Liverpool – Crystal Palace á mánudag (Upphitun)

Þá er komið að næsta verkefni. Liverpool vill eflaust bæta fyrir vonbrigðin gegn Fulham og fær kjörið tækifæri til þess á morgun (mánudag kl. 19) þegar Crystal Palace kemur í heimsókn, sem jafnframt er fyrsti heimaleikur tímabilsins.

Sagan og formið

Það verður ekki annað sagt en að Liverpool hafi haft talsverða yfirburði í viðureignum þessara liða. Í minningunni var þetta búið að vera meira strögl en líklega er Crystanbul og tími Alan Pardew eitthvað að hafa áhrif á upplifunina.

Liðin hafa leitt saman hesta sína í 26 skipti í ensku úrvalsdeildinni þar sem Liverpool hefur unnið 18 sinnum, Crystal Palance 5 sinnum og einungis 3 jafntefli hafa litið dagsins ljós. Tölfræðin verður ekkert mikið betri þegar síðustu 5 deildarleiki liðanna eru skoðaðir, Liverpool er þar með fullt hús stiga með markatöluna 19-1.

Það er komið rétt tæpt ár síðan gestirnir mættu síðast á Anfield en þá voru það mörk Mané, Salah og Keita sem tryggðu okkur öll stigin í tiltölulega þægilegum 3-0 sigri.

Annars er erfitt að ætla að lesa í eitthvað form í annarri umferð í deildinni. Gestirnir koma inn í þennan leik, rétt eins og við, eftir erfiða fyrstu umferð þar sem þeir töpuðu á heimavelli gegn Arsenal í leik þar sem þeir spiluðu ágætlega á köflum en náðu ekki að nýta færin. Það er því ljóst að bæði lið vilja komast á skrið í deildinni – og svei mér þá ef manni finnst ekki vera dálítil pressa á okkar mönnum eftir einungis eina umferð…

Liverpool

Það verður forvitnilegt að sjá uppstillinguna fyrir þennan leik. Við erum í miklum meiðslavandræðum, svo miklum að við erum komnir ansi nálægt beini – maður spyr sig hvort eitthvað hafi klikkað á undirbúningstímabilinu. Kannski verra að mikið af þessum meiðslum eru á miðjunni, svo möguleikarnir þar eru takmarkaðir.

• Keita missti af leiknum gegn Fulham sökum veikinda en æfði í vikunni og ætti því að taka þátt. Spurning hvort að hann eða Elliot taki sér stöðu með Henderson og Fabinho. Ég hallast að því að það verði Keita. Hann náði undirbúningstímabilinu loksins og það var ekki nema rétt í restina og um síðustu helgi sem hann datt aðeins úr gír en það voru ekki meiðsli í þetta skipti.
• Thiago, Curtis Jones og Ox eru allir frá vegna meiðsla. Styttist í CJ en öllu lengra í Thiago og Ox. Maður er nánast hættur að velta sér upp úr fjarveru Ox, hann virðist bara ekki ná að halda sé heilum, en það er svekkjandi hve brothættur Thiago virðist vera. Það veitir því ekki af að vera með mikla breidd á miðjunni þar sem við erum með talsvert af leikmönnum þarna sem einfaldlega ná ekki að halda sé heilum.
• Matip gat víst ekki æft um helgina og er ólíklegur fyrir morgundaginn. Hann bætist því við Konaté á meiðslalistanum en Tsimikas gæti náð í hóp eftir að hafa misst af síðari hluta undirbúningstímabilsins og Fulham leiknum sökum meiðsla.
• Jota er enn frá sökum sömu vöðvameiðsla og hafa haldi honum frá allt undirbúningstímabilið og það virðast vera nokkrar vikur í hann ennþá.

Ég ætla að skjóta á að það verði þrjár breytingar á liðinni frá því um síðustu helgi, þ.e. Gomez (Matip), Keita (Thiago) og Nunez (Firminho) en það kæmi mér heldur ekkert á óvart ef Elliot byrji í stað Keita og Firmino haldi sæti sínu. Þrátt fyrir öll þessi meiðsli þá erum við ennþá með nokkra möguleika, en ég ætla að skjóta á þetta lið á morgun:

 

Crystal Palace

Hjá gestunum er Tomkins enn frá vegna meiðsla ásamt McArthur en Olise er búinn að vera að æfa og verður a.m.k. í hóp.

Ég ætla því að spá því að Viera spili á sömu leikmönnum frá því í tapleiknum gegn Arsenal utan að Mateta kemur inn í stað Edouard:

 

Spá

Zaha hefur oft reynst okkur erfiðlega í gegnum tíðina og Viera hefur verið að gera flotta hluti með þetta Crystal Palace lið. Ég sé samt ekki annað en sigur okkar manna í þessum leik og ætla að skjóta á að hann verði nokkuð þægilegur þar sem að Diaz skorar tvö mörk, Nunez eitt og Salah eitt í 4-0 sigri.

Þar til næst.

 

YNWA