Southampton á morgun

Það er komið að tíundu umferð Úrvalsdeildarinnar og í þetta sinn koma Southampton-menn í heimsókn á Anfield á morgun, sunnudag og freista þess að neita Jürgen Klopp um sinn fyrsta sigur sem stjóri Liverpool. Bæði lið sitja um miðja deild með 13 stig eftir níu leiki, Dýrlingarnir með eru með betri markatölu og sitja því ofar.

Reyndar ber svo við að öll liðin fyrir ofan Liverpool, utan Tottenham, mætast innbyrðis um helgina og því er séns á að stökkva upp um þó nokkur sæti fyrir það lið sem getur innbyrt sigur á Anfield á morgun. Línur munu skýrast, eins og klisjan orðar það. Eða þá að allir gera jafntefli og ekkert breytist.

Kíkjum á mótherjana.

Southampton

Suðurstrandarliðið er endanlega búið að bíta af sér einhvern nýliðabrag eða spútnikstimpil. Það gerðu þeir með hvelli á síðustu leiktíð þar sem hver spekingurinn á fætur öðrum spáði ótímabærum dauða liðsins, til þess eins að fá spána blauta í andlitið þegar liðið náði sínum besta árangri í efstu deild í fleiri áratugi. Liðið var rótgróið efstudeildarlið lengi áður en fall og svo gjaldþrot hótuðu tilveru félagsins og dýfan náði alla leið niður í þriðju efstu deild. Þeir klóruðu sig þó á endanum upp og vorið 2012 tryggði félagið undir stjórn Nigel Adkins sér á ný þátttökurétt meðal þeirra bestu (og Sam Allardyce).

Síðan þá hefur uppgangur liðsins haldið áfram og varla hægt að segja að liðið hafi litið á sig sem einhvern falldraug síðan liðið snéri aftur í Úrvalsdeildina. Vorið 2013 náði liðið 14. sæti með 41 stig, þægilega fyrir ofan fallið og búið að skipta Adkins út fyrir Mauricio Pochettino. Árið á eftir náði liðið 8. sæti með 56 stig. Þessi velgengni kostaði þá stjórann Pochettino og haug af góðum leikmönnum sumarið 2014 sem varð eins og áður sagði til þess að menn vorkenndu þeim ógurlega. Það gleymdist þó alveg að þeir fengu fleiri tugi milljóna punda fyrir þessa leikmenn (aðallega frá Liverpool) og að það eru fleiri en einn góður stjóri þarna úti. Í stað Pochettino mætti Ronald nokkur Koeman á svæðið og hló að hrakspánum, notaði nokkuð sem nefnist útsendarar til að finna leikmenn eins og Dušan Tadi?, Sadio Mané og Graziano Pellé og niðurstaðan varð enn betra gengi, 7. sætið og 60 stig.

Þetta tímabil hafa þeir svo byrjað nokkurn veginn á pari við síðustu tvö; 13 stig í 9 leikjum gera 1,45 stig í leik sem myndu skila 55 stigum yfir tímabilið. Þeir hafa tapað tveimur leikjum, heima gegn Man Utd og Everton en eru hins vegar ósigraðir á útivelli, hafa unnið þar einn leik (gegn Chelsea, hvorki meira né minna) og náð þremur jafnteflum. Liðið hefur haldið hreinu laki í 3 leikjum af 9 og vann þrjá leiki í röð þar til Leicester náðu jafntefli á St Mary’s um síðustu helgi.

Þetta Southampton-lið er sem sé sterkt og fullt af góðum leikmönnum, leitt af hörkustjóra sem kallar ekki allt ömmu sína og hefur þann einstaka kost að vera sá maður í heiminum sem fer mest í taugarnar á núverandi stjóra Man Utd.

Nú, Liverpool og Southampton hafa mæst sex sinnum síðan þeir síðarnefndu komu aftur upp. Liverpool hafa unnið 4 leiki, Southampton 2 og ekkert jafntefli enn komið milli þessara liða. Á Anfield unnu okkar menn 1-0 sigur í desember 2012 þar sem Daniel Agger skoraði markið áður en Dýrlingarnir hefndu með 1-0 sigri á sama stað í september árið eftir. Í fyrra höfðu okkar menn 2-1 sigur í opnunarleik tímabilsins þökk sé poti Daniel Sturridge undir lokin.

Það má sennilega færa sigur Southampton á Anfield fyrir tveimur árum til bókar sem einn rándýrasta leik í sögu Úrvalsdeildarinnar. Þar voru í byrjunarliði Southampton þeir Nathaniel Clyne, Dejan Lovren sem skoraði sigurmarkið, Adam Lallana sem lagði upp og Rickie Lambert var fremstur. Auðvitað skoða menn fleiri leiki áður en ákveðið er að kaupa leikmann en þessi sigur Dýrlinganna lagði grunninn að hrifningu Brendan Rodgers sem fékk alla fjóra til sín næstu tvö sumrin fyrir hátt í sjötíu milljónir punda. Þrír af þessum leikmönnum eru enn hjá Liverpool og gætu komið við sögu á morgun.

Liverpool

Talandi um okkar menn þá er það helst að frétta að Sturridge er enn tæpur en Klopp sagði í gær að það væri enn vökvi á hnénu hans svo að það yrði að sjá til um helgina. Þekkjandi sögu Sturridge þýðir vökvi á hné á föstudegi nánast pottþétt að hann reimar ekki á sig takkaskó á sunnudegi, því miður. Það er gífurlega svekkjandi að vera með svona demant á launaskránni og fá nánast aldrei að nota hann, en svona er lífið.

Liðið hefur gert jafntefli í fyrstu tveimur leikjunum undir stjórn Klopp og alls 7 (!!) jafntefli í síðustu 8 leikjum, sá áttundi var reyndar sigurleikur svo að liðið er taplaust síðan 12. september. Þetta eru samt allt of mörg jafntefli og þau stafa af tvennu; vörnin er of brothætt og gefur ennþá ódýr mörk og þetta lið bara getur ekki skorað nema eitt í leik.

Byrjum á vörninni. Fyrrnefndur Lovren er að verða heill og Klopp hrósaði Mamadou Sakho í hástert í gær. Það leiðir mig að augljósri spurningu: af hverju ætti Martin Skrtel að vera heilagur í þessu liði? Hann er kominn yfir þrítugt, hefur aldrei verið hluti af virkilega sterkri og traustri vörn (yfirleitt voru það Hyypiä, Carragher eða Agger sem spiluðu frekar á bestu köflunum) og hann var enn og aftur úti að aka gegn Tottenham í síðasta leik, hvar Simon Mignolet bjargaði beikoninu hans oftar en einu sinni. Svo gerði hann sóknarmann Rubin Kazan réttstæðan á fimmtudaginn var. Síðast og alls ekki síst, þá set ég stórt spurningarmerki við að rúmlega þrítugur miðvörður sem er landsliðsfyrirliði Slóvaka og hefur verið á Anfield í átta ár skuli ekki einu sinni hafa komið til greina sem fyrirliði eða varafyrirliði í sumar.

Niðurstaða: það kæmi mér ekkert á óvart ef Klopp prófar Lovren hægra megin við hlið Sakho í næstu leikjum, á kostnað Skrtel. Ef/þegar það gerist ætla ég ekki að mótmæla, og ef Lovren er ennþá Lovren myndi ég setja nýjan, réttfættan miðvörð við hlið Sakho ansi ofarlega í goggunarröðina í næsta leikmannaglugga.

Hitt vandamálið er svo markaskorunin. Það er auðvelt að benda á vandamálið með Sturridge símeiddann og tvo dýrustu sóknarmenn sumarsins meidda en liðið hefur verið að ströggla með þá alla heila síðasta hálfa árið líka svo það eitt og sér útskýrir ekki allt. Það hafa verið klár batamerki á sóknarspilinu síðan Klopp tók við en betur má ef duga skal. Klopp talaði sjálfur um að liðið þyrfti að læra betur á það hvenær er rétt að senda og hvenær rétt að skjóta (hóstCoutinhohóst) en að mínu mati er annað vandamál jafnslæmt skotvali og það er fjöldi snertinga á miðjunni. Í hröðu uppspili Klopp er æpandi áberandi hvað miðjumenn okkar þurfa að klappa boltanum oft áður en þeir senda hann áfram.

Ég horfði á Tottenham-leikinn um síðustu helgi, svo sá ég Arsenal spila hraðar sóknir á eins góðan hátt og hægt er að gera það gegn Bayern í Meistaradeildinni á þriðjudag. Svo horfði ég aftur á Liverpool reyna að sækja hratt á fimmtudag og munurinn var alger; Arsenal-liðið á þriðjudag breytti vörn í sókn og færði boltann oft 40-60 metra upp völlinn í svona 4-5 snertingum alls. FC Bayern er eitt besta félagslið heims og varnarmenn þeirra fengu á tíðum hjartaáfall þegar Özil, Sanchez og Walcott komu í fluggírnum á þá. Þetta minnti mig ógurlega mikið á Suarez, Sturridge og Sterling vorið 2014.

Síðan horfir maður á Liverpool-lið Klopp sem er að reyna sama hlutinn, breyta vörn hratt í sókn svo andstæðingurinn nái ekki að stilla upp í varnarmúrinn, og það líður næstum því yfir mig af pirringi að sjá alla leikmenn þurfa að klappa boltanum 3-4 sinnum og horfa í kringum sig áður en næsti maður fær sendingu.

Lucas, Allen, Can, Milner, Coutinho, Lallana, Origi. Þeir hafa allir verið að gera þetta. Það var í raun hressandi að sjá góða innkomu Roberto Firmino á fimmtudag því hann var ekki eins mikið að þessu, enda skapaði hann strax usla og opnaði fyrir samherja sína.

Maður vonaðist eftir að nýr stjóri af þeirri gráðu sem Klopp er myndi lyfta öllu félaginu og liðið myndi bregðast við með því að vinna strax nokkra leiki en það fór ekki svo og það undirstrikar bara starfið sem bíður Klopp. Hann þarf að fá þetta lið til að sækja hraðar, hætta að klappa boltanum, hlaupa skynsamlegar til að ná að opna vörn andstæðinganna og meta svo betur hvenær er rétt að skjóta og hvenær ekki. Þetta mun ekkert allt komast í lag fyrir leikinn á morgun, höfum það á hreinu.

Hvað leikmannaval varðar langar mig til að sjá hann skoða aðeins breytingar núna eftir að hafa notað nánast sama liðið í fyrstu tveimur leikjunum. Ég vona að Benteke og Firmino séu báðir klárir í slaginn og myndi vilja sjá þá koma inn fyrir Origi, sem hefur unnið vel og staðið sig vel en er hrár og skapar ekki næga hættu einn frammi, og ég hugsa að ég myndi vilja sjá annað hvort Milner eða Lucas/Allen víkja líka. Að mínu mati má Milner alveg fá spark í rassinn og setjast á bekkinn á morgun enda langversti boltaklapparinn af þeim öllum en vegna þrotlausrar vinnusemi drengsins er líklegra að Allen/Lucas víki fyrir Firmino.

Þá myndi ég eins og fyrr segir ekkert gráta það ef Lovren fengi séns í bílastæðinu sem hefur hingað til verið merkt Skrtel.

Mitt lið:

Þetta lið á að geta skorað einhver mörk, fjandinn hafi það.

Mín spá

Ég hnaut sérstaklega um eitt í tölfræðivinnslunni fyrir upphitun: þessi lið hafa mæst sex sinnum í Úrvalsdeildinni síðan Southampton komu upp en ekki enn gert jafntefli. Southampton hefur hins vegar gert þrjú jafntefli í fjórum útileikjum á tímabilinu og okkar menn hafa gert sjö helvítis jafntefli í síðustu átta leikjum sem er alveg fáránlegt.

Það liggur því beint við að spá jafntefli á morgun, er það ekki?

Auðvitað ekki. Klopp er að rífa þetta lið upp afá rassgatinu, það bara tók aðeins lengri tíma en við vonuðum en nú er komið að því, nú bresta flóðgáttirnar. Liverpool vinnur þetta 4-1 og Benteke smellir í þrennu. Koma svo!

YNWA