Vikulokin – Eina liðið með fullt hús

Fyrsti stórleikur tímabilsins hjá okkar mönnum var enn einn þægilegur heimasigurinn gegn Arsenal og með honum er ljóst að Liverpool endar þriðju umferð í efsta sæti, eina liðið með fullt hús stiga. Man City er komið í annað sætið og spurning hvort þau fari nokkuð úr þessum efstu tveimur sætum það sem eftir lifir móts?

Það er stundum ágætt að staldra aðeins við og njóta þess hversu fáránlega gaman það er að eiga Liverpool lið sem er þetta miklu betra en Arsenal, stórsigur á móti þeim er ekkert tiltökumál og þessi var síst of stór. Það var engu líkara en að George Graham hefði tekið við liðinu aftur enda mættu þeir á Anfield til að pakka í vörn með tvo fljóta hlaupara frammi. Emery hefur verið gagnrýndur fyrir að spila með tígulmiðju og skilja eftir rosalegt pláss fyrir bakverði Liverpool en málið er að sama hvernig hann hefði lagt þetta upp hefði Liverpool líklega fundið leið til að láta þá ákvörðun líta illa út. Það besta við að vinna Arsenal svona afgerandi er að stuðningsmenn þeirra voru nokkuð sáttir með frammistöðu sinna manna (þannig séð) og ekki stærra tap. Það er ekkert svo langt síðan hlutiskipti þessara liða var á hinn vegin.

Það vantar vissulega nokkra lykilpósta í lið Arsenal og þeir ættu þrátt fyrir þennan ósigur að geta gert góða atlögu að Meistaradeildarsæti. Framlínan er alvöru, miðjan er ekkert algalin en vörnin er það hinsvegar, sérstaklega án Bellerin og Kolasinac.

Maður leiksins var klárlega Maggi okkar sem var gestur í setti Símans með Einari Erni Jónssyni Arsenalmanni. Leikur Liverpool var í kjölfarið á leik United fyrr um daginn og var unaðslegt að sjá bitra stuðningsmenn þeirra væla í fullri alvöru yfir því að fulltrúi Liverpool í setti væri merktur sínu liði (á verulega látlausan hátt).

Man City ætlar að verða álíka áhugavert og á síðasta tímabili, nenni ekki fyrir mitt litla líf að horfa á þessa leiki hjá þeim en sá vissulega þennan rosalega hamar frá Harry Wilson gegn þeim úr aukaspyrnu. Sá er að byrja flott í Úrvalsdeildinni, strax kominn með tvö mörk úr langskotum. City sundurtætti Tottenham um síðustu helgi en tókst samt að tapa stigum sem er frábært mál en það er ljóst að þeir munu ekkert gefa eftir í vetur.

Ole Gunnar Solskjaer missti aðeins tökin á stýrinu um helgina og hjólaði ofan í skurð. Hann er í töluverðum mótvindi með United liðið um þessar mundir og hefur aðeins unnið þrjá af síðustu tólf leikjum liðsins. Það er grafalvarlegt og ljóst að hann má ekki við öðrum fjórum stigum af níu mögulegum úr næstu þremur leikjum. Tveir af þeim eru úti gegn Southamton og West Ham en á milli eiga þeir heimaleik gegn Leicester.

Jafntefli úti gegn Wolves er engin hörmung í dag, Úlfarnir eru að hirða fullt af stigum af toppliðunum en leikurinn gegn Palace gat ekki verið mikið meira pirrandi fyrir United menn. Þeir voru svo hrottalega að yfirspila Hodgson og félaga fyrstu 25 mínúturnar að ég setti fimm pund á að þeir yrðu búnir að skora fyrir 40.mínútu. Þá loksins komast Palace í fyrsta skipti yfir miðju (eftir útspark), Lidelof tapaði skallaeinvíginu og Maguire kunni ekki rangstöðuregluna, BOOM, 0-1.

Það er segir svo töluvert um gengi United núna undanfarið að þeim tókst að tapa leiknum þrátt fyrir að hafa jafnað á 88.mínútu. David De Gea alls ekki með merkilega takta þar þó hafa beri í huga að varnarmenn United voru ekkert að hjálpa honum. Málið er að þetta eru færin sem hann var alltaf að verja og var fullkomlega óþolandi góður.

James was minding his own business, celebrating and wasting time to get a draw, Rashford and Martial pulled him back to secure the L. pic.twitter.com/ArEmLRIcno

— Vinay (@semperfiutd) August 25, 2019

Everton tapaði föstudagsleiknum gegn nýliðum Aston Villa sem var hressandi en Tottenham toppaði það með því að tapa heima gegn Newcastle sem fellur í vor. Hrikalega vont tap hjá Spurs eftir sterkan punkt gegn Man City síðustu helgi. Þeir eru þar með strax komnir fimm stigum á eftir Liverpool. Enginn munur auðvitað en ekki gott eftir þrjár umferðir.

Þetta var helgi upp á 9,0 og ljóst að tímabilið fer eins vel af stað og maður þorði að vona. Liverpool á auðvitað mikið meira en nóg inni, þó það nú væri í lok ágúst.

Minnum að lokum á Facebook síðu Kop.is. Ætlum vera töluvert virkari á okkar samfélagsmiðlum á þessum tímabili þannig að endilega fylgið okkur þar líka. Vorum einmitt í kvöld að klúðra tæknimálum fyrir live útsendingu á Facebook sem vonandi verður komið í lag annað kvöld. Óli Haukur er sveittur að finna út úr þessu.