Man City á morgun

Á morgun kemur Man City í heimsókn á Anfield og þessi leikur er nú aðeins öðruvísi en þegar liðin mættust á síðustu leiktíð. Staða liðana eins og hún er núna er mjög ólík, Man City er núna 13 stigum á undan Liverpool og þó það teljist ólíklegt að Liverpool nái að enda fyrir ofan Man City á þessari leiktíð þá mun það sko alls ekki auka líkurnar á því ef Liverpool tapar fyrir þeim!

Liverpool tapaði fyrir Arsenal í síðasta deildarleik í mjög pirrandi leik sem endaði 3-2 og helsta vandamál Liverpool á leiktíðinni, varnarleikur liðsins var hreint út sagt ömurlegur. Í stórsigrinum á Rangers í miðri viku þá tókst þeim skosku að leika sér í gegnum vörn Liverpool og komust yfir snemma leiks – það er svona það helsta sem maður óttast helst í þessum leik á morgun. Ef vörnin stendur sig ekki þá mun City skora mörk á Liverpool – og þá líklega slatta af þeim.

Seinni hálfleikurinn gegn Rangers var flottur og þó mótherjinn hafi nú ekki verið sá allra sterkasti þá sá maður loks eitthvað sem minnti á það sem Liverpool á að vera að gera. Boltinn gekk hratt og örugglega á milli leikmanna sem varð til þess að þeir komust í góð færi og skoruðu mörk. Mo Salah og Jota komu frábærlega inn í leikinn af bekknum – Salah með fljótustu þrennu í sögu Meistaradeildarinnar og þrjár stoðsendingar frá Jota. Þá átti Firmino frábæran leik með tvö mörk og stoðsendingu, Nunez skoraði annan leikinn í röð og Elliott skoraði.

Konate var í byrjunarliðinu og átti góðan leik en nú virðist sem að hann sé eitthvað tæpur fyrir leikinn á morgun og hann sást ekki á æfingu með liðinu í gær, það væri slæmt ef hann getur ekki verið með því hann er virkilega öflugur og Liverpool hefur vantað það í vörnina hjá sér. Vonandi getur hann byrjað leikinn. Til að bæta gráu ofan á svart þá er Joel Matip frá vegna meiðsla líka og Joe Gomez leysti af í hægri bakverðinum fyrir Trent sem er líka meiddur.

Ég hef í raun ekki hugmynd um það hvernig Klopp gæti ákveðið að stilla upp í þessum leik. Ef Konate er ekki heill fyrir leikinn þá mun Gomez líklega fara í miðvörðinn og Milner í hægri bakvörðinn. Robertson er kominn aftur til baka og ég held að hann komi inn í byrjunarliðið fyrir Tsimikas.

Henderson hefur byrjað undanfarna leiki en bæði Fabinho og Thiago hafa báðir byrjað á bekknum, ég yrði ekki hissa ef að Henderson muni taka sér sæti á bekknum og þá annað hvort í þessum leik eða leiknum á eftir. Mögulega gæti Klopp ákveðið að byrja með þrjá miðjumenn en undanfarið hefur hann bara spilað með tvo – sem mér þykir henta liðinu ágætlega hingað til og hjálpar til við að hámarka notin í þeim miðjumönnum sem eru heilir og nýtir styrkleikana frammi vel.

Frammi hafa þeir Salah, Nunez, Firmino og Jota allir gert vel undanfarið og allir á sinn hátt réttlætt það að þeir eigi að fá að byrja þennan leik, kannski er áhætta að byrja með svona marga framherja í þessum leik en það er samt alveg þannig að Liverpool þarf að fara að taka áhættur ef það á að komast ofar upp töfluna. Örugga leiðin hefur ekki verið örugg og ekki skilað miklu á töfluna hingað til. Mögulega gætu verið að Harvey Elliott komi inn í liðið en hann átti góðan leik gegn Rangers en mögulega gæti það þýtt að Salah færi meira inn að miðjum vellinum – sem er nú ekki slæmt.

Það var jákvætt að sjá viðbrögð Liverpool eftir að hafa lent undir gegn Rangers og eitthvað sem maður vonast til að verði einhver “turning point” á leiktíðinni. Við vonuðum að það hefði verið sigurmarkið gegn Newcastle á síðustu sekúndum leiksins, 9-0 sigurinn gegn Bournemouth og já frábær sigur gegn Man City í Samfélagsskildinum á upphafi leiktíðar en það hefur ekki verið raunin hingað til – svo í fullkomnum heimi hefði maður alveg viljað mæta einhverju öðru liði en Man City eftir leikinn gegn Rangers – vonandi er þetta skiptið sem hjólin fara að snúast og leikurinn gegn Rangers gefi vítamínsprautuna sem þarf til að sigra City á morgun og fara að skríða upp töfluna!