Man[ritskoðað] United

Þetta, gott fólk, er Darren Fletcher. Hann leikur fyrir Man U – lið sem lifir á fornri frægð, öfugt við okkar menn sem hafa unnið titil á árinu 2005. Man U hafa ekki unnið titil síðan 2003, en þá unnum við einmitt líka titil. Árið 2002 vann hvorugt liðið titil, en árið 2001 unnu þeir tvo titla – á meðan við unnum fimm.

Með öðrum orðum, þá er þessi áratugur hálfnaður og tölurnar tala sínu máli: við höfum unnið ógeðslega mikið, þeir ógeðslega lítið síðustu fimm árin! Þannig að á morgun má með sanni segja að mætist STÓRLIÐ, og svo hins vegar fyrrverandi stórlið.

🙂 Ójá, þið vitið að þetta er satt hjá mér …

En allavega, það hefur nú oftast verið svo með viðureignir þessara hötuðustu erkifjenda Norðvestur-Englands að það skiptir nákvæmlega engu máli hvar í deildinni liðin eru stödd, né hversu sigursæl undanfarin misseri/ár þessi lið hafa verið. Annað liðið gæti verið í botnsæti þriðju deildar og hitt liðið Englandsmeistarar, en innbyrðis viðureignir Liverpool og Man U eru og verða alltaf gríðarlega spennandi leikir!

United-menn hafa svo sem byrjað tímabilið sæmilega. Þrír sigrar og eitt jafntefli í deildinni til þessa, og svo jafntefli á erfiðum útivelli í fyrstu umferð Meistaradeildarinnar. Hins vegar eiga þeir í meiðslavandræðum um þessar mundir, þótt svo að Roy Keane kunni að snúa aftur í liðið á morgun þá eru þeir án manna eins og Gary Neville, Gabriel Heinze, Quinton Fortune, Louis Saha og Wes Brown, þannig að leikmannahópur þeirra er vægast sagt þunnskipaður.

Okkar menn eru með 5 stig eftir þrjá leiki í deildinni, eða helminginn af þeim stigafjölda sem Man U eru með (10 stig) og unnu fyrsta leikinn í Meistaradeildinni á erfiðum útivelli í vikunni. Hjá okkar mönnum eru þeir Fernando Morientes, Harry Kewell og Neil Mellor á meiðslalistanum, en við erum með talsvert stærri hóp en Man U eins og staðan er í dag og því ljóst að útiliðið á morgun á á brattann að sækja.

MAN[ritskoðað] UNITED:
Ef við gerum ráð fyrir því að Roy Keane komi inn í lið United, þá tel ég nokkuð líklegt að Sir Alex Ferguson muni stilla sínu liði upp svona:

Nú, ef Gary Neville verður einnig í liðinu myndi Kieran Richardson sennilega víkja og John O’Shea fara yfir í vinstri bakvörðinn. Ef Keane verður ekki með finnst mér líklegt að Ferguson setji Ryan Giggs inn í liðið og færi Fletcher inn á miðjan völlinn. Skiptir svo sem engu hverjum þeir stilla upp, þeir hafa ekkert í Alonso, Gerrard og Sissoko að segja. 🙂

LIVERPOOL
Hjá okkar mönnum var talsvert mikið um breytingar á byrjunarliðinu í liðinni viku, en fyrir vikið fengu menn eins og Steven Gerrard, Steve Finnan, Stephen Warnock, John Arne Riise og Djibril Cissé góða hvíld. Þannig að ef við gerum ráð fyrir að þeir komi flestir, ef ekki allir inn í liðið á morgun ætti Rafa að stilla þessu einhvern veginn svona upp:

En hvað veit ég svo sem? Kannski fer Rafa í 4-4-2 og hefur Cissé, já eða Pongolle, frammi með Crouch. Og kannski byrjar Didi Hamann inná á morgun eins og um síðustu helgi? Kannski halda Josemi og/eða Traoré stöðu sinni sem bakverðir? Og kannski kemur þá Finnan inn í liðið fyrir García? Hver veit?

Þetta er eitt af því sem ég er farinn að venjast með Rafa og finnst vera einn hans helsti kostur: Liverpool er ekki lið sem spilar einhvern einn ákveðinn stíl af knattspyrnu. Við notum ekkert eina fasta leikaðferð í öllum leikjum, og fyrir vikið er nánast ómögulegt fyrir andstæðingana að reyna að undirbúa sig fyrir leiki gegn okkur. Við vitum hvernig sóknarbolta United munu spila á morgun, við vitum að Ronaldo verður á kantinum og Rooney út um allt að hamast. Við vitum að Van Nistelrooy verður ofan í bringunni á Hyypiä allan leikinn, bíðandi eftir tækifæri til að skutla sér á boltann og koma honum yfir línuna.

En við? Hvað vita Man U menn um okkur? Svar: nákvæmlega ekki neitt! Og það mun pottþétt vera okkur í hag í þessum leik, alveg jafnt og það var okkur í hag sl. miðvikudag.

MÍN SPÁ: Ég hef sagt það áður og ég segi það aftur – ef við sigrum United ekki á morgun þá getum við hætt að reyna að segja okkur að við séum með betra lið en þeir! Þeir eru í meiðslavandræðum, leikurinn er á Anfield, við erum með nærri því fullskipað lið, það er einfaldlega allt við þennan leik okkur í hag.

Þannig að ég ætla að spá Liverpool 3-1 sigri á morgun. Við komumst í 3-0 en þeir skora svo eitt undir lok leiksins, smá sárauppbót. Og … [trommusláttur] … ég ætla að spá því hér og nú að Peter Crouch muni skora fyrsta mark sitt fyrir Liverpool á morgun! Og hana nú!

Fokking Mansjéster Júnæted! Á Anfield! RÚSTUM ÞEIM!!! Áfram Liverpool!!!