Upphitun: Englandsmeistarar Liverpool fá Guardiola of honour

Eldhressir Englandsmeistarar Liverpool FC mæta á City of Manchester Stadium til að takast á við Man City sem eru formlega nýfallnir af sínum háa stalli. Nú þegar að 30 ára kláðinn hefur verið klóraður með Englandsmeistaratitlinum þá er næsta verkefni á dagskrá að bæta stigametið í deildinni til að stimpla sig inn sem besta lið allra tíma. Fyrir utan 3 stig í sarpinn þá gætu hressileg montréttindi verið í boði fyrir sigurvegarann og því mun sverfa til stáls og stolts í toppslag meistaranna!

Come on you REDS!

Mótherjinn

Himnabláum hefur verið hent úr himnasætinu sem besta lið Englands og Rauði herinn hefur hertekið hásætið sem sitt herfang. Eftir að hafa byrjað síð-Covíð endurkomu enska boltans með blússi þá brotlentu bláliðar með brauki og bramli gegn Chelsea á Brúnni. Þau úrslit réttu okkur Púlurum titilinn á silfurfati án þess að þurfa að sparka í bolta það ágæta kvöld.

Það aftengdi þá hugsanlegu sprengju sem þessi stórleikur hefði getað verið og gjörbreytti í raun nálgun beggja liða. Án brimbrotsins á Brúnni hefði City getað gírað sig í bardagastellingar að varna því að LFC yrðu meistarar á þeirra heimavelli og okkar menn að sama skapi farið í skotgrafirnar til að tryggja jafntefli sem myndi duga til titils. En þeim þrýstingi hefur verið létt af báðum liðum og í staðinn er komin upp önnur staða sem hugsanlega hentar okkur betur en heimamönnum.

Guardiola og hans menn hafa spilað 4 leiki á 12 dögum í deild og bikar og þrátt fyrir að geta hálfpartinn stillt upp tveimur jafnsterkum byrjunarliðum þá getur slík keyrsla tekið sinn toll. Á sama tíma höfum við spilað tvo leiki og í þeim fyrri róteruðum við hraustlega með byrjunarlið og bekk. City hafa nú þegar misst Aguero í langtímameiðsli og spurning hversu miklu þeir eru tilbúnir að fórna fyrir stoltið þar sem 2.sætið er svo gott sem silfurtryggt. Sæti sem á endanum gæti tryggt þeim nákvæmlega enga Meistaradeild á næsta tímabili og jafnvel þarnæsta ef að íþróttadómstólarnir standa sína plikt. Næstu vikur verður spilað á 3-4 daga fresti og það getur spilað inní ákvarðanatöku með byrjunarlið og innáskiptingar.

Að því sögðu þá verður það auðvitað eldrautt eitur í beinum City-manna að tapa fyrir nýkrýndum Englandsmeisturum alheimsins þannig að þeir sem spila þann leik fyrir þeirra hönd munu gefa sig alla í leikinn. Hversu mikið vonbrigði og leikjaálag munu spila inní mun einfaldlega koma í ljós þegar að á hólminn er komið en Liverpool mun á móti hafa ferska fætur síns sterkasta byrjunarliðs til að spila uppá gyllta gulrót stigametsins í deildinni. Þessi munur á matarlyst og snæðingsþreytu gæti haft úrslitaáhrif í toppslagnum og jafnvel upp á sjálfstraustið í sálfræðistríði næsta tímabils.

Josep Guardiola Sala mun að öllum líkindum stilla ljósbláum liðssveinum sínum upp á eftirfarandi hátt (Aguero meiddur og Fernandinho í banni):

Englandsmeistarar Liverpool

Ofur-Englandsmeistarar allra tíma mæta ferskir til leiks eftir að hafa unnið sigurdanskeppni og fagnaðarbikar á dansgólfi Formby Hall Golf Resort við borgarmörk Liverpool. Okkar meistara-menn hafa fengið rúma viku til að jafna sig eftir meistaraframmistöðu gegn Crystal Palace og ögn skemmri tíma til að jafna sig á ríflegum fagnarlátum og timburmönnum.

Allir okkar fótboltafýrar hafa virkað flottir og ferskir á æfingum í vikunni nema hvað að Joel Matip verður meiddur út tímabilið og Milner og Shaqiri eru ólíklegir. Með sterkasta byrjunarliðið inná í síðasta leik þá voru Crystal Palace sprengdir aftur til þess tíma steinaldar þegar að Roy Hodgson réð ríkjum og búast má við að sama ofurlið hefji leikinn á City of Manchester Stadium. Augljóslega verður mótherjinn margfalt öflugri en steinaldarmennirnir en með sitt sterkasta lið þá geta Englandsmeistararnir farið inn í leikinn með mikið sjálfstraust og 23 stiga forskot að auki.

Að öllu jöfnu þá hefur meistari Klopp ekki sýnt mikinn áhuga á sögulegri tölfræði en tækifærið núna er of gott til að bæði stimpla sig inn á forsíðu sögubókanna ásamt því að skora sálfræðileg stig fyrir næsta tímabil. Það er því ljóst að við munum spila til sigurs til að landa 3 stigum á sterkum útivelli þar sem mæting áhorfenda verður í kringum meðaltalið og hljóðgervlar sjónvarpsins munu auka desíbelin umfram allt sem áður hefur heyrst á þeim bænum.

Herr meistari Jürgen Klopp mun að öllum líkindum stilla meisturum sínum upp á eftirfarandi hátt:

Blaðamannafundur

Englandsmeistari Jürgen Klopp var glaðbeittur og bráðskarpur á blaðamannafundi dagsins þegar hann gaf gáfuleg svör við misgáfulegum spurningum. Að venju skylduáhorf:

Fyrrum Englandsmeistari Pep Guardiola hafði sömu skyldum að gegna með að sitja fyrir svörum fulltrúa fjórða valdsins:

Í fréttum er þetta helst

• Afríkumótinu hefur verið frestað sem eru frábærar fréttir fyrir okkur varðandi næsta tímabil og léttir á mikill pressu varðandi styrkingar á framlínunni.
• Rhian Brewster er í banastuði hjá Swansea sem gefur góðar væntingar um hans framtíð í framlínunni hjá LFC.
• Chris Morgan snýr aftur í Liverpool læknateymi liðsins í góðum mannauðsþjófnaði frá Arsenal.
• Nathaniel Clyne og sjö ungliðaleikmenn eru samningslausir og hefur verið leyft að yfirgefa LFC með þökkum fyrir þjónustuna.

Tölfræðin

Orðið “meistari” kom 20 sinnum fyrir í þessari upphitun í einu formi eða öðru. Númer 20 er einmitt næsta markmið Liverpool FC þar sem númer 19 er loksins kominn í hús.

Tilvitnunin

“We will not ‘defend’ the title next year, we will attack for the next one.”  – Jürgen Klopp

Spakra manna spádómur

Breytingin í vægi leiksins mun hafa mikil áhrif á upplegg þjálfaranna og þann sóknarleik sem í boði verður. Leikurinn ætti að vera opnari fyrir vikið og bæði lið með meira frelsi til að sækja til sigurs. Sóknarlína beggja liða er í toppklassa og miðjan á pari en varnarlína Englandsmeistaranna er góðum gæðaflokki fyrir ofan og það mun gera gæfumuninn í leiknum.

Mín sparkvissa spakmannsspá er 1-3 sigur fyrir Rauða Englandsmeistaraherinn þar sem Salah, Mané og Virgil van Dijk sjá um markaskorunina.

YNWA