Langþráður grannaslagur á sunnudag!

Á sunnudaginn fer Liverpool á Goodison Park í afar langþráðri 30.umferð deildarinnar sem hófst í kvöld eftir margra vikna bið vegna ástandsins sem ríkt hefur í heiminum undanfarnar vikur og mánuði. Liverpool er sex stigum frá því að tryggja sér titilinn sem klúbburinn og stuðningsmenn hafa beðið eftir í þrjátíu ár og gæti hugsanlega orðið meistarar á þremur dögum í næstu viku!

Vinni Liverpool leik sinn gegn Everton þá mun liðið aðeins þurfa þrjá stig til að verða meistari. Ef Liverpool vinnur Everton þá getur liðið orðið meistari á mánudagskvöldið ef Man City tapar gegn Burnley en ef þeir vinna þá getur Liverpool tryggt titilinn á Anfield í miðri viku. Verði það eitthvað flóknara en það mætast Liverpool og Man City um næstu helgi og þar gæti Liverpool klárað deildina. Þetta er svo fáranlega nálægt og orðið líka svona ansi raunverulegt!

Fókusum hins vegar á næsta leik og ég efast ekki á nokkurn hátt um að það sé bara það sem er í gangi hjá Klopp og hans mönnum. Það er næsti leikur og svo næsti leikur eftir það og við sjáum hvað verður.

Nú er afar erfitt að spá og spekúlera um eitthvað sem hefur að mestu farið fram á bak við luktar dyr og mikil óvissa hefur ríkt um hitt og þetta. Í hvernig formi eru leikmenn? Hverjir eru líklegir til að byrja? Hvernig koma menn undan hléinu? Kemur Klopp með einhverjar nýjar áherslur? Við fáum líklega svör við ansi mörgum af þessum spurningum á næstu dögum.

Klopp talaði um að hann hafi í raun aldrei fengið eins langt og gott “undirbúningstímabil” síðan hann tók við Liverpool. Allir leikmenn hafa verið til taks og á sama stað, flestir leikmenn hafa verið heilir og getað tekið þátt í undirbúningnum og Klopp talaði sérstaklega um Takumi Minamino sem hefur nú fengið góðan aðlögunartíma með liðinu og hefur víst litið mjög vel út á æfingum og í æfingaleikjum ásamt Naby Keita og að fá þá tvo sterka inn á endasprettinum gæti verið ansi öflugt.

Eitthvað var talað um að Salah gæti verið tæpur fyrir leikinn á sunnudaginn því hann hafi ekki verið á æfingu á fimmtudeginum en hann er víst inn í myndinni fyrir leikinn samkvæmt Klopp sem hefur eingöngu sagt að Shaqiri verði ekki klár í leikinn. Það virðist eitthvað afar furðulegt í gangi með Shaqiri, það verður nú bara að segjast. Þó virðist hópurinn fyrir leikinn vera ansi öflugur og hugsanlega gætu þeir Curtis Jones og Harvey Elliott fengið tækifæri.

Ég ætla að leyfa mér að giska á að þetta verði liðið sem byrjar á sunnudaginn. Flestir þarna ættu held ég að vera nokkuð nailed on en ef Salah verður ekki klár í leikinn þá gæti verið að Chamberlain, Wijnaldum eða Minamino komi inn í hans stað. Ég ætla að giska á að Keita byrji þennan leik en hann hefur verið í fanta formi í æfingarleikjunum undanfarið og Wijnaldum verið eitthvað tæpur svo ekki ólíklegt að Keita taki stöðuna við hliðina á Fabinho og Henderson.

Ég veit ekki með ykkur hin en ég bara get ekki beðið eftir þessum leik! Við erum hársbreidd frá titlinum og á þessum tíma í næstu viku gætum við bara í fúlustu alvöru verið að tala um Englandsmeistarana í Liverpool en fyrsta verkefnið er að sækja þrjú stigin á tómum Goodison Park, við verðum ekki meistarar þar svo það er bara enn eitt verkefnið sem þarf að klára.