Leikmannakaup Liverpool

Tíminn er það eina sem getur skorið úr um þetta en þrátt fyrir frammistöðu hans á síðasta tímabili held ég að Luis Suarez hafi ekki verið mikilvægasti starfsmaður Liverpool F.C. heldur maðurinn sem gerði honum kleyft að spila eins vel og hann gerði.

Brendan Rodgers virkar á mann sem stjóri sem þarf ekki að kippa niður um sig fyrir framan hópinn í örvæntingafullri tilraun til að sýna hversu stórar hreðjar hann hefur.

Rodgers hefur sýnt það í verki með því að ekki bara koma Swansea upp um deild með því að spila sóknarbolta heldur með því að endurtaka leikinn í Úrvalsdeildinni með nánast sama hóp. Hann hefur snúið gengi og hugsunarhætti Liverpool við á tveimur tímabilum og það að stórum hluta með því að leggja traust sitt á unga og óreynda leikmenn og bullandi sóknarbolta. Það þarf hugrekki til að gera slíkt í því vinnuumhverfi sem Rodgers er að vinna og þetta hefur svínvirkað. Skiptir þá ekki hvort horft er til ungra og óslípaðra leikmanna eða stórstjarna, allir hafa stórbætt sig hjá Rodgers, sérstaklega sóknarlega.

Salan á Suarez er nánast útrædd og öllum ljóst að það er gríðarlega stórt skarð í sóknarleiknum sem þarf að fylla. Ef einhverntíma það var til leikmaður sem ekki á sér annan líkan þá er það Luis Suarez. Það þýðir samt ekki að ekki sé hægt að bæta liðið þrátt fyrir að hann sé farinn, alls ekki enda fótbolti ekki svona einfaldur. Eftir leikmannaglugga síðasta sumars og frammistöðu þeirra sem keyptir voru inn er með ólíkindum hversu nálægt Liverpool var að vinna deildina. Það helsta sem gerðist var að þeir leikmenn sem voru búnir að spila heilt tímabil undir stjórn Rodgers voru farnir að meðtaka mun betur hans hugmyndir og sáu hversu árangursrík hún var. Þetta var reyndar þegar hafið undir lok fyrsta tímabils Rodgers og ennþá er stór hluti hópsins ekki kominn á þann aldur sem leikmenn toppa vanalega.

Salan á Bale vs salan á Suarez
Tottenham er eðlilega það víti til varnaðar sem við horfum til og áhrif sölunnar á Bale á þeirra lið (sem var stigi frá sæti í meistaradeildinni) án hans. Þó skal tekið fram að þrátt fyrir söluna á Bale og það flopp sem leikmannaglugginn hjá þeim var munaði heilum þremur stigum á milli tímabila hjá Tottenham. Þeir voru með 72 stig lokatímabil Bale en 69 stig eftir síðasta vetur. Hvað ef fleiri en Eriksen hefðu náð að spila að eðlilegri getu? Eins má ekki gleyma að flestir þessara manna eru enn á fínum aldri og nú búnir að aðlagast lífinu á Englandi.

Helsta ástæðan fyrir því að ég fór að velta þessu fyrir mér og skoða leikmannaviðskipti Liverpool undanfarið er m.a. þetta skondna tíst

Liverpool doing what Spurs did last season. Selling an iPhone and buying a pager, a phone, a fax machine, a camera and a pen to replace it.

— Futhead News (@futheadnews) July 21, 2014

Persónulega á ég Samsung Galaxy og ef ég nota hann sem dæmi þá hef ég ekki efni á að eiga tvo í einu og var því í tómu tjóni þær þrjár vikur sem síminn var í meðferð um daginn (KAR hellti hann fullann árshátíðardag Liverpoolklúbbsins). Símafyrirtækið gaf mér í staðin algjöran Aspas síma. Liverpool hefur reyndar áður leyst fjarveru Suarez betur en ég símavesenið en punkturinn er að mögulega er betra að styrkja veikustu hlekki liðsins en að treysta nær eingöngu á einn leikmann sem btw. er ekki gott að treysta.

Liverpool er núna búið að kaupa hryggsúlu Southamton liðsins plús tvo af efnilegri leikmönnum Evrópu í dag. Lovren var besti varnarmaður Southamton í fyrra og spilaði mjög svipaðan fótbolta þar eins og hann mun gera undir stjórn Rodgers, verðið á honum er hátt og hefur hækkað mjög mikið á einu tímabili en líklega var það gott fyrir Liverpool að hann hafi fengið að aðlagast Englandi í eitt ár. Það er meira en Sakho sem hefði alveg mátt við því, báðir koma þeir úr Frönsku deildinni.

Lallana og Lambert sáu um stóran part sóknarleiks Southamton og styrkja hópinn a.m.k. mjög vel m.v. síðasta tímabil. Báðir duglegir leikmenn með ágæta reynslu sem fá líklega mikið að spila í vetur.

Can og Markovic fá líklega strax séns hjá Rodgers sem hefur sýnt það áður að hann treystir ungum leikmönnum mun fyrr en margir kollegar hans og lætur þá spila fótbolta sem hentar þeim hvað best. Báðir eru ákaflega spennandi og búa yfir mun meiri hraða en margan grunaði. Allir þessir leikmenn virðast mjög góðir íþróttamenn með afar gott hugarfar. Einhverjir þeirra eiga ekki eftir að slá í gegn, það gerist alltaf en vonandi bætum við árangur Tottenham.

Þar fyrir utan hefur byrjunarliði Liverpool frá síðasta vetri ekki mikið verið hróflað, við eigum ennþá alla hina sem við viljum halda.

Af hverju er ekki keypt stórt nafn?
Sjáum til hvað gerist í þessum glugga og útilokum ekkert en FSG virðast fyrir alvöru vera hugsa leikmannamarkaðinn öðruvísi en margir aðrir, a.m.k. öðruvísi en margir stuðningsmenn Liverpool myndu vilja sjá. “Þeir kaupa aldrei nein stór nöfn”, “þeir kaupa allt of mikið af bretum” og “þeir eru oftast mjög lengi að klára flesta kaupsamninga”. Flest höfum við látið eitthvað af þessum atriðum fara í taugarnar á okkur á einhverjum tímapunkti. Þetta með stóru nöfnin og bretana langar mig að skoða aðeins betur.

Alvöru leikmannakaup.
Eðlilega vilja margir sjá alvöru stjörnu koma í staðin þegar leikmaður er seldur á £75m, einhvern sem hefur sannað sig annarsstaðar og er tilbúinn í slaginn eins og skot hjá Liverpool, Alexis Sanchez hefði t.a.m. verið þannig leikmaður og á “ásættanlega” háa fjárhæð. Trikkið er þó að Liverpool hefur aldrei keypt þessa stjörnu, a.m.k. ekki sl. 15 ár. Liverpool hefur líklega aldrei keypt leikmann sem var á hátindi ferilsins og talinn meðal þeirra 10-15 bestu í heiminum. Hinsvegar hefur félagið oft keypt leikmenn sem ná þessum status hjá Liverpool og fara jafnvel fyrir mun hærri fjáhæð.

Tökum saman dýrustu leikmenn sem Liverpool hefur keypt frá 1999/00. Viðmiðið eru leikmenn sem kostuðu £10m eða meira. Tölurnar eru teknar af yfirburðasíðunni LFCHistory.net

Hafa ber í huga að t.d. Heskey og Diouf eru meðal dýrustu leikmannakaupa Liverpool m.v. núvirði, svipað dýrir og Andy Carroll. Cisse,

Diouf og Babel áttu allir að verða stórstjörnur en voru á endanum lítið annað en peningaeyðsla. Það er auðvitað huglægt mat hverst og eins í hvaða flokk leikmenn lenda og líklega dæma einhverjir t.d. Heskey betur eða setja Johnson strax í flokk vondra kaupa, þeir verða bara að vera ósammála mér hérna.

Allir þeir sem ég flokka sem góð kaup urðu þau nöfn sem þeir eru í dag meðan þeir voru leikmenn Liverpool. Henderson og Sturridge hefa báðir rúmlega tvöfaldað virði sitt og hinir voru allir seldir með hagnaði.

Hvað rest varðar þá var Meireles ekkert svakalegt flopp og heldur ekkert frábær kaup og því set ég hann þarna.

Dýrasti leikmaðurinn það sem af er þessum leikmannaglugga, Adam Lallana er líklega ekki að fara til Barca eða Real fyrir meiri pening en við borgum núna og er líklega ætlað að taka út sín bestu ár sem leikmaður Liverpool. Lovren og Sakho hafa alla burði til að verða öflugt miðvarðapar til margra ára. Markovic og Can eru mjög líklegir til að skapa sér alvöru nafn í fótboltaheiminum sem leikmenn Liverpool. Öll stóru leikmannakaupin hingað til eru áþekk því sem Liverpool hefur alltaf reynt að gera þegar kemur að stórum fjárútlátum, kaupa menn sem ættu að halda virði sínu eða auka það umtalsvert.

Kaup FSG á Breskum leikmönnum – Verðmunur
Frá tímabilinu 1999/00 til dagsins í dag hefur Liverpool keypt 28 leikmenn sem flokka má sem Breska, þ.e. leikmenn sem hafa farið upp yngri flokka í á Bretlandseyjum, flesta með reynslu af Úrvalsdeildinni áður en þeir komu til Liverpool. Á sama tíma hefur Liverpool keypt 77 leikmenn annarsstaðar að úr heiminum.

Úrtakið miðast við leikmenn sem spilað hafa 10 leiki eða voru keyptir á 0,5m eða meira. Ekki er heldur tekið neitt mið af lánsleikmönnum. Hafa ber í huga að upphæðir eru miðaðar við kaupverð á hverjum tíma fyrir sig, ekki núvirði sem væri réttara að nota og gæfi betri mynd. Eins er ekkert tekið mið af leikmannasölum eða launakostnaði sem skiptir ekki minna máli en kaupverð.

Allavega Liverpool hefur frá 1999/00 keypt 28 leikmenn og það skal kannski engan undra að þessum leikmannakaupum sé jafnan tekið með fyrirvara og tortryggni. Miðað við tölur af LFCHistory er kaupverðið á Breskum leikmönnum samtals 232m og meðalverð því 8,3m. Heildarkaupverð á erlendum leikmönnnum er hinsvegar 426m og meðalverð 5,5m. (Munum að núvirði myndi hækka þessar upphæðir umtalsvert og gefa mun betri mynd m.v. daginn í dag. Heskey og Diouf eru vel rúmlega 30m menn á núvirði).

Skoðum aðeins afhverju stuðningsmenn Liverpool taka breskum leikmannakaupum jafnan með fyrirvara. Fyrir tíma FSG voru þetta þeirra helstu afrek á leikmannamarkaðnum, munum að þetta er mun verra m.v. núvirði:
Jonjo Shelvey £1,7m, Joe Cole, Danny Wilson £2,0m, Brad Jones £2,3m, Paul Konchesky £3,5m, Glen Johnson £17,5m, Raheem Sterling £0,5m, Robbie Keane £19m, Craig Bellamy £6,0m, Jermaine Pennant £6,7m, Peter Crouch £7,0m, Jack Hobbs £0,75m, Scott Carson, £1,0m, Steve Finnan £3,5m, Harry Kewell £5,0m, Chris Kirkland £6,0m, Gary McAllister, Nick Barmby £6,0m, Emile Heskey £11,0m.

FSG hafa stundum verið sakaðir um að kaupa of mikið frá Bretlandseyjum og vissulega er eitthvað til í því. Ekki bættu þeir árangurinn í sínum fyrstu leikmannakaupum þegar þeir hentu 35m í Andy Carroll. Þeim til varnar hafa þeir aðeins verið með Breska knattspyrnustjóra og tóku nokkur ár í að koma sér upp njósnaradeild sem starfaði eftir þeirra hugmyndafræði. Sú deild tók fyrst til sín eftir endurnýjun í janúar 2013.

Svona er þetta undir stjórn FSG (notum áfram tölur LFCHistory sem reyndar virðast alltaf m.v. við hæsta mögulega verð).

FSG hefur keypt 10 leikmenn sem flokka má sem Breska. Þeir hafa á móti keypt 17 sem koma annarsstaðar að úr heiminum. 13 af 27 höfðu reynslu úr Úrvalsdeildinni áður en þeir gengu í raðir Liverpool.

Heildarkaupverð Bresku leikmannanna var 133,3m eða 13,3m að meðaltali á meðan aðrir leikmenn hafa samtals kostað 151,8m eða 8,9m að meðaltali. Hérna er núvirði ekki eins mikið að skekkja myndina.

Bretar virðast eins og allir vissu kosta meira en aðrir leikmenn og Liverpool undir stjórn FSG virðist leita að leikmönnum í Ensku Úrvalsdeildinni í helmingi tilvika. Það getur varla talist óeðlilegt m.v. að það er sama deild og Liverpool spilar, það er sú deild sem stjórinn þekkir hvað best og um leið ein besta deild í heimi.

FSG virðist leita aðeins meira inná Úrvalsdeildarmarkaðinn en gert hefur verið frá tímabilinu 1999/00 en hafa ber i huga að FSG hefur eingöngu haft stjóra frá Bretlandseyjum uppalda í enska boltanum. Knattspyrnustjórar leita langflestir á þann markað sem þeir þekkja best, Houllier verslaði mikið í Frakklandi þó deila megi um hvort hann hafi haft nokkurt vit á þeirri deild m.a. innkaupin. Benitez verslaði mikið á Spáni á meðan Roy Hod…(nei vá, skítt með hann).

Allir leikmenn sem keyptir hafa verið undir stjórn FSG hafa töluvert potential og hópurinn sem þeir hafa keypt (sem heild) er mjög líklegur til að hækka mjög mikið í verði. Einstaka leikmenn koma ekki til með að gera það eins og gengur og gerist en hópurinn sem heild kemur út í töluverðum plús. Kolo Toure og Rickie Lambert koma ódýrt með kosti sem hentar hópnum strax.

Einu leikmannakaupin sem töluvert erfitt er að skilja eru á hinum þá 27/28 ára gamla Stewart Downing fyrir tæplega 20m. Mögulega fer Lallana í þann hóp en hann er þó bæði betri og 2 árum yngri þegar hann kemur til Liverpool. Líklega mun FSG ekki kaupa annan Downing í bráð enda fór það svo að hann var seldur á töluvert lægri upphæð en hann var keyptur. Andy Carroll er mun frekar áhætta sem ætti ekki að koma á óvart að sjá FSG þora að taka.

Niðurstaða.
Salan á Suarez ætti alls ekki að koma eins illa við Liverpool og salan á Bale gerði hjá Spurs í fyrra. Rest af hópnum hjá Liverpool skoraði 70 mörk í deildinni í fyrra en það er meira en Tottenham hefur nokkurntíma gert í Úrvalsdeildinni. Bale var mun oftar að skera úr um öll stigin fyrir Tottenham á meðan hluti marka Suarez kom í leikjum sem þegar var búið að slátra. Ekki að ég vilji vanmeta þátt Suarez í að ganga frá þeim leikjum. Tottenham þurfti að breyta um leikstíl og fékk inn leikmenn með samtals 0 leiki í ensku úrvalseildinni. Það var gríðarleg áhætta og erfitt í liði sem var töluvert varnarsinnað, mun meira en Liverpool í fyrra.

Öll leikmannakaup Liverpool “meika sense”, Lovren og Lallana hafa þegar sannað sig í svipaðri tegund fótbolta í sömu deild sem minnkar áhættuna á að þeir floppi. Áhættan er auðvitað ennþá til staðar en þeir tikka í mörg box og það er vel hægt að skilja hugsunina á bak við þessi kaup. Persónulega óttast ég þó mest að Lallana verði mesta floppið af þeim sem búið er að kaupa nú þegar og hlakkar til er hann lætur við éta þessi orð ofan í maga

Eins er frábært að Liverpool er að landa sínum aðal skotmörkum sem er annað en verið hefur undanfarin ár. Lambert bíður upp á nýja möguleika í sóknarleiknum sem vantaði einstaka sinnum síðasta vetur. Borini eða nýr sóknarmaður getur svo varla verið verri en Aspas var í fyrra.

Can er svakalega spennandi leikmaður og fer að öllum líkindum beint í hópinn. Hann virkar heldur betur tilbúinn í slaginn, a.m.k. líkamlega og hefur hraða sem gæti orðið spennandi vopn úr hans stöðu. Can gæti gefið miðjunni gríðarlegan aukin kraft í vetur og næstu ár, kvikindið er bara 20 ára.

Markovic er svo ekta leikmaður sem ætti að springa út hjá Rodgers. Þeir sem fylgst hafa með Portúgölsku deildinni eru á því að hann sé líklega ekki tilbúinn í Úrvalsdeildina strax en sé mikið efni. Svipað og sagt var um Coutinho, Sterling og Sturridge áður en þeir sprungu út. Hvað þá Flanagan. M.ö.o. ef ég þekki Rodgers rétt fer Markovic beint í liðið.

Enn hefur ekki verið fyllt upp í alla veiku blettina en með því að skoða sögu Liverpool á leikmannamarkaðnum ætla ég að búa mig frekar undir 1-2 fleiri leikmenn sem styrkja hópinn frekar en stóru stjörnuna fyrir Suarez. Eins mikið og ég væri til í Marco Reus eða álíka nafn.