbreytt. Kannski er hann þar að blöffa.

Það hverjir komist á bekkinn er kannski aðeins meira spennandi. Ég ætla að skjóta á þennan bekk:

Mignolet, Clyne, Matip, Fabinho, Lallana, Shaqiri, Sturridge

Þetta myndi þýða að eftirfarandi væru utan hóps: Moreno, Origi, Solanke, auk svo auðvitað þeir sem eru meiddir.

Og úrslitin? Það er rosalega freistandi að spá því að liðið nái að setja 3-4 mörk, sem ætti ekki að vera svo ólíklegt ef við horfum á síðustu leiki. Nú og svo fer liðið okkar ekki að valda #kopis pennunum sem verða á leiknum vonbrigðum, er það nokkuð? Segjum 3-0 og allir sáttir.