Spurs mæta á Anfield

Þessu blessaða landsleikjahléi er lokið! Dýrð sé guði í upphæðum og friður á jörðu og velþóknun yfir mönnunum. Eða eitthvað svoleiðis. Reyndar verðum við að bíða fram til 15:30 á sunnudaginn að sjá okkar menn rölta út á Anfield, en þá mætir Mauricio Pochettino með lærisveina sína í heimsókn. Okkar menn geta með sigri í leiknum náð aftur toppsætinu af City eftir hádegisleikinn hjá þeim í dag.

Landsleikjahléið

Okkar menn virðast koma nokkuð vel undan vetri. Trent þurfti að yfirgefa herbúðir Englands og fara aftur á Melwood vegna meiðsla í baki, en þetta eru meiðsli sem hafa verið að hrjá hann undanfarið og komu ekki til vegna veru hans með landsliðinu. Shaqiri þurfti líka að yfirgefa herbúðir síns landsliðs vegna óljósra meiðsla í nára. Lovren náði 90 mínútum með sínu landsliði, og Henderson kom inná í leik fyrir England. Þremenningarnir Brewster, Gomez og Oxlade-Chamberlain eru allir á réttri leið með sín meiðsli, og eru allir mættir til æfinga. Brewster lék fyrri hálfleikinn með U23 í gær og skoraði reyndar ekki nema tvö mörk.

Andstæðingarnir

Nú er loksins farið að spila knattspyrnuleiki á nýja leikvanginum þeirra, reyndar bara æfingaleikir til að prófa öll kerfin og til að sjá hvort allt virkar áður en alvaran skellur á, svo það er örugglega ákveðinn léttir fyrir klúbbinn. Breytir svosem litlu um þennan tiltekna leik, þar sem hann er jú spilaður á Anfield. Eins og gengur eru auðvitað einhver meiðsli í hópnum, t.d. er líklegt að hvorki Harry Winks né Eric Dier spili leikinn, og Aurier virðist vera tæpur sömuleiðis, en að öðru leyti ættu allir þeirra menn að vera heilir. Reyndar er Spurs sá klúbbur sem á hvað fæsta leikmenn á sjúkralistanum í augnablikinu, á meðan United er með flesta. Nóg um það. Þetta lið er með hörkuleikmenn í hverri stöðu, og því skiptir ekki öllu máli hvernig þeir stilla upp, þeir munu mæta með gríðarsterkt lið á morgun.

Staða Spurs í deildinni er sú að liðið er núna 16 stigum á eftir fyrsta sætinu, en það er ekkert svo langt síðan að liðið var alveg við toppinn og var talað um það sem líklegan kandídat í baráttuna um titilinn í vor. Úr þessu er slíkt ólíklegt, ef eitthvað slíkt á að gerast þurfa bæði Liverpool og City að tapa ansi mörgum stigum í þessum síðustu umferðum. Liðið mun því líklegast vera að slást um 3-4 sætið úr þessu, og gæti mögulega farið jafnvel enn neðar ef stigasöfnunin verður eitthvað ámóta og hún er búin að vera núna síðustu vikur. Þannig hefur liðið aðeins unnið einn af síðustu fimm leikjum, og tapað þrem. Vonum bara að þetta form hjá þeim haldist út helgina a.m.k., en eftir það mega þeir alveg fara að braggast, sérstaklega þann 20. apríl þegar þeir mæta á Etihad.

Staðan á liðinu

Það ku víst vera búið að gefa út “provisional squad” fyrir leikinn. Sá hópur inniheldur hvorki Gomez né Oxlade-Chamberlain, og það ætti svosem ekki að koma neitt á óvart, enda eru þeir félagar bara nýbyrjaðir að æfa. Klopp talaði meira að segja um það að hann hefði líklega hent Ox aðeins of snemma út í laugina með því að láta hann spila þennan hálfleik fyrir U23 liðið. A.m.k. talaði hann um að taka hann aðeins úr sviðsljósinu á næstu vikum, en það kæmi sjálfsagt ekki á óvart ef hann sæist á bekknum í einhverjum af lokaleikjum tímabilsins. Það sem vekur hins vegar meiri athygli er að Keita er ekki í þessum hóp, og gæti verið að díla við einhver meiðsli, þó hann hafi reyndar sést á æfingum í vikunni. Ekki alveg ljóst hvert málið er með hann.

Það má segja að helsta spurningamerkið sé ástandið á Trent, hvort hann verði látinn spila eða ekki. Við skulum gera ráð fyrir að svo verði, en líklegast er að Milner taki hans sæti ef hann verður ekki metinn leikfær. Líkleg uppstilling er því eitthvað á þessa leið:

Bekkur: Mignolet, Moreno, Lovren, Milner, Henderson, Sturridge, Origi

Já góðir hlustendur, hver veit nema Lallana fái sénsinn aftur á morgun. Kannski er það rangt mat, en hann fékk tvær vikur án þess að þurfa að standa í einhverju landsleikjaveseni, á meðan t.d. Henderson fékk ekki sömu hvíldina. Sjáum til hvað Klopp gerir á morgun.

Undirritaður ætlar að gerast svo djarfur að spá okkar mönnum sigri í leiknum (við spáum reyndar nánast alltaf sigri í þessum upphitunum okkar, svo þetta ætti nú tæpast að koma á óvart!). Það er þó alveg ljóst að leikurinn verður erfiður, leikirnir gegn Tottenham hafa nánast alltaf verið það (nema náttúrulega leikurinn tímabilið 2013-2014 þegar meira að segja Flanagan skoraði). Við skulum því spá að leikurinn endi 2-1, þar sem Mané og Wijnaldum skori mörkin, en Tottenham nái að svara fyrir sig með stórglæsilegu sjálfsmarki frá Matip. Hver veit, kannski nær Alisson að verja, og þá fer þetta 2-0. Ég væri jafnvel sáttari við það.

Sjö leikir eftir í deild. Nú er að duga eða drepast.

KOMA SVO!