Stoke, nó djók

Ég viðurkenni það alveg fúslega að ég hef oft verið “peppaðri” fyrir að skrifa upphitun hjá okkar ástkæra félagi. Þetta ömurlega tap gegn West Ham fyrir alltof stuttu síðan, það var bara svo hrikalega slæmt að það hefur haft veruleg áhrif á fótboltalyst mína. Netrúnturinn hefur droppað og það er fátt sem togar í mann að lesa greinar eða umfjöllun um það sem tengist boltanum. Er það vegna þess að maður sé svo hrottalega óvanur því að tapa fótboltaleikjum að þegar það loksins gerist, þá sökkvi maður djúpt niður? Nei, svo sannarlega ekki. Því miður er maður alltof vanur þessu, en tap er ekki bara tap, þegar menn tapa leikjum út af öðru eins dugleysi, áhugaleysi og baráttuleysi, þá bara ristir það dýpra. Að horfa á unga menn sem fá milljónir í vasann í hverri viku en nenna svo ekki að vinna fyrir peningunum, það fer ekki bara í mínar fínustu taugar, það kemur hreinlega við þær allar. Miðað við framlagið á vellinum í síðasta leik, þá mætti frekar halda að þessir gaurar væru á atvinnuleysisbótum og verið hreinlega skikkaðir til að mæta á þennan völl og dvelja þar í um 90 mínútur. Já, þetta er bara þvílík skömm að svona frammistöðum.

Á morgun (þriðjudag) klukkan 20:00 fá menn smá tækifæri til að sýna að þeim sé ekki algjörlega sama um þetta allt saman. Þeir geta illa bætt upp fyrir skituna frá því á laugardag, því þau stig verða ekki aftur í boði fyrir okkur í deildinni, en þeir geta allavega gert eitthvað smávegis til að sýna fram á smá djörfung og dug. Hver einn og einasti leikmaður liðsins ætti svo sannarlega skilið að missa sæti sitt í liðinu, nema kannski Lovren og Moreno. En því miður, þá er ekki hægt að droppa þeim öllum, en mikið vona ég að Jurgen vinur minn Klopp geri þeim vel grein fyrir því að þeir séu ALLIR með TÖLU að berjast fyrir framtíð sinni hjá félaginu og þá skiptir andsk… engu máli hvenær menn voru keyptir til liðsins. Það skiptir líka akkúrat engu máli hvaða nafn þú berð. Ef þú mætir ekki til vinnu (til leiks) þá eru dyrnar þarna takk fyrir.

Þessi leikur gegn Stoke er næst síðasta skrefið í átt að Wembley og þar er titill í boði. Auðvitað eru titlarnir mis stórir og allt það, en stundum getur einn slíkur komið mönnum á bragðið. Við skuluð því ekki gera lítið úr hugsanlegum áhrifum af því að komast alla leið og fá pening á hálsinn. Andstæðingar okkar að þessu sinni eru Stoke, og hafa þeir verið á fínu skriði undanfarið, enda komnir með hörku lið alveg hreint. Ekki bara stórkallabolti þar á ferð, heldur fullt af fínum fótboltamönnum. Ég efast ekki um það í eina mínútu að Mark Hughes mætir til leiks með sitt sterkasta lið, enda það sama í húfi fyrir þá og getur reynst sama vítamínsprautan að komast alla leið í keppninni. Það er bara jákvætt að vera komnir svona langt, en það breytir ekki skoðun minni á því að það sé algjörlega galið að þetta sé eina keppnin sem er með leiki heima og að heiman í undanúrslitum. Enska knattspyrnusambandið hefur kvartað og kveinað yfir því að lið séu ekki að sýna þessari keppni næga virðingu, hvernig væri þá að laga uppsetninguna á bikarkeppnunum hjá þeim? Það er stór ástæða fyrir því að liðin eru ekki að bera nægilega virðingu. Miðað við leikjaálagið á Englandi, með engu vetrarfríi eins og tíðkast í öðrum deildum, þá er varla ofan á þetta bætandi. Leikið heima og heiman í undanúrslitum deildarbikars og svo aukaleikur ef jafntefli verður í FA bikarnum. Gjörsamlega galið og enn nú galnara að FA séu að skæla yfir því að liðin séu oft á tíðum ekki að stilla upp sínum sterkustu liðum í þessum keppnum.

En nóg um það, hvað á Jurgen til bragðs að taka þegar kemur að því að velja í liðið? Mun hann fara inn með sitt sterkasta lið? Hvað er hans sterkasta lið? Ég er nokkuð viss um hvað sé það sterkasta þegar kemur að 5 öftustu stöðunum á vellinum, en það er gjörsamlega á henni huldu blessaðri hvað teljist til sterkasta liðs þegar framar á völlinn er komið, sér í lagi þegar menn eins og Hendo og Sturridge eru meiddir. Við verðum samt að reyna að stilla einhverju upp, og hafa ber það í huga að við erum að fara að mæta Stoke. Ég vil sem sagt sjá öftustu 5 óbreytta, þ.e. að þeir standi þar áfram vaktina þeir Mignolet, Clyne, Lovren, Sakho og Moreno. Einna helst gæti ég séð hann setja Kolo inn fyrir Sakho, þar sem sá síðarnefndi er tiltölulega ný stiginn upp úr meiðslum og spurning hvort álagið á honum gæti farið að nálgast hættumörk. En þetta er stór leikur og því vil ég sjá sterkt lið. Jordan Henderson verður líklegast ekki klár í slaginn og ég efast stórlega um að Milner verði það heldur. Þar fyrir utan er Jordan Rossiter ekki leikfær. Það gerir það að verkum að við verðum að velja úr þeim Lucas, Allen og Can inn á miðsvæðið. Einhvern veginn þá hallast ég að því að Klopp velji þá bara alla í liðið, reyni að þétta miðjuna sem mest í þessum útileik. Svo vandast málið enn frekar, Sturridge er ennþá fjarri góðu gamni og það þarf varla að fara yfir stöðuna á þeim Origi og Ings. Hvað er þá eftir? Ryan Kent hefur verið að slá í gegn á láni hjá Coventry og ég vil bara sjá hann beint inn í liðið, bara á vænginn með hann og hafa Ibe hinum megin. Er svo sem ekki vongóður með það og á von á Coutinho áfram í liðinu. Mér er svo eiginlega nokkuð sama hver það verður sem verður efstur á toppnum, hvort það verði Firmino, Benteke, Lallana eða Coutinho, þeir eiga það allir jafn lítið skilið. Eigum við ekki að segja að Benteke fái enn og aftur sénsinn á að sýna að hann sé eitthvað meira en bara batti sem boltinn skýst af?

Spái þessu bara svona:

Já ég veit, alltof margir sem engan áhuga sýndu í síðasta leik, en við verðum víst bara að vona að menn rífi sig upp á rasshárunum og fari að vinna fyrir laununum sínum. Menn þurfa að mæta algjörlega brjálaðir til leiks, allt minna en það getur skilað sér í því að við lendum bara út úr þessari keppni um að komast á Wembley, eftir þennan fyrri leik. Ég ætla að spá því að við náum fínu 1-1 jafntefli og að allt verði opið fyrir seinni leikinn sem fram fer á Anfield í lok mánaðarins. Eigum við ekki að segja að Ibe setji þetta eina mark fyrir okkar menn.