Ívar Örn Reynisson
Þá er búið að staðfesta nýja bakverði báðum megin og tímabært að skoða aðeins hvað þessir ágætu drengir koma með að borðinu hjá okkur. Byrjum á þeim sem var staðfestur í dag, Milos Kerkez.
Hver er Milos Kerkez?
It’s a real honour for me, a privilege to come to play for one of the biggest clubs in the world, [the] biggest club in England. I’m just really, really happy and excited.
Milos Kerkez fæddist í bænum Vrbas í Serbíu þann 7. nóvember 2003. Hann á því enn nokkra mánuði í 22 ára afmælið sitt. Vrbas er í Vojvodina héraði í Norður-Serbíu og í bænum búa tæplega 40.000 manns. Hann er af ungverskum ættum og flutti ungur til Ungverjalands og lítur á sig sem Ungverja. Hann lék með bæjarliðinu OFK Vrbas þar sem hæfileikar hans komu fljótt í ljós en þeir sem kannast við serbneska skólann vita líka að þar er lítið gefið eftir og gildin snúast auðvitað um hæfileika en ekki síður andlega eiginleika á borð við vinnusemi, aga og liðsheild.
Milos Kerkez var þó ekkert lengi í heimabænum því að 11 ára gamall, árið 2014, flutti hann til Vínarborgar og lék með Rapid Vín sem unglingur, allt til 2019 þegar hann fór til Hódmezövásárhely sem er lið frá samnefndum bæ í suð-austur Ungverjalandi. Alls ekki stórt lið, og raunar bara ansi erfitt að finna eitthvað um dvöl hans þar en þetta virðist vera félag sem einblínir á að þróa unga leikmenn. Í dag er meistaraflokkurinn í þriðju deild ungversku deildarkeppninnar og mér sýnist hann ekki hafa spilað með meistaraflokki þar, en árið eftir, tímabilið 2020-2021 lék hann 16 leiki í 2. deild með ETO Györ, sem er frá samnefndri borg í Ungverjalandi. Þetta er ágætlega stórt félag á ungverskan mælikvarða, hafa fjórum sinnum hampað ungverska meistaratitlinum og þeir komust í undanúrslit í Evrópukeppni bikarhafa árið 1965 en voru í uþb. 10 ára basli með liðið, eru núna komnir aftur í efstu deild. Þetta tímabilið ákvað hann að velja Ungverjaland sem sitt landslið. Munum bara líka hvað hann er ungur, vorið 2021 var hann 17 ára.
Eftir þetta tímabil vakti hann áhuga engra annarra en AC Milan. Paolo Maldini sjálfur sló á þráðinn til guttans og hann lék tímabilið í Primavera deildinni með U20 ára liði AC Milan. Um haustið 2022 fór hann svo til AZ Alkmaar og tók gott tímabil með aðalliðinu, lék alls 52 leiki sem vakti áhuga Bournemouth. Þangað fór hann því tæplega tvítugur að aldri sumarið 2023. Hann lék 28 deildarleiki fyrra tímabilið sitt en 38 leiki seinna tímabilið þar sem hann skoraði tvö mörk og gaf fimm stoðsendingar. Í öllum keppnum á hann 74 leiki fyrir Bournemouth.
Hann á fjölmarga yngri landsleiki fyrir Ungverjaland og á 23 a-landsleiki.
Helstu eiginleikar sem leikmaður
Það hefur nokkuð verið rætt um Milos Kerkez sem leikmann og hvað hann mun koma með að borðinu fyrir Liverpool. Ég man fyrst eftir að hafa séð þetta nafn þegar Liverpool mætti Bournemouth haustið 2023. Ég átti von á því að Mo Salah myndi rúlla létt yfir þennan unga, óþekkta leikmann sem var nýkominn í lið Bournemouth. Það fór nú svo að Mo Salah skoraði eitt mark, tók sjálfur frákast eftir víti sem var varið frá honum þannig að hann fór nú ekki beint létt með Kerkez í þeim leik.
Kerkez er kraftmikill leikmaður, nokkuð þéttbyggður, 1,80 á hæð og með góða boltameðferð. Hann reynir oft að sóla og komast í gegnum varnarpakka með hraða og þríhyrningaspili. Tekur bæði yfir- og undirhlaup við kantmanninn og opnar þar með vel fyrir þá. Stundum vantar end-product hjá honum en hann hefur þótt bæta það töluvert á seinna tímabili sínu með Bournemouth. Hann hefur verið lítið frá vegna meiðsla, er hraður og sterkur en fær gjarnan á sig spjöld. Hann á líklega eftir að læra stöðufærslur hjá Liverpool, þær verða að mörgu leyti öðruvísi en hann er vanur frá bæði Bournemouth og AZ Alkmaar.
Ég vona að Liverpool haldi Andy Robertson og að tími Kostas okkar Tsimikas hjá félaginu ljúki. Ef við verðum með Andy og Milos verður vinstri bakvarðarstaðan ótrúlega öflug, jafnvel þótt Robbo sé að eldast. Þeir munu geta bætt hvorn annan upp og komið með geggjað orkustig í seinni hluta leikja og raunar á svipað við um hinum megin þar sem Jeremie nokkur Frimpong er kominn til að tryggja sér hægri bakvarðarstöðuna.
Hver er Jeremie Frimpong?
For me, everywhere I’ve been I’ve always won things. It’s always been the cups and the league, so I’ve always won trebles. So yes, I want to win trebles, I want to win trophies – I play football to win trophies. I want to win as many trophies as possible.
OK, já takk, til í það. Þetta sagði Jeremie Frimpong í viðtali sem var tekið við hann þegar hann var tilkynntur sem leikmaður félagsins. Hann var sá fyrsti sem var keyptur þetta sumarið.
Jeremie Frimpong er elstur þessara þriggja nýju útileikmanna sem hafa verið keyptir til liðsins. Hann fæddist 10.desember árið 2000 og er því 24 ára gamall. Hann er hollenskur en á ættir að rekja til Ghana. Hann flutti til Englands 7 ára gamall með fjölskyldu sinni. Foreldrar hans völdu reyndar ekkert sérlega góðan stað til að búa á, þau fluttu til Manchester þar sem drengurinn æfði hjá AFC Clayton og Clayton Villa áður en hann fór til Manchester City 9 ára gamall. Hann lék með City til 19 ára aldurs og var þá leyft að fara frá félaginu og hann fór til Glasgow-borgar, nánar tiltekið til Celtic. Þar lék hann fyrsta meistaraflokksleik sinn á ferlinum, gegn Partick Thistle. Hann var bara maður leiksins og tryggði sér fljótlega fast byrjunarliðssæti. Þarna var hann 19 ára gamall. Hann lék síðan alls 36 leiki fyrir Celtic fram til janúar 2021 að hann var keyptur til Leverkusen, þaðan sem hann kemur svo til Liverpool.
Á þessu fyrsta hálfa tímabili sínu hjá Leverkusen spilaði hann alls 13 leiki en hin fjögur tímabilin spilaði hann alls 34 leiki, og svo 47-48 leiki. Alls á hann 190 leiki og 30 mörk. Þess má geta að hann er með 22 mörk á síðustu þremur tímabilum í Bundesligunni. Þá hefur hann leiki 13 leiki og skorað eitt mark fyrir Holland auk fjölmargra yngri landsleikja. Í samanburði við Kerkez er leiðin hans til Liverpool mun einfaldari, færri lið og færri flækjur á ferlinum.
Helstu eiginleikar sem leikmaður
Jeremie Frimpong er 1,71 á hæð, lítill, sterkur og fljótur kubbur. Líkt og Kerkez er hann með mikinn sprengikraft, við erum kannski að fá sóknarlega frekar svipaða leikmenn beggja megin með yfir- og undirhlaup í sóknarleiknum, aggresíva, sterka og hraða leikmenn. Hann er líka frekar sterkur í návígjum, við eigum eftir að sjá hann vinna boltann oft í pressu framarlega á vellinum. Ég held að honum finnist ekkert mjög gaman að verjast og þess vegna gæti hann átt á hættu að skilja eftir sig, líkt og vaninn er með Trent, ansi stórt svæði sem miðvörður eða djúpur miðjumaður þarf þá að kovera. Eins á hann erfitt með að verjast einn á einn. Allt í allt, geggjuð viðbót sem sumir sjá líka sem mögulegan varamann fyrir Salah en á mest eftir að deila stöðunni með Conor Bradley.
Þessir tveir guttar líta út fyrir að vera mjög sterk viðbót og greinileg áherslubreyting í bakvarðarstöðunum. Við vitum að Conor Bradley er líka beinskeyttur, fljótur og kannski ekki í sama sendingaham og Trent. Kerkez og Frimpong eru það ekki heldur en mér sýnist sem hraði og sprengikraftur sé það sem Slot sé að leita að í þessum stöðum. Mér sýnist hann sé frekar að leita að sóknar-vængbakvörðum heldur en sterkum varnarmönnum en að sama skapi eru slíkir bakverðir nú þegar hjá félaginu, Robertson og Bradley eru líklega sterkari varnarlega en nýju gæjarnir.
On we go, það er meira framundan í sumar og vonandi fæ ég að skrifa fleiri djúsí greinar um nýja leikmenn.
