Upphitun: Manchester City mæta á Anfield

Eftir falska dögun með góð úrslit gegn Tottenham og West Ham voru við degnir aftur á jörðina með mjög slökum leik gegn Brighton í vikunni. Nú er hinsvegar komið að Manchester City, leikur milli liðanna sem hafa endurskilgreint toppbaráttu í ensku úrvalsdeildinni á síðustu árum. Allt í einu voru einstaka jafntefli orðinn að martröð og hvert stig skipti öllu máli. Leikir liðanna hafa því verið hápunktur tímabilsins á undanförnum árum.

Andstæðingurinn

City hófu tímabilið í ár svipað og í fyrra, voru frekar óstöðugir. Þeir töpuðu illa gegn Leicester og misstu nokkra leiki í jafntefli og áttu erfitt með að skora sjálfir en þegar fór að nálgast jólatörnina kviknaði á City vélinni og þeir hafa unnið alla sína leiki síðan þeir gerðu 1-1 jafntefli við West Brom þann 15. desember og eru nú á toppnum þremur stigum á undan grönnum sínum í United með leik inni.

Um miðjan janúar misstu þeir sinn besta mann þegar Kevin De Bryune meiddist gegn Aston Villa en hans hefur ekki verið saknað hingað til. Gundogan færðist aðeins framar og er að spila sinn besta bolta síðan hann færði sig yfir til City ásamt því að Joao Cancelo hefur átt frábærar síðustu vikur sem bakvörður sem leitar inn á miðsvæðið.

Það er þó varnarlína City manna sem hefur verið lykillinn að velgengni þeirra í vetur en þeir Dias og Stones hafa myndað öflugt miðvarðarteymi og hafa City aðeins fengið eitt mark á sig í deildinni síðan í umræddum leik gegn West Brom, þá sárabótamark í uppbótatíma gegn Chelsea.

Guardiola gerði þó breytingar í síðasta leik þar sem Laporte kom inn í liðið í vinstri bakverði og sjáum við það líklega aftur á morgun. Með því sækir liðið í 3-4-3, Laporte, Stones og Dias verjast meðan Cancelo sækir upp á miðjuna en þegar þeir missa boltann bakkar Cancelo aftur og þá verjast þeir með fjögurra manna varnarlínu.

Á miðjunni er stóra spurningin hvort Fernandinho fái pláss. Í undanförnum leikjum hefur Rodri spilað djúpur með Bernardo Silva og Gundogan fyrir framan en Guardiola gæti alveg freistast til að spila aðeins varkárari leik og fórnað Silva í þessum leik og byrjað leikinn með tvö djúpa miðjumenn og stillt Fernardinho upp við hlið Rodri.

City menn hafa verið nánast sóknarmannslausir á tímabilinu en Aguero og Jesus hafa báðir glímt við mikil meiðsli en Jesus er byrjaður að spila aftur og hefur skorað í síðustu tveimur leikjum og því líklegt að við sjáum hann uppi á topp og tvo af Sterling, Mahrez, Torres eða Foden sitt hvoru megin við hann.

Liverpool

Eins og er virðist titilbaráttan á burt og við í harðri baráttu um Meistaradeildarsæti. Meiðslalistinn hefur leikið okkur grátt í ár en það birtir þó líklegast aðeins til fyrir þennan leik. Alisson snýr aftur og líkur á því að bæði Mané og Fabinho verði einnig með. Hinsvegar eru þeir Van Dijk, Gomez, Matip, Keita og Jota allir enn frá.

Gegn Brighton horfðum við upp á endursýningu af leik sem við höfum séð alltof oft í vetur. Lið sem sat aftarlega til að byrja með og vann sig hægt og hægt inn í leikinn. Við höfum átt erfitt með að finna svör sem er ekki eitthvað sem við könnumst við frá síðustu árum. Liverpool liðið hefur verið þekkt fyrir gríðarlegan vilja og ótrúlegar leiðir til að ná að loka erfiðum leikjum en undanfarið er það horfið. Liðið virðist brotið og bugað, ekki eitthvað sem maður vill sjá fyrir leik gegn City liði í því formi sem þeir hafa verið í.

Liðið er fyrir umferðina í fjórða sæti deildarinnar en liðið hefur aðeins unnið helming leikja sína í vetur eða ellefu af tuttugu og tveimur. Óstöðugleiki hefur einkennt Liverpool að undanförnu og ljóst að liðið þarf að fara hrista af sér slenið ef það á ekki að skemma næsta ár.

Eftir sögulegt gengi á heimavelli þar sem liðið tapaði ekki leik í 68 leikjum hefur liðið nú tapað tveimur í röð og ekki skorað á Anfield í 348 mínútur. Með þá tölfræði og þá sem áður kom að City fái hreinlega ekki á sig mörk er útlit fyrir að morgundagurinn verði langur.

Stóra spurningin er hinsvegar hvenær við fáum að sjá annan af tveimur nýju miðvörðum okkar fá að spila. Undir lok félagsskiptagluggan mættu þeir Kabak og Davies en ef þær fréttir eru réttar að Fabinho sé heill eru allar líkur á því að hann og Henderson verði miðverðir í leiknum á morgun enda ólíklegt að Klopp setji inn nýjan mann í byrjunarliðið í leik gegn City.

Með Hendo og Fab í vörninni er spurning hvernig miðjan verður. Í síðustu leikjum höfum við séð Milner, Thiago og Wijnaldum en Milner hefur verið að spila tæpur og hinir tveir búnir að spila alveg heilan helling af fótbolta undanfarið. Þykir líklegt að Thiago og Wijnaldum verði beðnir um að taka aðra vakt en Milner fái að setjast á bekkinn fyrir Jones sem gæti komið með orku inn á miðsvæðið.

 

 

Mín spá

Held ég hafi aldrei spáð Liverpool tapi síðan ég hóf skrif hér en ég hef litla trú á leiknum á morgun. Ég spái 2-1 tapi þar sem Mané skorar eina mark okkar manna. City lestinn er á fullri ferð og ég á erfitt með að sjá okkar menn finna þau svör sem þarf til að knýgja fram sigur í þessum leik. Hinsvegar hefur maður lært í gegnum árin, þá sérstaklega áður en liðið okkar varð jafn gott og það hefur verið síðustu ár að það er nánast ómögulegt að segja hvernig svona stórleikir fara og við höfum marg oft séð ansi slakt Liverpool lið ná að gíra sig inn í stóra leiki og ná í úrslit og þrátt fyrir langan meiðslalista er þetta enn með betri Liverpool liðum á minni lífstíð.