Spurs 3 – 6 Liverpool

Mörkin

0-1 Luis Diaz (23.mín)

0-2 Alexis MacAllister (36.mín)

1-2 James Maddison (41.mín)

1-3 Dominik Szoboszlai (45.+1 mín)

1-4 Mohamed Salah (54.mín)

1-5 Mohamed Salah (61.mín)

2-5 Dejan Kulusevski (72.mín)

3-5 Dominic Solanke (83.mín)

3-6 Luis Diaz (85.mín)

Þetta var nú meiri sýningin. Ingimar spáði 0-3 og hafði þannig séð rétt fyrir sér, við fengum bara 6 mörk í kaupbæti í dag. Þetta er kannski eins og við er að búast af Tottenham-liðinu, þeir eru stórhættulegir sjálfum sér og öðrum, geta nánast skorað að vild en líka fengið á sig að vild.

Leikurinn

Það má eiginlega segja að allur fyrri hálfleikur, nema kannski 3-4 mínútur undir lok hans, í kringum 40.mínútu hafi algjörlega eign Liverpool. Tottenham komst ekki upp úr blokkinni, samt óðu sóknarmenn Liverpool í færum og til að mynda átti Salah fimm skot að marki á fyrstu 15.mínútunum. Diaz fékk réttlætinu fullnægt þegar hann boraði risastórt gat á stífluna sem hafði haldið aftur af okkar mönnum í rúmar 20 mínútur og þá bunuðu líka mörkin í gegn, við fengum 9 mörk á 70 mínútum, hvert öðru skemmtilegra. Liverpool átti 24 skot í leiknum og með xG upp á 4.60.

Á þessum fimm mínútum sem Spurs gátu eitthvað náðu þeir tveimur skotum á markið og annað rataði í netið.

Í síðari hálfleik hélt veislan áfram og Mo Salah bætti tveimur mörkum í safnið sitt á fyrstu 15 mínútum hálfleiksins og staðan var því orðin 1-5 eftir klukkutíma leik. Eftir það tóku menn fótinn aðeins af orkugjöfinni og Spurs náði að setja tvö áður en Luis Diaz kláraði leikinn sinn með öðru marki sínu.

Góður dagur

Jahhh…hvern er ekki hægt að tína út? Flestir áttu góðan dag, sérstaklega sóknarmegin. Salah og Diaz báðir með tvö mörk. Szoboszlai átti ríkan þátt í fleiri mörkum en hann fær kredit fyrir, hann var eins og hann væri á yfirsnúningi allan daginn og mér finnst upp á síðkastið að hann hafi verið að ná sömu hæðum og hann náði fyrri hluta síðasta tímabils. En það er ekkert hægt að ganga framhjá Mo Salah eina ferðina enn. Tvö mörk og tvær stoðsendingar, ég segi bara það sama og um daginn, semjiði við manninn og látið hann hafa það sem hann vill.

Vondur dagur

Varnarleikurinn á köflum var ekkert til að hrópa húrra fyrir, en mér gæti ekki verið meira sama. Stundum eru leikir bara svona opnir og ég ætla ekkert að tína út einhverja einstaklinga hvað varðar einhver mistök og hvað má gera betur. Það má alltaf gera eitthvað betur.

Umræðan

Fjögurra stiga forysta á toppnum og leikur til góða, takk fyrir frábærlega skemmtilega jólagjöf og helgin spilaðist ágætlega fyrir okkur. Salah er markahæstur í deildinni og líka stoðsendingahæstur. Nú er það jólatörnin framundan, sem reyndar er ekkert ægileg. Það sem við stuðningsmenn þurfum líka í jólagjöf frá félaginu eru fréttir af nýjum samningum. Það má líka velta fyrir sér janúarglugganum sem nálgast óðum, en okkar menn eru svo sem ekki vanir að gera mikið þar. Hins vegar er nýtt stjórnendateymi í liðinu sem gæti gert kröfur um bætingu einhvers staðar á vellinum en rétti bitinn þarf að vera í boði. Ég myndi halda að stöðurnar væru fyrst og fremst senter og vinstri bakvörður, en mér finnst líklegra að það verði beðið eftir því hvað gerist með þrjá bestu leikmennina okkar og samningana þeirra. Ef þeir endurnýja ekki verða bara risastórar holur í hópnum sem þarf að fylla með stórum prófílum.

Framundan

Næsti leikur er gegn Leicester á heimavelli að kvöldi annars dags jóla, þ.e. á fimmtudaginn og svo er West Ham úti sunnudaginn þar á eftir, 29.desember. Þannig að eðlileg, áframhaldandi rótering í nokkrum stöðum er kannski æskileg en ef hægt er að hvíla menn í 20-30 mínútur í leik þá getur það alveg dugað.