Deildarbikar á morgun

Á morgun kemur West Ham í heimsókn á Anfield þegar Liverpool hefur keppni í Deildarbikarnum sem ríkjandi Deildarbikarmeistarar og kemur leikurinn mögulega bara á fínum tíma hvað varðar leikform Liverpool sem hefur náð að svara skellinum gegn Nottingham Forest mjög sannfærandi með stórum og nokkuð þægilegum sigrum á Bournemouth og AC Milan.

West Ham vann Bournemouth 1-0 í síðustu umferð en þeir hafa verið svolítið daufir í byrjun leiktíðar með aðeins einn deildarsigur, eitt jafntefli og þrjú töp. Töpin svo sem á móti þremur sterkum liðum í Aston Villa, Man City og Chelsea en þeir hafa ekki litið rosalega sannfærandi út hingað til. Á pappír þá bættu þeir ágætlega við sig í sumar og fengu meðal annars leikmenn eins og Max Kilman, Crysencio Summerville, Niclas Fullkrug, Aaron Wan-Bissaka, Carlos Soler og Jean-Clair Todibo án þess að missa eitthvað stórkostlegt á móti. Þeir voru heilt yfir flottir í fyrra svo kannski er það bara tímaspursmál hvenær þeir fara að hrökkva í gang – en vonandi ekki á morgun!

Það verður fróðlegt að sjá hvernig Liverpool mun stilla upp sínu liði á morgun, það verða margir leikir á skömmum tíma fram að næsta landsleikjahléi svo það má alveg reikna með einhverjum róteringum eins og við höfum séð í síðustu tveimur leikjum en mér þætti nokkuð ólíklegt að sjá Arne Slot skipta algjörlega út byrjunarliðinu eins og það leggur sig en frekar gætu þetta verið 4-5 breytingar í heild, ef það nær meira að segja svo mörgum.

Ég ætla að giska algjörlega út í bláinn hérna og setja bara upp þetta lið en ég hef enga trú á að það verði rétt. Ég horfi á leikmannalistann og þætti mjög eðlilegt að sjá svona 3-4 í viðbót detta inn í liðið. Joe Gomez gæti alveg komið inn í miðvörðinn og hefur lítið spilað, Endo á miðjuna og hefur lítið spilað líka, Jota er búinn að sitja á bekknum í síðasta leik, Chiesa gæti mögulega byrjað og fengið mikilvægar spilamínútur og gæti Jaros fengið frumraun sína í alvöru leik með Liverpool? Ég hef enga hugmynd!

Það væri vissulega gaman að sjá stráka eins og til dæmis Nyoni og Morton í leikmannahópnum á morgun og jafnvel fá einhverjar mínútur ef leikurinn spilast fínt en miðað við hve margir eru heilir þá efast ég um að hann sendi einhverja bara í algjört frí á morgun enda er West Ham krefjandi mótherji.

Sjáum hvað setur, fyrsta hindrunin í að verja þennan titil mætir Liverpool á morgun og vonandi fara þeir svífandi yfir hana.