Monterrey 1 – 2 Liverpool

Liðið okkar heldur áfram að vinna leiki 2-1, þessi leikur í kvöld engin undantekning þar á, og ég veit ekki af hverju við efuðumst fram undir 90. mínútu.

Mörkin

0-1 Keita (12. mín)
1-1 Funes Mori (14. mín)
1-2 Firmino (90. mín)

Gangur leiksins

Leikurinn fór nokkuð rólega af stað, en eftir rúmar 10 mínútur kom fyrsta markið, Salah var aðal arkitektinn að því með því að renna boltanum í hlaupaleið Keita beint inn á teig, Keita var dauðafrír og gerði allt hárrétt. 0-1, og maður vonaði að þetta væri bara forsmekkur að því sem koma skyldi. En það liðu bara rétt rúmar 2 mínútur þangað til Monterrey voru búnir að jafna. Aukaspyrna á miðjum vallarhelmingi okkar, fyrirgjöf inn á teig sem tókst ekki að hreinsa almennilega, boltinn barst að markteigshorni og þaðan kom skot sem Alisson varði, en beint í lappirnar á Funes Mori sem var á markteig einn og óvaldaður, og gerði engin mistök. 1-1 eftir korter, og fleiri mörk voru svo ekki skoruð í hálfleiknum. Færin til þess voru þó vissulega til staðar. Milner komst einn upp að markteig en lét verja frá sér, og þegar var farið að nálgast hálfleik komst Keita aftur einn innfyrir eftir sendingu frá Salah, en markvörðurinn kom út og náði að veiða boltann af löppunum á honum. Monterrey fengu líka sín færi, en Alisson var vandanum vaxinn í öllum tilfellum.

Í síðari hálfleik hélt sama sagan áfram. Monterrey vörðust vel, okkar menn fundu sig alls ekki. Í raun voru afskaplega fáir að spila á venjulegri getu, helst hægt að nefna Alisson, Keita og e.t.v. Robertson. Salah ágætur í fyrri hálfleik en síðri í þeim seinni. Sá fyrsti til að víkja af velli var Shaqiri, hans frammistaða var ekkert endilega sú lélegasta af okkar mönnum, en afar gleymanleg frammistaða þrátt fyrir það. Mané kom inná í stað hans og byrjaði strax að valda usla, án þess þó að búa til afgerandi færi. Næst fór þúsundþjalasmiðurinn James Milner af velli í sínum 200. leik, og inná kom Trent. Þegar 5 mínútur voru til leiksloka kom svo síðasta skiptingin, Origi fór af velli eftir líklega eina slöppustu frammistöðu sína í seinni tíð, þar sem hann kiksaði m.a. fyrir opnu marki skömmu áður en hann var tekinn af velli. Og þegar að leikmenn, áhorfendur og annað einvalalið var farið að telja niður í lokaflautið og þar með framlengingu, þá loksins náðu okkar menn að brjóta ísinn. Salah fékk stungusendingu inn fyrir, það fóru strax tveir varnarmenn í hann og lokuðu fyrir fyrirgjöfina, en hann renndi boltanum í staðinn út á Trent. Vorum við búin að tala um hversu margar stoðsendingar Trent er kominn með á þessari leiktíð? Það er held ég engin tilviljun hve þær eru orðnar margar, því hann lagði boltann á hárréttan stað inn á markteig þar sem Firmino var á hárréttum stað og renndi boltanum hárrétt framhjá Barovero. Var ég búinn að minnast á að það var hárrétt að öllu þessu staðið? Af því að það var akkúrat það sem gerðist. Okkar menn náðu svo að sigla þessu í höfn, og sluppu blessunarlega við framlengingu sem hefði verið algjör óþarfi að fara í á þessum tímapunkti.

Bestu/verstu menn

Það lenda óþægilega margir í seinni hlutanum. Lallana var svona allt að því ósýnilegur í leiknum. Hendo og Gomez voru ekki sannfærandi í miðverðinum. Origi virkaði ósannfærandi og hefur oftast spilað betur, stundum er hann ósýnilegur en kemur svo með eitt brilliant atriði sem bjargar áliti manns á frammistöðu hans, en það kom ekkert slíkt núna. Shaqiri oft spilað betur. Þeir sem við getum sagt að hafi staðið sig vel eru (eins og áður sagði) Alisson, Keita, Salah af þeim sem spiluðu allan leikinn, og Trent og Firmino gerðu mjög vel á þeim mínútum sem þeir voru inná. Held það sé ekki sanngjarnt að gefa einhverjum einum titil fyrir bestu eða verstu frammistöðuna.

Umræðan eftir leik

• Jújú, enn einn 2-1 sigurinn. Eigum við ekki að vera farin að kunna þetta?
• Vörnin er orðin hættulega þunnskipuð, þegar það þarf að tefla fram tveim miðjumönnum. Aðal málið er auðvitað að það verði hægt að tefla fram sómasamlegri vörn í næstu tveim leikjum (sjá neðar).
• Djöfulli er Trent góður.

Næstu verkefni

Tveir ansi stórir leikir framundan. Leikur gegn Flamengo um bikar sem Liverpool hefur aldrei unnið áður, auðvitað vilja Klopp og hver einasti leikmaður krækja í þann bikar. Svo er flogið heim, og spilað gegn Leicester á annan í jólum. Við vitum alveg hvað er í húfi þar, mikið væri nú gaman að hirða þrjú stig í þeim leik. Svo Úlfarnir og Sheffield sitt hvoru megin við áramótin, og Everton í bikarnum þann 5. janúar. Mikið verður nú gaman að sjá Minamino skora á móti þeim bláu!