Hvað kaupir Liverpool marga?

Næsta sumar verður stórt hjá Liverpool á leikmannamarkaðnum, hversu oft höfum við heyrt þetta undanfarin ár? Skoðum aðeins hópinn og hverja stöðu fyrir sig til að meta hvar Liverpool er í raun og veru líklegast til að þétta raðirnar

Miðjumenn

Það blasir auðvitað við að Liverpool þarf að styrkja sig á miðjunni en með breyttu leikkerfi og sterkum lokaspretti Curtis Jones og Trent Alexander-Arnold er erfitt að sjá mikið meira en tvo nýja alvöru miðjumenn bætast við hópinn. Þrátt fyrir að það eru fjórir miðjumenn að kveðja núna eru 5-7 miðjumenn áfram á launaskrá hjá Liverpool. (Elliott og Carvalho eru þessir tveir sem erfitt er að tjóðra niður á stöðu).

Fabinho verður klárlega áfram fyrsti kostur í stöðu varnartengiliðs og hefur Henderson og Bajcetic sem back upp í því hlutverki. Liverpool hefur verið orðað við fullt af miðjumönnun, líka varnartengiliði en líklega er þetta ekki aðalfókusinn í sumar. Mest væri maður til í að sjá óvænt Touchameni twist sem dæmi eða bara Declan Rice

Aðal leikmannakaupin þurfa að vera tveir leikmenn sem eru yngri, ferskari og með sömu gæði og Henderson og Thiago. Þeir verða báðir með næsta vetur og spila vafalaust helling en Liverpool þarf mjög augljóslega ferskari fætur sem geta hlaupið á þetta svæði. Henderson verður 33 ára í sumar og ætti núna að þróast meira í svona Milner hlutverk á miðjunni. Thiago er orðin 32 ára og er ekki með skrokk í meira en 50% af tímabilinu. Bellingham er blessunarlega ekki eini valkosturinn sem gæti styrkt byrjunarlið Liverpool eins og nöfnin sem helst hafa verið orðuð við Liverpool í vetur sýna. Mac Allister og/eða Caceido ættu að vera risa skotmörk hjá Klopp í sumar.

Curtis Jones er svo að þróast núna svipað og Ox var að gera undir stjórn Klopp áður en hann meiddist. Ef hann byggir ofan á þessa spilamennsku sem hann er að sýna núna fækkar það leikmannakaupum Liverpool í sumar um einn miðjumann.

Bajcetic sem verður ekki 19 ára fyrr en í haust gæti eins verið stærri partur af plönum Klopp núna eftir þetta tímabil. Erfitt að átta sig á því hvort hann sé svona rosalegt efni að hann spilaði sig inn í byrjunarlið Liverpool 18 ára gamall eða hvort miðjan var bara svona léleg og meiðslavandræðin svona alvarleg í vetur að hann fékk óvenjumikinn tíma. Eru þetta Rhys Williams/Tyler Morton mínútur eða er hann kominn í plön Klopp? Gæti Tyler Morton komið aftur til greina hjá Klopp? Hann fékk þessar mínútur líka 18 ára sem Bajcetic fékk í vetur.

Klopp vill ekki of stóran hóp og fjöldi miðjumanna á launaskrá í vetur er í raun galin. Ox, Keita, Arthur og Milner eru allir að fara og þeir spiluðu lítið sem ekkert í vetur á miðsvæðinu hjá Liverpool. Brottför þeirra skapar hinsvegar töluvert svigrúm á launaskrá.

Eins myndi maður ekkert útiloka brottför einhverra sem er ekki endilega í kortunum núna, Thiago, Carvalho eða Elliott sem dæmi.

Miðvörður

Konate, Gomez og Matip er bara ekki treystandi til að standa vaktina heilt tímabil, þeir eru allir allt of mikið meiddir þegar á reynir. Van Dijk er heldur ekkert að yngjast. Núna er klárlega rétti tíminn til að bæta 22-25 ára miðverði við hópinn sem gerir tilkall til að byrja alla leiki. Helst miðvörð sem líður ekki illa í þessari þriggja manna línu sem líklega verður trendið næsta vetur. Augljósir kostir væru t.d. Gvardiol frá Leipzig, yfirlýstur Púllari og einn sá besti í dag eða Inácio frá Sporting sem aðeins hefur verið orðaður við Liverpool. Eins Kim tröllið frá Napoli sem ku vera með klásúlu í sínum samningi.

Ef að Liverpool ætlar að spila áfram þetta leikkerfi sem verið er að enda tímabilið með er líklegt að staða Robertson breytist töluvert og spurning hvort leikmaður sem er nær því að vera miðvörður sé betra back up þar heldur en Tsimikas?

Bakvörður

Trent er okkar besti leikmaður og það var áhugavert að heyra Klopp tala um það nýlega að líklega fengi hann meiri tíma á miðjunni næsta vetur. Hvort sem það er áfram úr bakvarðarstöðunni eða bara sem miðjumaður?

Ramsey spilaði ekki leik í vetur, Bradley var frábær hjá Bolton og Berg var líka meira og minna meiddur í vetur, allir gætu þeir komið inn og fyllt inn sem back-up fyrir Trent. Gomez svosem líka en enganvegin sem þessi hybrid miðjumaður.

Best væri að fá inn hægri bakvörð sem er nógu góður til að keppa við Trent um stöðuna og þannig jafnvel losa um hann í hlutverk ofar á vellinum. Hann er að sýna það þessa dagana að hann er klárlega meðal allra bestu miðjumanna deildarinnar og klárlega að svara spurningu sem við höfum velt upp frá því hann komst í byrjunarliðið (enda var hann alltaf á miðjunni í akademíunni).

Markmaður

Vonandi fer Kelleher ekki í sumar en það er töluvert orðað hann frá Liverpool og líklega verður hann að fara til að spila fyrir alvöru. Alisson er 30 ára og líklega ekkert að fara á næstunni þó Kelleher sé vissulega nógu góður til að vera markmaður Liverpool.

Adrian virðist ætla að verða þriðji markmaður áfram sem er nokkuð magnað og gefur til kynna að klúbburinn hefur ekki miklar áhyggjur af stöðu uppalinna leikmanna eða Englendinga í hópnum.

Sóknarmenn

Frammi er Liverpool með fimm mjög góða valkosti og 3-4 mjög efnilega. Ef að engin þeirra fer í sumar er ólíklegt að peningum verði varið þar.

Gakpo er að þróast mjög hratt og vel í nýja útgáfu af Firmino hlutverki fremst og verður vonandi enn betri eftir heilt undirbúningstímabil og hvað þá í liði með alvöru miðjumenn sem geta hlaupið.

Diogo Jota er vonandi búinn með sinn meiðslapakka sem tók frá honum megnið af síðustu tímabilum. Hann er að enda tímabilið mjög vel eftir afar hæga endurkomu.

Luiz Diaz var versta áfallið í vetur og er að sýna afhverju núna á lokakaflanum. Áræðni, hraði og gæði sem vantaði rosalega oft í vetur. Hann svipað og Mané gerði skapar eins mikið pláss og tíma fyrir samherja sína frammi.

Mo Salah á töluvert inni ennþá þrátt fyrir að vera enda þetta tímabil frábærlega og að skila inn tölfræði sem er í topp klassa enn eitt árið. Hvernig verður hann með alvöru miðju og Diaz með sér upp to speed allt tímabilið?

Darwin Nunez er svo leikmaður sem á vonandi helmingi meira inni en hann sýndi í vetur. Klopp hefur vonandi hlutverk fyrir hann næsta vetur sem nær því besta út úr honum. Hann ætti allt eins að vera 30 marka maður

Fyrir utan Salah eru þetta allt strákar á flottum aldri.

Ben Doak er svo alveg eins líklegur til að setja pressu á þessa leikmenn strax næsta vetur, Europa League gæti t.a.m. verið gríðarlega spennandi fyrir hann. Það er svo spurning hvar Klopp sér Elliott og Carvalho fyrir sér (ef þeir verða þá áfram hjá Liverpool). Það er voðalega erfitt að sjá framtíð Elliott á miðjunni en mun einfaldara að sjá Fabio Carvalho þróast svipað og Curtis Jones er að gera. Það er svo spurning hvort Kadie Gordon taki næstra skref á sínum ferli, það er ekki langt síðan hann var álíka efni og Ben Doak er núna.

---

Það hefur blasað við í 2-3 ár núna að Liverpool þarf að setja peninginn í miðjuna, tveir alvöru miðjumenn sem ekki eru gerðir úr gleri gætu læknað flest öll vandamál Liverpool í vetur. Við sjáum núna á lokakaflanum að þetta lið okkar er ekki eins langt frá og virtist fyrir áramót. Félagið er loksins að losna við Keita og Ox af launaskrá. James Milner kostaði sitt og Arthur fékk kárlega ágætan samning.

Liverpool hefur ákaflega lítið sett í leikmannakaup undanfarin ár í samanburði við samkeppnina og þarf bara að breyta þeirri stefnu í sumar. Ef að þeir eru búnir að klúðra Jude Bellingham þarf viðbragðið að vera sprengja úr sömu eða sambærilegri hillu. Það kostaði þennan vetur að klúðra Touchameni í fyrra og gera ekkert, núna eru gömlu miðjumennirnir ári eldri (Fab, Hendo, Thiago), deadwood-ið er farið (Keita og Ox) og Milner ekki lengur option. Tveir miðjumenn í €65-100m klassa er fullkomlega eðlileg krafa. Það ætti ekki að þurfa fleiri, það vantar ekki magn heldur gæði.

Það er ekki eins aðkallandi þörf á varnarmönnum en auk miðjumanna væri mjög sterkt að byrja strax að þétta varnarlínuna. Kaupa miðvörð og setja það í hendur Matip, Gomez og Phillips að ákveða hvort þeir vilji vera áfram og berjast um sæti eða losa þá bara frá félaginu. Galið að leggja inn í enn eitt tímabiið með Gomez og Matip sem tvo af fjórum miðvörðum Liverpool. Hversu oft hafa þeir verið meiddir og það jafnvel á sama tíma? Konate er nógu góður til að taka sénsinn þó hann sé allt of mikið meiddur líka.