Mun Sheva spila á Anfield?

Sú var eitt sinn tíðin að Andryi Shevchenko var mest óttaði framherji heimsins. Og nei, ég er ekki að tala um síðustu öld heildur meira svona fyrir átta mánuðum síðan eða svo. Hjá AC Milan hafði risinn fundið sér kastala af sinni stærð og Sheva hafði í betri part áratugs verið einn helsti framherji heimsins. Ef okkur finnst erfitt að trúa því í dag er nóg að rifja upp vantrúna á andlitum allra Púllara (og allra hinna, sennilega) þegar hann skaut að marki undir lok framlengingarinnar í Istanbúl 2005 gegn Liverpool og Dudek varði.

Síðasta sumar skipti Shevchenko svo um lit og klæddist bláu treyju Chelsea. Slíkur hafði ferill hans verið að maður efaðist aldrei um að hann myndi gera neitt annað en raða mörkum fyrir Englandsmeistarana líka en það hefur heldur betur ekki orðið raunin. Í dag er staðan víst orðin svo slæm innan klúbbsins að þetta virðist vera orðin spurning um hvort Mourinho eða Shevchenko fari frá Chelsea. Og því miður fyrir Mourinho eru þeir Shevchenko og Roman Abramovich, eigandi félagsins, perluvinir.

Independent tala um það í dag að José Mourinho gæti neyðst til að velja Sheva í byrjunarlið sitt gegn Liverpool á laugardag hreinlega til að halda starfi sínu fram yfir helgina. Þótt sögur af krísu Chelsea-liðsins inná vellinum séu stórlega ýktar (það eru fleiri en Rafa sem þurfa að verjast hysteríu þessa dagana) er ljóst að það er eitthvað mikið að innan æðstu raða klúbbsins. Ágæta grein um ástandið má finna hér á SoccerNet.

Hvað gerist á laugardaginn? Þetta mál varðar okkar menn í Liverpool þó nokkuð, því vegna þessa innanbúðarástands hefur skapast óvissa bæði í kringum lið Mourinho á vellinum og framtíð hans hjá klúbbnum og það skilar sér í óstyrkari spilamennsku en menn eiga að venjast frá þessum ríkasta klúbbi veraldar. Hverjir eru möguleikarnir í stöðunni? Ef Mourinho gerist hugrakkur og hefur Sheva á bekknum og tapar svo, verður hann þá látinn hætta í næstu viku eins og Independent-greinin virðist ýja að? En ef hann hefur Sheva á bekknum og vinnur örugglega? Er framtíð Sheva þá ráðin?

Þetta er bara enn einn spennandi póllinn í annars margpóla hæð þegar þessi leikur er annars vegar. Bæði lið eru í þeirri stöðu að verða að vinna, hvorki Benítez né Mourinho geta sætt sig sérstaklega vel við jafntefli miðað við gagnrýni og pressu á störf sín undanfarið og staða liðanna í deildinni er slík að hætta er á að Arsenal og/eða Man U nái forskoti á annað hvort liðið ef illa fer.

Í haust eftir að við töpuðum 1-0 á Stamford Bridge (fjandinn hafi þig, Drogba!) var ég orðinn svo þreyttur á að sjá okkar menn keppa við Chelsea að ég vonaði helst að við þyrftum aldrei að mæta þeim aftur. En nú finn ég spenninginn byggjast upp á ný og mig hlakkar reglulega til laugardagsins, þvert á eigin væntingar. Auðvitað er stór séns á að við töpum þessum leik eins og reglulega gegn stóru liðunum, en kannski … kannski … er komið að okkur að brosa í deildarleik gegn Chelsea. Þetta verður allavega mjög fróðlegt, og hvort sem hann spilar eða ekki getið þið bókað að Andryi Shevchenko verður eitt aðalumræðuefnið eftir þennan leik!

Þrír dagar.