Newcastle – Liverpool (Upphitun)

Eftir vonbrigði sunnudagsins þá er fínt að fá næsta verkefni strax. Þetta er leikur tvö af þessum fjórum sem við eigum í þessari jóla- og áramótatörn sem spannar rétt rúma eina og hálfa viku og eru andstæðingarnir í þetta skiptið Newcastle og sviðið St. James Park (kl. 20 á morgun, miðvikudaginn 30. Desember). Það verður reyndar að setja fyrirvara á þessa dags- og tímasetningu þar sem að það er víst til umræðu um að setja mótið á ís næstu tvær virkunar í ljósi aðstæðna (met smit, bæði í UK sem og deildinni), en við sjáum hvað setur.

Formið og sagan

Okkur hefur gengið nokkuð vel gegn Newcastle síðastliðin tvö ár eða svo og erum á 5 leikja sigurhrinu gegn Newcastle í deild (3 sigrar í röð á Anfield og 2 á St. James Park). Liverpool hafði ekki unnið á St James’ Park undir stjórn Klopp þar til Origi skoraði dramatískt sigurmark á lokamínútum leiksins í maí á síðasta ári (2-3 sigur) sem liðið fylgdi svo eftir með 1-3 sigri í sumar þegar Virgil, Origi og Mané trompuðu mark Gayle á fyrstu mínútu.

Síðasta tap okkar á þessum velli kom einmitt í desember mánuði en árið var 2015, stjórinn var reyndar Klopp en byrjunarliðið í þessum 2-0 ósigri var nokkuð ólíkt því sem við eigum að venjast í dag þar sem að eingöngu tveir leikmenn í byrjunarliðinu þann daginn eru enn að spila enn þann daginn í dag – Firmino og Milner. Skrtel skoraði sjálfsmark í þeim leiknum áður en Georginio nokkur Wijnaldum skoraði gegn okkur á lokamínútum leiksins. Ég held að það sé óhætt að segja að það hafi talsvert vatn runnið til sjávar síðan.

Eftir nokkuð sterka byrjun þá er Newcastle núna án sigurs í síðustu þremur leikjum og eingöngu safnað einu stigi af mögulegum níu. Eftir að hafa byrjað desembermánuð ágætlega með 2-1 sigri gegn WBA þá fylgdi í kjölfarið slæmt tap gegn Leeds, jafntefli gegn Fulham og svo tap gegn City um síðustu helgi. Þeir sitja því í 14 sæti þegar flautað verður til leiks með 18 stig eftir 14 leiki, 7 stigum frá fallsæti og ættu að öllum líkindum að spjara sig, neðstu liðin eru bara það slök.

Liverpool kemur í talsvert betra formi í þennan leik þó svo að jójó frammistöður séu farnar að láta bera á sér, eitthvað sem við eigum ekki að venjast s.l. 24 mánuði eða svo. Ef við horfum eingöngu í tölfræðina þá er desember mánuður bara nokkuð góður. Liðið hefur hingað til spilað 7 leiki, 2 í meistaradeildinni og 5 í deild. Uppskeran var 1 sigur og 1 jafntefli í CL á meðan að uppskeran í deild er 11 stig af 15 mögulegum, taplausir með 3 sigra og 2 jafntefli. Það sem situr kannski helst í manni er sú staðreynd að þessi fjögur stig sem við höfum tapað í desember voru gegn liðunum í 18 og 19 sæti, Fulham og WBA (stigin eru 6 ef við teljum leikinn gegn Brighton í lok nóvember með).

Það verður líklega að teljast eðlilegt að það gæti smá óstöðugleika í leik liðsins, og kannski ósanngjarnt að gera kröfu um annað m.v. að:

• Við erum að spila með miðjumann og ungling eða vara-, vara-, varamann í miðverði leik eftir leik
• Við erum varla að ná að stilla upp sama liði á milli leikja
• Við áttum varla í bekk lengi vel og höfum verið án algjöra lykilleikmanna lengst af tímabils og átt í miklum erfiðleikum með að hvíla leikmenn

Newcastle

Þetta Newcastle lið er alveg með leikmenn og hraða í sínu liði til þess að skapa vandræði. Þeir eru ekki að treysta mikið á að vera með boltann, eins og hefur verið harðlega gagnrýnt á þessari leiktíð, en þeir reyna að láta þau skipti sem þeir eru með hann telja og eru beinskeyttir með átta marka manninn, Callum Wilson fremstan.

Það er ákveðið spurningamerki við Lascelles og Saint-Maximin í þessum leik. Þeir voru meðal þeirra Newcastle manna sem náðu sér í COVID fyrr í mánuðinum en hafa verið að glíma við eftirköst þess og hafa ekki enn spilað þrátt fyrir að hafa eitthvað verið að æfa.

Aðrir eru nokkuð heilir utan mögulega Jonjo sem missti af City leiknum sökum nárameiðsla.

Liverpool

Enn og aftur, það er hellingur að frétta af okkar mönnum. Það er lítið að frétta af vörninni nema þá að Matip er auðvitað (enn og aftur) meiddur eftir leikinn gegn WBA. Það hefur ekki spurst út hve lengi hann verður frá en það verða einhverjar vikur.

Thiago tók þátt í æfingum í dag og var Klopp búinn að segja að ef menn ná æfingu þá eru þeir í hópnum ef það eru engin eftirköst, við megum því búast við honum á bekkinn hið minnsta – getur verið okkur virkilega mikilvægur í þessum leikjum sem við dóminerum boltann. Það þarf svo varla að taka það fram en Keita er að veita Matip verðuga samkeppni um hver sé brothættasti leikmaðurinn og mun missa af þessum leik vegna vöðvameiðsla númer 300. Aðrir eru heilir, Ox fékk nokkrar mínútur undir beltið á sunnudaginn og fer vonandi að spila sig í form.

Fremstu þrír eiga allir að vera á sínum stað og við þurfum að bíða eitthvað lengur eftir Jota. Shaqiri er svo orðinn leikfær, var auðvitað ónotuð skipting s.l. sunnudag.

Vonandi fáum við að sjá viðbrögð eftir vonbrigði sunnudagsins. Á meðan við erum að sjá Henderson, Firmino og Mané vera að stíga upp þá eru nokkrar þarna sem þurfa að fara sína meira (TAA þá sérstaklega). Við megum ekki við mörgum off-tímabilum hjá leikmönnum liðsins á svona tímabili þar sem við náum varla að manna vörnina sökum meiðsla. Liðið hefur sýnt nokkra frábæra leiki það sem af er tímabils (Leicester, Atalanta, Wolves, Crystal Palace) en hefur oftar en ekki fylgt slíkri frammistöðu eftir með vonbrigðum (Brighton, Fulham & WBA).

Miðjan hjá okkur er því farin að líta mun betur út, kostirnir orðnir mun fleiri og innkoma Shaq veitir okkur a.m.k. einhverja möguleika fram á við, þ.e. aðra en Origi – sem hefur átt skelfilegar innkomur í talsvert langan tíma núna.

Ég ætla að skjóta á að liðið verði svipað og gegn WBA en með tveimur breytingum, Shaqiri komi inn í stað D.Jones og Rhys byrji í stað Matip. Thiago verði svo á bekknum og komi inná um miðjan síðari hálfleik og afsanni þær samsæriskenningar um að hann sé í raun ekki til. Þetta sé þá einhvern veginn svona:

 

Spá

Ég trúi því að liðið sýni sitt rétta andlit í þessum leik og bæti fyrir frammistöðuna gegn WBA og sæki öll stigin, 0-3, með mörkum frá Salah (x2) og Shaqiri.

Ég minni svo á Gullkastið frá því í gær, finnið það hér. Við munum svo gera upp þetta stórkostlega fótboltaár eftir áramót. Ég vil svo nota tækifærið í þessari síðustu upphitun ársins og óska öllum lesendum og hlustendum Kop.is fyrir samfylgdina á árinu. Jafnframt vil ég óska ykkur öllum gleðilegs nýs árs og vonandi verður 2021 jafn árangursríkt innan vallar og ekki jafn hrikalega ömurlegt utan hans!

Þar til næst.

YNWA