Tími Breytinga

Það er ekkert endilega jákvætt að gera of mikið af breytingum á einu sumri, sérstaklega ekki á leikmannahópi sem landaði titlinum á síðasta tímabili. Engu að síður virðist sumarið stefna í að verða tími breytinga hjá Liverpool. Nördarnir sem komu aftur fyrir síðasta tímabil eru fyrst núna að láta til sín taka og setja sitt handbragð á hópinn auk þess sem það var komin augljós þörf á breytingar í einhverjum tilvikum. Ákvörðun Trent Alexander-Arnold um að yfirgefa Liverpool kallar einnig á breytingar og ekkert endilega bara í hans stöðu á vellinum.

Hvort sem mikið af breytingum í einu séu af hinu góða eða slæma skal ósagt látið en það er óhætt að fullyrða að Liverpool er að byrja þennan glugga með rosalegum látum og í takti við að liðið er ríkjandi meistarar, loksins. Undanfarin ár hefur Liverpool sett miklu minna í leikmannakaup heldur en öll sambærileg félög og því ekkert óeðlilegt ef það er svigrúm fyrir 200-400m núna, jafnvel meira.

Skoðum aðeins hópinn eins og hann lítur út núna: 

Það eru fjórtán leikmanna sem nokkuð örugglega eru ekki að fara í sumar, þar af fjórir sem koma í sumar og tveir sem voru að framlengja samninginn sinn. Það er hinsvegar óvissa með ótrúlega marga leikmenn og flestir þeirra eru líklegri en ekki til að fara í sumar.

Samningsmál Konate og meiðslasaga hans gætu haft áhrif á hvað Liverpool gerir seinna í sumar.

Jarrel Quansah virðist á leiðinni til Leverkusen eftir að Liverpool keypti Frimpong og Wirtz af þeim. Það er orðrétt sama umræða um Joe Gomez og öll undanfarin ár sem endar líklega með því að hann fer ekki neitt, sérstaklega ekki af Quansah fer.

Kaupin á Kerkez verða pottþétt til þess að annaðhvort Robertson eða Tsimikas fara og jafnvel báðir. Eins og staðan er núna er líklegra að Robertson fari til Atletico á meðan Tsimikas talar um að vera frekar til í 20-30 leiki hjá Liverpool en 45 hjá liði eins og t.d. Leeds.

Darwin Nunez fer í sumar og skilar örugglega rúmlega helmingnum af kaupverðinu í kassann. Sala á honum verður líklega til þess að Liverpool vill annan í staðin sem Slot hefur meiri trú á. Eins er nokkuð ljóst að Chiesa fari og jafnvel fara þeir bara saman til Napoli eins og staðan er núna.

Ef að það er markaður fyrir Diogo Jota á ágætu verði fer hann líka.

Luis Diaz er svo enn einn sem ætti kannski frekar að vera í óvíst hópnum, hann hefur hvað helst verið orðaður í burtu af framherjahópnum.

Elliott, Doak, Bajcetic og Morton eru svo allt leikmenn sem nokkuð örugglega bætast í hópinn með Kelleher og Trent og yfirgefa Liverpool í sumar.

Þetta gætu léttilega orðið hátt í 10 leikmann sem fara í sumar, þar af 2-3 byrjunarliðsmenn.

Leikmannakaup

Það er ekki þörf á að kaupa leikmenn fyrir alla þá sem eru líklegir til að fara enda skiluðu margir þeirra nákvæmlega engu á síðasta tímabili. En það að Liverpool sé nú þegar svo gott sem búið að staðfesta þrjá leikmenn sem fara beint í hóp/byrjunarliðið er stórt og mjög líklegt að við þann hóp bætist 2-3 í viðbót.

Wirtz

Kaupin á Florian Wirtz er alvöru yfirlýsing frá Liverpool, þetta er heitasti bitinn á markaðnum í dag og hann valdi Arne Slot og Liverpool framyfir önnur elítu lið. Hann er líklega að hugsaður sem arftaki Trent hvað færasköpun varðar mikið frekar en Frimpong. Það er ekkert endilega eðlilegt að leikstjórnandi liðsins sé hægri bakvörðurinn.

Það verður líka mjög fróðlegt að sjá hvar Slot hugsar Wirtz hjá Liverpool. Hann var að mestu framarlega á miðjunni vinstra megin hjá Leverkusen sem spilaði með þriggja manna vörn, tvo fljúgandi bakverði og tvo varnarsinnaða miðjumenn fyrir aftan sig. Það er erfitt að sjá Slot stilla honum þannig upp næsta vetur. Mun líklegra er eitthvað í ætti við 4-2-3-1 þar sem Wirtz er í gömlu góðu Gerrard holunni eða einhverja útgáfu af 4-3-3 þar se Wirtz er fremstur.

Önnur pæling er hvort koma Wirtz verði til þess að öll miðjulínan okkar færist aftar, Szoboszlai verði meira átta, MacAllister og Jones meira í holunni og Gravenberch í miðverði líkt og við sáum stundum í leikjum á síðasta tímabili?

Slot seldi Wirtz það að koma til Liverpool með því að sýna honum skýrt hvert hans hlutverk yrði, það verður mjög spennandi að sjá hvað hann meinti nákvæmlega.

Besta við kaupin á Wirtz er kannski að hann eykur breiddina á miðjunni um einn alvöru miðjumann. Slot notaði bara Gravenberch, MacAllister, Szoboszlai og Jones á síðasta tímabili sem var bara of fámennur hópur þegar á reyndi undir lok tímabilsins. Miðjan var gjörsamlega sprungin í leikjunum gegn Newcastle og PSG sem dæmi. Wirtz eykur ekki bara breiddina heldur kemur inn með eiginleika sem hinir fjórir búa ekki yfir.

Tæknilega séð er Wirtz líklega að koma inn í hópinn í stað Harvey Elliott og það er ansi spennandi uppfærsla þó Elliott sé vissulega mjög spennandi leikmaður líka.

Kerkez

Það að landa Milos Kerkez strax eftir tímabil þar sem við sáum vel að Robertson er kominn yfir hæðina og Tsimikas hefur bara ekki gæðin til að vera í stóru hlutverki hjá Liverpool er rosalega traustvekjandi. Félagið hjólar þarna beint í að leysa augljóst sár á hópnum.

Þessi staða var vandræðastaða hjá Liverpool frá því Úrvalsdeildin var stofnuð þar til Robertson breytti stöðu vinstri bakvarðar í einn helsta styrkleika Liverpool. Auðvitað vill maður helst halda Robbo a.m.k. þetta ár sem hann á eftir af samningi en það er alls ekkert víst að hann sé góður í klefanum ef hann fær ekki að spila reglulega. Hann er ekki nógu gamall til að þurfa sætta sig við slíkt hlutverk auk þess sem hann er á stórum launapakka. Atletico Mardid og Simeone gerpið hljóma leiðinlega gott move fyrir hann á þessu stigi ferilsins.

Fari Robertson er ljóst að Kerkez þarf að vera klár frá fyrsta leik en miðað við það sem maður sá síðasta vetur er hann alltaf að fara taka stöðuna af Robbo og líklega væri hann að gera það af bara öllum vinstri bakvörðum deildarinnar. Þetta er strákur sem virðist ætla að gera það að verkum að þessi staða verður ekki áhyggjuefni þó Robertson fari.

Frimpong

Það verður mjóg fróðlegt að sjá hvar Slot hugsar Frimpong því það er ekkert sjálfgefið að það verði í bakverði. Conor Bradley held ég að sé a.m.k. til að byrja með hugsaður sem fyrsti kostur þar en hann hefur ennþá ekki afrekað að klára 90 mínútur hjá Liverpool. Mögulega eru þeir bara að fara rúlla þessari stöðu sín á milli í leikjum og milli leikja.

Frimpong spilaði 25 leiki sem væng bakvörður á síðasta tímabili, hann kom inná sem varamaður í 13 leikjum og spilaði svo 10-15 leiki sem kantmaður. Hann kemur með gríðarlegan hraða sem gæti stækkað vopnabúr Liverpool töluvert gert liðum sem pakka í vörn auk þess sem þar gæti opnast möguleiki á að skapa meira pláss fyrir Salah.

Þetta er leikmaður sem hefur verið orðaður frá Leverkusen í tvö ár og mjög mikið efni, stefnir samt í að verða svona 4-5 mest spennandi leikmannakaup Liverpool í sumar, sem er galið.

Það er samt nokkuð ljóst að Frimpong er að koma í staðin fyrir Alexander-Arnold þó Conor Bradley deili þeirri ábyrgð vissulega með honum

Orðrómur varðandi næstu leikmannakaup

Guéhi

Nánast samhliða fréttum um að Jarrel Quansah væri líklega að fara til Leverkusen var orðað Marc Guéhi frá Palace í hans stað. Það er fyrirliði Palace, 24 ára og tveimur árum eldri en Quansah sem var að leiða þá til fyrsta stóra titils í sögu Palace og Evrópudeildarsætis. Gangi það eftir er hann að fara veita Konate samkeppni strax og jafnvel skapa betra svigrúm til að hvíla Van Dijk í einhverjum leikjum.

Versta við Guéhi er að hann er 1,82m sem er ekki mikið við miðvörð en á móti er hann góður á boltann og getur leyst fleiri stöður en bara miðvörð.

Hann var sterklega orðaður við Newcastle í fyrra og eins Tottenham. Núna á hann bara eitt ár eftir af samningnum og gæti verið tilvalin díll fyrir Liverpool, ekki síst þar sem okkar menn mega alveg við því að fá home grown leikmenn.

Isak

Nei andskotinn er það? Helstu blaðamenn Englands eru að halda því á lofti að Liverpool hafi mikinn áhuga á Isak og þó það yrði mjög erfiður díll er hann ekki alveg útilokaður. Verðmiðinn sem þeir setja er auðvitað um 150-200m en það væri fróðlegt að sjá hvar hann endar sé í alvöru verið að vinna í honum. Isak er mjög líklega sjálfur til í að taka stökkið núna og það gæti skipt máli. Hann er 26 ára.

Það er eðlilegt að setja aðeins spurningamerki við Isak á þessu verði, hann fór úr akademíu Dortmund til Willem II og þaðan ári seinna til Real Soceidad þar sem hann var í nokkur ár. Newcastle keypti hann þaðan auðvitað fyrir olíuauðinn og hjá þeim hefur hann unnið einn bikar.

Á síðasta tímabili spilaði hann í fyrsta skipti á ferlinum meira en 2.500 mínútur (28 leikir) í deild, oftast hefur hann ekki verið nálægt því. Hann er núna búinn að eiga 18-24 góða mánuði á Englandi en það er galið að verðleggja hann á 150-200m og ég sé Liverpool ekki snerta slíkan díl með priki, sama hvað John W. Henry hefur verið drukkinn í sumar.

En að þvi sögðu þá kom hann að 29 mörkum í 34 leikjum fyrir Newcastle í deildinni á síðasta tímabili, þetta er auðvitað leikmaður sem maður myndi sannarlega vilja í Liverpool.

Aðrir

Fyrir utan þessa stóru pósta er auðvitað verið að orða fjöldan allan af leikmönnum við Liverpool.

En eins og þetta er núna eru breytingar á hópnum ca svona:
Mamardashvili fyrir Kelleher
Pesci fyrir Jaros
Frimpong fyrir Trent
Wirtz “fyrir Elliott”
Kerkez fyrir Robertson
Guéhi fyrir Quansah
Enda svo á
Isak fyrir Nunez, ekki?