Oldham á morgun

Annað árið í röð mætum við Oldham Athletic í FA Cup en núna á heimavelli þeirra, Boundary Park, einum elsta og versta heimavelli deildarliða á Englandi. Ferðalagið er alls ekki langt enda nánast hægt að flokka Oldham sem úthverfi Manchester en ég kom inn á þetta og margt fleira tengt félaginu í upphitun fyrir leikinn í fyrra, sjá hér.

Þegar þessi lið mættust á síðasta ári var Luis Suarez málið í hámæli enda FA nýlega búið að fella fáránlegan dóm sinn og þessi viðburður var of mikið fyrir einn leikmanna Oldham sem tók upp á því að fara grenja í miðjum leik og bar því að hann hafi orðið fyrir kynþáttaníði. Seinna kom ef ég man rétt í ljós að hann var sá eini sem “heyrði” þetta og var líklega eitthvað að blanda saman eigin skoðun og þeirri staðreynd að það voru þrír stuðningsmenn Liverpool saman í í stúkunni í stuðningsbolum fyrir Suarez.

Þetta mál dó a.m.k. út en kom auðvitað á æðislegum tíma fyrir Liverpool og var helsta umræðuefni fjölmiðla eftir leik sem voru búnir að vera í herferð gegn öllu tengdu Suarez. Blessunarlega er ekkert svona bull í gangi um þessar mundir og verður vonandi ekki. Ég bíð samt spenntur eftir að sjá hvort stuðningsmenn Oldham taki lagið um Suarez því eins og ég kom inná í upphitun í fyrra er þetta svæði þekkt fyrir áratuga baráttu gegn kynþáttafordómum.

Leikurinn í fyrra var mjög mikilvægur fyrir Oldham sem er alls ekki í góðri stöðu fjárhagslega og alls ekki í góðu formi í deildinni núna. Liðið hefur aðeins náð í eitt stig úr síðustu átta leikjum og tapað sjö leikjum á heimavelli í deildinni það sem af er þessu tímabili. Paul Dickov er ennþá stjóri liðsins en framtíð hans er í óvissu og um jólin var staða hans gerð miklu erfiðari þegar þriggja manna starfsliði hans var sagt upp og hann skilinn einn eftir með alla vinnuna. Hann var nýlega í viðtali við The Guardian þar sem hann viðurkenndi að síðustu vikur hefðu verið erfiðar og að hann væri að vinna 26 tíma á sólarhring eftir að starfsliði hans var sagt upp.

Ofan á þetta hefur æfingasvæði Oldham verið frosið sl. vikur og liðið fengið að æfa í innanhússaðstöðu Man City á meðan. Til að toppa allt saman hefur snjóað gríðarlega á Englandi undanfarna daga og því nokkur óvissa hvort leikurinn geti farið fram á morgun.

Svona leit völlurinn út í morgun (og seinna um daginn)

Heimasíða Oldham inniheldur meira af fréttum um að þeir ósku eftir sjálfboðaliðum með skóflur til að hreinsa völlinn og svæðið í kring heldur en fréttir af leiknum sjálfum. Auðvitað til að leikurinn geti farið fram og verið er að vinna á fullu svo að það geti orðið.

Oldham er sem stendur í 19.sæti í þriðju efstu deild (League 1) og er 4 stigum fyrir ofan fallsvæðið en hafa spilað tveimur leikjum fleira en flest liðin í kringum sig.

Gengi Oldham er eins og gefur að skilja mun betra í bikarnum en til að fá þennan leik gegn Liverpool hafa þeir þurft að leggja Kidderminster, Doncaster og Nottingham Forrest á útivelli. Þannig að þeir eru komnir einni umferð lengra í ár heldur en í fyrra þar sem liðin mættust í þriðju umferð á síðasta tímabili.

Kenny Dalglish tók þennan leik, líkt og aðra bikarleiki mjög alvarlega á síðasta tímabili og stillti upp nokkuð sterku liði Reina, Aurelio (Flanagan – 71′), Coates, Carragher, Kelly, Gerrard, Maxi, Spearing, Shelvey, Kuyt (Carroll – 87′) og Bellamy (Downing – 74′)

Oldham komst yfir í fyrri hálfleik í þessum leik en Gerrard og Bellamy náðu að leiðrétta það fyrir hlé. Shelvey, Carroll og Downing innsigluðu svo 5-1 sigur í seinni hálfleik.

Af þeim 14 leikmönnum Liverpool sem spiluðu þennan leik í fyrra eru 6 farnir og liðið á morgun verður ennþá meira breytt milli leikja en það. Reina er meiddur (nári) en ætti að verða klár gegn Arsenal. Enrique er líka meiddur en ætti að fara koma aftur fljótlega. Martin Kelly er sá eini sem er ekki væntanlegur í bráð en auk þessara er Assaidi að keppa í Afríkukeppninni og því ekki með á morgun…sem hann yrði hvort eð er ekki að öllum líkindum.

Nokkrir leikmenn þurfa að fá spilatíma hjá okkur og nokkrir góðir hafa ekki verið í liðinu undanfarið, líklega verða þeir í aðalhlutverki á morgun.

Spái að þetta verði ca. svona:

Ég hef nákvæmlega ekkert yfir mér í þessari ágiskun. Tippa þó á að Suarez og Gerrard hvíli í þessum leik, a.m.k. til að byrja með og svo er orðrómur í gangi þess efnis að Johnson sé eitthvað tæpur og hann verður þá vonandi ekki notaður heldur. Blessunarlega á Rodgers fjölmarga aðra kosti í stöðunni og ef eitthvað er að marka fréttir gæti einn til viðbótar bæst við strax í næstu viku, brasilíumaðurinn Coutinho frá Inter.

Spá: Tökum þetta nokkuð örugglega, 0-4 og Sturridge kemst í sögubækur Liverpool með að skora í fyrstu fjórum leikjum sínum fyrir Liverpool. Hann gerir gott betur en það og hleður í þrennu í þessum leik. Borini skorar engu að síður fyrsta mark leiksins.