Upphitun: Real Madríd í úrslitum Meistaradeildarinnar

Jurgen Klopp á ekki einn heiðurinn af því að Liverpool er komið aftur í úrslit Meistaradeildarinnar, ef að Liverpool er með þá er alltaf séns. Trú stuðningsmanna Liverpool á liðið ef það fær blóðbragð í Evrópu minnir stundum á það þegar Lloyd frétti að hann ætti séns í Mary. Strax í byrjun tímabilsins voru margir sem sáu enga ástæðu fyrir því að Liverpool gæti ekki farið langt í þessari keppni, kannski ekki í úrslit en ef þú spáir því að Liverpool komist í 8-liða úrslit er eins gott fyrir þig að trúa því að liðið geti farið alla leið. Afhverju í helvítinu ekki?

Það væri gaman að taka það saman hversu oft við höfum talað um Kiev í vetur, hvort sem er í Podcasti, Akraborginni, Fótbolta.net eða hérna á síðunni. Varfærið til að byrja með en eftir því sem liðið hefur á keppnina hefur trúin aukist. Þegar Liverpool slátraði Spartak Mosvku 7-0 og tryggði sig í 16-liða úrslit var auðveldlega hægt að finna fleiri lið sem myndu óttast Liverpool en öfugt.

Eftir að hafa verið í Porto þegar Liverpool gekk frá heimamönnum voru gistimöguleikar í Kiev aðalmálið eftir leik. Það fundu það allir sem voru í Porto að Liverpool var svo sannarlega komið aftur á stóra sviðið og maður lifandi hvað scouserinn kunni að skemmta sér af því tilefni.

Árangur Man City í Evrópu undanfarin ár ætti svo alls ekki að draga neitt úr þeim árangri sem sigurinn á því liði var. Þeir eru að rústa bestu deildinni með dýrasta hóp sögunnar og besta stjórann. Það var líka heldur betur kveikt Meistaradeildarljósin á Anfield í þeim leik, þvílík stemming og stuðningur af pöllunum. Lögin sem við lærðum í Porto komin í aðalatriði, geðveikt. Allez Allez Allez.

Anfield var rétt rúmlega til í undanúrslit og stemmingin var eftir því, sú besta sem ég hef upplifað á Anfield enda í Kop stúkunni. Það að komast í 5-0 eftir klukkutíma og vera hálfsvekktur að liðið hafi ekki nýtt öll dauðafærin er með ólíkindum. Liðið var algjörlega komið á hnén vegna meiðsla og leikjaálags en gerði mjög vel að klára einvígið og fjórða sætið í deildinni.

Porto, Man City og Roma voru ekki bara afgreidd á leiðinni í úrslit, öll einvígin voru svo gott sem búin eftir fyrri hálfleik í fyrri leiknum. Endurkoma Liverpool hefur verið með hreinum ólíkindum og nú er aðeins ein hindrun eftir, besta lið í sögu þessarar keppni.

Real Madríd hefur ekki aðeins unnið þessa keppni tólf sinnum í fimmtán tilraunum, þeir hafa unnið í þrjú af síðustu fjórum skiptum og eru enn á ný komnir í úrslit. Þessi lið mættust síðast þegar þau voru saman í riðli fyrir þremur og hálfu ári síðan. Þá var farið yfir sögu Real Madríd, vafasama fortíð þeirra, tengsl við einræðisherran Franco og hvernig hann notaði félagið ekki ósvipað og stjórnvöld í Abu Dhabi nota Man City í dag. Eins kynntum við okkur eitt stærsta og mikilvægasta nafnið í sögu félagsins, Santiago Bernabeu og hvernig staðið var að kaupunum á Ronaldo þess tíma. Það er allt að því skyldulesning að fara yfir þessa ítarlegu upphitun.

Að þessu sinni verður umfjöllunarefnið hinsvegar aðalmaðurinn í nútímasögu Real Madríd.

Florentino Perez

Real Madríd er eins og Barcelona í eigu stuðningsmanna liðsins sem kjósa sér forseta. Félagið má aðeins eyða þeim pening sem það aflar sjálft og ekki er hægt að kaupa hlut í félaginu sjálfu heldur aðeins aðgang að félaginu sem meðlimur (socio). Meðlimir Real Madríd um 60.000. Þetta hljómar fallega en er öllu flóknara en sýnist og það skiptir gríðarlega miklu máli hver er kosinn forseti hverju sinni. Real Madríd hefur í tvígang kosið Florentino Perez sem forseta félagsins og með því að kynna sér manninn er auðvelt að skilja afhverju.

Perez er í dag auðvitað heimsþekktur sem forseti Real Madríd en utan Spánar er minna vitað um hann. Hann er forseti ACS sem er einn stærsti byggingarverktaki í heimi og eins á hann fortíð í pólitík á Spáni. Hann er einn af áhrifamestu mönnum Spánar.

Perez sem er 71 árs steig niður sem stjórnarformaður ACS fyrir nokkrum árum en er áfram forseti fyrirtækisins. Hann ásamt öðrum byggði ACS upp frá grunni í það að verða alþjóðlegt risafyrirtæki með um 175.þús starfsmenn og yfir $35 milljarða veltu á ári. ACS hefur í gegnum tíðina m.a. unnið að gerð neðanjarðarlestakerfisins í New York, London og Ottowa ásamt því að leggja hraðbraut í Ástralíu. Heimafyrir hefur félagið í tíð Peréz haft sterk tengsl við stjórnvöld svo vægt sé til orða tekið. Eitt sinn var haft eftir honum í sjónvarpsviðtali að í VIP boxunum á Bernabeu séu oft framámenn úr viðskipta og- stjórnmálalífinu að handsala stóra samninga. Ef lesið er fyrri upphitun okkar um Real Madríd er ljóst að þannig hefur þetta verið lengi.

Real Madríd var þannig eiginlega bara aukavinna hjá Perez þegar hann náði fyrst kjöri sem forseti félagsins árið 2000. Hann er sagður vera einn ríkasti maður Spánar enda metinn á um $1.8 milljarða.

Perez er ekkert fæddur með silfurskeið í munni og átti nokkuð eðlileg uppvaxtarár. Hann fór ungur í Tækniháskólan Madríd og lærði rafvirkjann. Eftir nám fór hann að vinna fyrir sér sem slíkur í eign rekstri þar til hann sneri sér að pólitík 29 ára gamall árið 1976. Hann var á tímabili starfandi í ráðhúsinu í Madríd þar sem hann var yfir innviðum í umferðarráðuneytinu. Hann var einnig ráðin framkvæmdastjóri í miðjuflokki á Spáni sem var skammlífur og hætti í pólitík árið 1986 er flokkurinn náði engum manni inn á þing. Hann kynntist hinsvegar mörgum mikilvægum aðilum í pólitíkinni sem mögulega hefur komið sér vel í gegnum tíðina.

Áður en hann sagði skilið við pólitíkina hafði hann ásamt vinum sínum keypt verktakafyrirtæki sem hafði átt í erfiðleikum og fékkst á góðan pening. Pérez þekkti menn á réttum stöðum og nokkrum samrunum og yfirtökum seinna varð ACS til árið 1997 með Perez sem forseta. Þetta félag fékk mikið af verkefnum á vegum ríkisins, svosem viðhald á rafmagnslínum o.þ.h.

Helstu styrkleikar Perez eru sagðir liggja í því hversu sterkur hann er í PR málum og að mynda sambönd á réttum stöðum. Þetta hjálpaði honum t.a.m. mikið við uppbyggingu ACS þar sem félagið fékk oft samninginn þegar stjórnvöld á Spáni ákváðu að einkavæða eitthvað í sinni þjónustu, sorphirða er eitt dæmi um slíka samninga. Perez var með réttu tengslin við stjórnmálaleiðtoga og nýtti sér það óspart eftir að hann varð forseti Real Madríd, bæði fyrir fyrirtækið og félagið.

Los Galacticos

Perez bauð sig fyrst fram til forseta Real Madríd árið 1995 gegn þáverandi forseta Ramón Mendoza. Perez keyrði kosningabaráttu sína á loforðum um að koma slæmum fjárhag félagsins í lag en laut mjög naumlega í lægra haldi.

Hann reyndi aftur árið 2000 og aftur með sömu loforðum um að bæta fjárhag félagsins en þó það sé nánast óhugsandi í dag var fjárhagsstaða Real Madríd mjög alvarleg í kringum aldamótin. Ekki það að stjórnvöld á Spáni myndu láta krúnudjánsið falla svo glatt en stuðningsmenn liðsins vildu breytingar og kusu Perez frekar en Lorenzo Sanz þáverandi forseta. Svekkjandi niðurstaða fyrir Sanz eftir að liðið hafi orðið Evrópumeistari bæði árið 1998 og 2000 í hans tíð.

Perez lofaði ekki bara að laga fjárhag félagsins heldur líka að liðið myndi kaupa alla bestu leikmenn í heimi til liðsins og bar þar hæst Luis Figo, aðalstjörnu Barcelona sem kom þá um sumarið á €60m. Vægast sagt umdeild sala á sínum tíma og magnað verð sem Real Madríd gat greitt m.v. lið í fjárhagsvandræðum.

Luis Figo var dýrasti leikmaður í heimi á sínum tíma en á móti var verðmæti hans gríðarlegt markaðslega og það kunni Perez að nýta sér og bætti í næstu ár á eftir. Þetta dugði samt ekki til að borga upp skuldir félagsins. Perez nýtti sambönd sín til hins ítrasta til að laga fjárhagsstöðuna og seldi borgaryfirvöldum æfingasvæði Real í miðborg Madríd á €480m. Vægast sagt sturluð upphæð en til að setja þetta í eitthvað samhengi var velta Real Madríd það ár €135m eða 3,5 sinnum lægri en það sem félagið fékk fyrir æfingasvæðið. Félagið keypti í staðin land undir nýtt æfingasvæði fyrir brotabrot af þessari upphæð. Landið sem Real seldi fór í byggingu þriggja háhýsa og haldið þið að ACS verktakafyrirtæki Florentino Perez hafi ekki verið svo heppið að fá verkið. Það hefur í gegnum sögu Real Madríd verið töluvert til í því að þeir sitji ekki alveg við sama borð og önnur lið á Spáni.

ACS er sagt hafa í langan tíma hagnast mikið á verkefnum sem Evrópusambandið styrkir á Spáni. Eitt af lykilvitnum í spillingarmáli gegn fyrrum meðlimum í Flokki Fólksins sem var stjórnarflokkurinn á Spáni hélt því fram að ACS væri eitt af þeim fyrirtækjum sem hefði mútað stjórnmálamönnum til að eiga greiðari aðgang að stórum og mikilvægum verkefnum. Perez hefur auðvitað ávallt neitað öllum slíkum ásökunum og haldið því fram að þeir hafi ekki þurft að múta neinum til að fá stóra samninga. Hvort sem það er fyrir ACS eða Real Madríd er magnað hvað Perez virðist alltaf ná að hafa tryggingu frá stjórnvöldum í sínum verkefnum og fjárfestingum.

Þessi viðskipti Real Madríd og stjórnvalda í Madríd hafa lengi verið undir smásjánni og vilja margir meina að þetta sé mjög augljóst dæmi um ólöglega innspýtingu almannafés í rekstur knattspyrnufélags en Real hefur alltaf sloppið við refsingar. Spegillinn á RÚV kom m.a. inn á þetta fyrir nokkrum árum í tengslum við það er borgaryfirvöld í Madríd bættu Real Madríd tjón sem hlaust að því að selja þeim landskika í leyisleysi mörgum árum áður með öðrum landskika sem var fimmtíu og fjórum sinnum meira virði, þ.á.m. mikilvægt svæði í kringum Bernabeu.

Árið eftir að Figo kom til félagsins keypti félagið Zidane á €76m sem var metfé og önnur mögnuð upphæð sem félagið gat greitt í ljósi þess að tekjur það tímabil námu ekki helmingi þeirrar fjárhæðar. Salan á æfingasvæðinu fyrir €480m kom sér vel þar.

Perez vissi samt hvað hann var að gera og var með skýra stefnu í uppbyggingu Real Madríd. Hann vissi vel að hann væri með stærsta félagslið í heimi í höndunum og vörumerki í samræmi við það. Áður en hann var kjörinn forseti hafði félagið aðeins nýtt brotabrot af þessu verðmæti sínu og hann hóf markvissa vinnu við að breiða boðskap félagsins út sem víðast og þá sérstaklega með áherslu á Asíumarkað.

Höfum alveg í huga að þó liðið hafi verið illa statt fjárhagslega byggði Perez ekkert upp eitthvað stórveldi með þessum Galaticos kaupum sínum. Þá er ég ekki að meina að Galatico liðið hafi ekki verið stórveldi heldur að liðið sem hann fékk árið 2000 var þá þegar tvöfaldur Evrópumeistari á síðustu þremur árum. Liðið var nánast alltaf í einhverju af efstu þremur sætunum í La Liga og hefur í raun verið áskrifandi af Evrópukeppnum nánast alla tíð.

Hann er samt maðurinn sem tók Real Madríd inn í nútímann þó líklega hafi hann fengið meiri stuðning en önnur lið almennt fá. Stefna hans sem síðar fékk viðurnefnið Galaticos gekk út á að kaupa heitasta bitann á markaðnum fyrir hvert tímabil og byggja liðið upp í kringum hann. Yngriflokka starfið myndi svo sjá um að fylla upp í aðrar stöður á vellinum. Ágætt að hafa í huga að yngriflokkastarf Real á þessum tíma rétt eins og núna var ekkert venjulegt, þeir eru oftar en ekki búnir að fá til sín efnilegustu leikmenn Spánar. Þetta samt svínvirkaði og liðið hélt áfram að sýna árangur innan vallar og tók stökkbreytingum utanvallar.

Árið eftir að Zidane kom var Ronaldo keyptur, annar fyrrum leikmaður Barcelona sem var frábær í Madríd. Árið 2003 var eitt stærsta vörumerki í heiminum keypt í David Beckham. Michael Owen átti auðvitað að teljast sem Galatico þegar hann kom enda knattspyrnumaður Evrópu tveimur árum áður. Árið 2005 kom svo Robinho en stoppaði stutt við.

Galaticos viðurnefnið átti samt ekki bara við þessar stórstjörnur sem voru keyptar fyrir hvert tímabil. Það það voru nokkur stór nöfn hjá félaginu fyrir og eins komu nokkrir upp úr yngri flokkum sem voru jafnan flokkaðir sem Galaticos. Leikmenn eins og Hierro, Raul, Cassillas, Carlos, Guti, Morientes og jafnvel McManaman.

Auk þeirra var Claude Makalélé hjá félaginu þegar Perez tók við árið 2000. Margir vilja meina að hann hafi verið sá sem hélt þessu liði saman í raun og veru og það hafi fyrst farið að halla undan fæti þegar hann var seldur til Chelsea. Uppgangur enska liðsins hófst einmitt í kjölfarið.

Það er því spurning hvort Galaticos sé einhver hugmyndafræði, Real Madríd var með besta lið í heimi fyrir og fór að dala þegar þeir sem voru fyrir fóru að fara á aldur og þær stórstjörnur sem komu fylgdu ekki eftir Figo, Zidane og Ronaldo.

Galaticos stefna Perez sem vakti svo mikla athygli í upphafi aldarinnar er ekki einu sinni frá honum komin upphaflega. Santiago Bernabeu bjó fyrst til svokallað Galaticos lið er hann fékk helstu stórstjörnur knattspyrnunnar til Real Madríd á sjötta áratugnum. Ef þið hafið Peréz grunaðan um að byggja sitt lið upp með vafasömum vinnubrögðum lesið þá hvernig Real Mardríd fékk besta leikmann félagsins á síðustu öld (Di Stefano). Bernabeu fékk á skömmum tíma Alfredo Di Stéfano, Ferenc Puskás, Raymond Kopa, José Santamaría og Francisco Gento og bjó til liðið sem vann fyrstu fimm Evróputitlana sem keppt var um. Spánn var þá undir stjórn Franco og Real Madríd var liðið hans Franco. Evrópukeppnin var reyndar boðsmót þessi ár og því aðeins tæpt að telja þá titla með, liðið var engu að síður það besta í heimi.

Salan á Makalélé og kaup á mönnum eins og Beckham, Owen og Robinho höfðu ekki eins öflug áhrif og fyrstu nöfnin sem Peréz fékk til liðiðs. Félagið var gagnrýnt fyrir að einbeita sér of mikið af markaðssetningu og ímynd og ekki nóg af fótboltanum sem liðið var að spila. Peréz fannst vera kominn tími á sjálfan sig og ákvað að hætta árið 2006. Þá búinn að rétta félagið algjörlega af. Honum var ekkert bolað í burtu heldur tók hann þessa ákvörðun sjálfur. Tveimur árum áður hafði hann t.a.m. verið endurkjörin með 94,2% atkvæða.

Rosaleg endurkoma Perez

Perez hætti auðvitað bara sem forseti Real Madríd, hann hafði nóg að gera sem stjórnarformaður og einn aðaleigenda ACS. Þegar markaðurinn á Spáni fór að hiksta var félagið mjög fljótt að bregðast við og færa sig í auknum mæli út fyrir landssteinana og stækka um leið starfsemina. Hann var (og er enn) einn voldugasti maður Spánar með gríðarlegt tengslanet sitt.

Árið 2008 tók Guardiola við Barcelona og vann alla bikara sem í boði voru. Perez fannst aftur vera komin þörf á byltingu hjá Real Madríd og bauð sig aftur fram árið 2009 og var á endanum einn í framboði. Eins og um aldamótin vantaði ekkert upp á loforðin, aftur yrði keypt þá bestu sem í boði voru og aftur stóð hann við það, nýtt Galaticos lið varð til nema núna kaupa þeir bara alla.

Kaka kom frá AC Milan þá um sumarið á £60m og Cristiano Ronaldo fylgdi strax í kjölfarið á £80m og varð um leið dýrasti leikmaður í heimi. Raul Albiol kom 25.júní fyrir €15m og 1.júlí var gengið frá kaupum á Karim Benzema fyrir £30m. Þetta var því verr og miður ekki allt því að 5.ágúst var gengið frá kaupum á Xabi Alonso á £30m sem var annar leikmaðurinn sem fór frá Liverpool til Real Madríd í þessum glugga því Alvaro Arbeloa hafði einnig farið sömu leið fyrr um sumarið á £5m. Allt þetta var hrein viðbót við lið sem hafði náði verið í 1. eða 2. sæti í deildinni fimm árin þar á undan. Samtals keypti Real leikmenn fyrir £256,5. Auðvitað fór slatti af leikmönnum í staðin, Robben þ.á.m. en söluvirði þeirra var samtals £87m.

Jose Morurinho var fengin til liðsins sumarið eftir en hann hafði þá unnið Meistaradeildina með Inter Milan. Hann fékk með sér þá um sumarið menn eins og Di Maria, Mesut Özil, Khedira, Carvalho og Adebyaor. Þrátt fyrir þetta tókst þeim ekki að vinna deildina af Barcelona fyrr en í þriðju tilraun eða árið 2012 og hafa raunar ekki unnið deildina nema einu sinni eftir það. Það bara skiptir ekki máli á meðan liðið er að vinna Meistaradeildina eins reglulega og liðið hefur verið að gera (þar til núna).

Peréz hefur ekkert látið af Galaticos hugmyndafræðinni en það eru komin aðeins fleiri stór lið á markaðinn núna sem tekur kannski eitthvað athyglina af Real. Frá 2011 hafa alltaf komið 1-3 stór nöfn til liðsins. Glugginn 2011 var reyndar rólegur en þá kom ungur Varane ódýrt frá Lens. Árið 2012 bar hæst koma Luka Modric en árið eftir var gefið vel í með kaupum á Bale fyrir €101m sem gerði hann að dýrasta leikmanni í heimi. Með honum komu Isco, Carvjal, Casemiro, Illarrmendi og Morata kom úr akademíunni ásamt Jese.

Sumarið 2015 voru það James Rodriguez, Toni Kroos og Keylor Navas en síðustu fjóra glugga hefur Real Madríd haft óvenju hægt um sig og er ekki hægt að tala um nein Galaticos kaup þó vissulega hafi alltaf komið góðir leikmenn. Hafa ber í huga að liðið hefur á þessum tíma verið mjög gott en nokkrir lykilmenn eru vissulega komnir aðeins á aldur.

Seinni Galaticos tími Peréz hefur fullkomlega snúist um Cristiano Ronaldo. Hann er langbesti leikmaður í sögu félagsins, hann er eitt verðmætasta íþróttavörumerki í heimi og klárlega aðalástæða þess að Real Madríd hefur verið eitt besta félagslið í heimi í stjórnartíð Peréz. Verst fyrir þá báða að á sama tíma hefur Lionel Messi verið ennþá betri hjá Barcelona.

Þetta eru leikmenn sem verður tileinkaður þessi áratugur og spurning hvað gerist nú þegar báðir eru að komast af léttasta skeiði. Samkeppnin er að aukast frá liðum á Englandi og það eru ofurlið í bæði Þýskalandi og Frakklandi. Það er ekkert sjálfgefið að Barcelona og Real Madríd drottni yfir næstu 10 árum. Höfum t.a.m. í huga að frá árinu 2005 til 2012 voru ensk lið í úrslitum Meistaradeildarinnar í sjö af átta úrslitaleikjum.

Satt að segja væri tilvalið að boða endurkomu enskra liða með látum í Kiev.

Lið Real Madríd í dag

Munurinn á liðum Real Madríd og Liverpool er að mörgu leiti alveg galin, líklegt byrjunarlið Real Madríd hefur spilað samtals 855 leiki í Meistaradeildinni og ef við teljum líklegan bekk með eru þetta vel rúmlega þúsund Meistaradeildarleikir. Líklegt byrjunarlið Liverpool hefur samanlagt spilað 168 Meistaradeildarleiki, megnið af þeim á þessu tímabili. Þetta helgast ekki eingöngu af gæðamun liðanna undanfarin ár heldur einnig vegna þess að lið Real Madríd er töluvert eldra en lið Liverpool. Meðalaldur líklegs byrjunarliðs verður 29 ára á móti 25,6 árum hjá Liverpool. Þetta er ansi mikill munur.

Varnarlega eru alveg veikleikar á liði Real Madríd og liðið hefur verið að fá á sig mörk undanfarin ár. Það breytir því ekki að það er valin maður í hverju rúmi. Navas í markinu hefur komist í úrslit Meistaradeildarinnar öll árin sem hann hefur verið aðalmarkmaður liðsins. Hann tók stöðuna af Cassillas er kaupin á De Gea gengu ekki í gegn og er þarna ennþá.

Dani Carvajal er uppalinn hjá Real Madríd og er bæði hægri bakvörður Real Madríd og landsliðsins. Hinumegin er braselíumaðurinn sókndjarfi Marcelo en hann er jafnframt varafyrirliði. Hann hefur verið hjá Real Madríd síðan 2007 og er einnig byrjunarliðsmaður í landsliði Braselíu.

Miðverðir eru Varane og goðsögnin Sergio Ramos. Varane var eitt mesta efni Frakka þegar hann fór til Real árið 2011 og er í dag einn besti miðvörður í heimi. Sergio Ramos er klárlega einn besti varnarmaður í sögu Real Madríd og óumdeildur fyrirliði liðsins, hann er ekki nema 32 ára þó manni finnist hann hafa verið þarna alla tíð. Ef að aftasta línan er veiki hlekkur liðsins er allt í lagi að hafa aðeins áhyggjur af rest.

Casimero kom 21 árs frá Braselíu árið 2013 og er í dag lykilmaður aftast á miðjunni. Fyrir framan hann á miðjunni verða líklega þeir Toni Kroos og Luka Modric sem báðir eru frábærir leikstjórnendur með gríðarlega sendingargetu. Auk þeirra kemur Marco Asensio einnig til greina en þar er á ferðinni leikmaður sem gæti alveg orðið betri en bæði Modric og Kroos. Isco hefur verið að byrja á kantinum undanfarið en dregur sig mikið inn á miðju og tekur þátt í að stýra leiknum.

Miðjan hjá Liverpool ætti að hafa meiri orku og nær vonandi að hlaupa yfir miðjumenn Real og pressa þá út um allt. Ef það tekst ekki geta allir miðjumenn Real Madríd tekið leiki yfir og stjórnað tempóinu. Allir miðjumenn Real eru tegundir af leikmönnum sem ég væri til í að fá til Liverpool.

Framlína Real Madríd er einfaldlega ein sú besta í sögunni auðvitað með Ronaldo fremstan í flokki. Ronaldo er með 26 mörk í deildinni í vetur og 15 mörk í Meistaradeildinni auk þess sem hann hefur lagt upp samanalgt átta mörk. Hann hefur einfaldlega ekkert slegið slöku við í vetur þrátt fyrir að aðeins sé farið að hægjast á honum og hlutverk hans hafi breyst. Hann spilar meira sem framherji í dag en vængframherji en það er ljóst að hann mun leita mikið á Lovren og Trent Alexander-Arnold í þessum leik. Gareth Bale hefur verið að koma sterkur inn í liðið undanfarið en Real Madríd fer auðvitað inn í þennan leik með engan leikmann á meiðslalista. Kannski segir það eitthvað um þann mun sem er bæði á hópum þessara liða og eins spænsku og ensku deildinni.

Benzema hefur byrjað síðustu þrjá úrslitaleiki Real Madríd og verður líklega á sínum stað þó þetta hafi alls ekki verið hans besta tímabil. Það að Ronaldo hafi fært sig meira upp á topp hefur dregið töluvert úr mikilvægi Benzema þegar kemur að markaskorun.

Stjórinn
Zinedine Zidane hefur ekki ennþá tapað einvígi sem stjóri í Meistaradeildinni. Hann tók við fyrir þremur árum og hefur öll árin skilað Real í úrslit sem er magnað. Zidane hefur lengi verið í uppáhaldi hjá Perez, fyrst auðvitað sem leikmaður en eftir ferilinn var markvisst unnið að því að búa hann undir það að taka við liðinu. Hann var ráðgjafi Perez, vann með Mourinho áður en hann tók við B liði Real án þess að hafa tilskilin réttindi til þess. Hann hefur náð að eiga við prímadonnur Real Madríd liðsins og stendur fyrir sóknarfótbolta sem er stuðningsmönnum liðsins að skapi. Meistaradeildin er vissulega að halda í honum lífinu í vetur og spurning hvernig honum tekst til að endurnýja liðið. Ætti svosem ekki að vera vesen ef Perez gerir eins og venjulega og kaupir bara alla þá bestu í boði.

---

Fuck you, we´re Liverpool

Það sem ég elska hvað mest við scousers er attitude-ið og sjálfstraustið. Það skiptir nákvæmlega engu hvaða lið Liverpool á í næsta leik, krafan er alltaf sigur og virðingin gagnvart andstæðingnum oftar ekki á þessum nótum, fuck you, we´re Liverpool. Það er ekkert lið stærra en Liverpool og undirbúningur fyrir tvöfalda Evrópumeistara Real Madríd er klárlega á þessum nótum.

Stuðningsmenn Man City voru varaðir við því fyrir leik að þeir hefðu aldrei komið á Anfield á risa Evrópukvöldi, það var slegið upp keppni á netinu í að gera grín af stuðningsmönnum Liverpool fyrir að tönglast á þessari “gömlu klisju”. Þeir skilja betur núna hvað leikmenn Chelsea voru að tala um eftir leiki liðanna á síðasta áratug. Þessi grein nær ágætlega utan um þetta.

Þetta er ástæðan fyrir því að Jurgen Klopp og Rafa Benitez eiga ekki einir heiðurinn af því að koma Liverpool í úrslit. Saga Liverpool vinnur oft gegn liðinu en hún getur svo sannarlega unnið með því einnig og gerir það í þessum tilvikum. Liverpool hefur varla verið með í Meistaradeildinni á þessari öld en þegar liðið er með fer það næstum alltaf langt. Það er magnað og klárlega eitthvað í DNA félagsins sem skilar því lengra. Hugsið ykkur hvað ferðalag Liverpool núna er örugglega pirrandi fyrir stuðningsmenn Arsenal sem hafa tekið þátt 20 ár í röð og einu sinni komist í úrslit, oftast fara þeir ekki lengra en 16-liða úrslit. Tottenham hefur endað ofar en Liverpool undanfarin átta ár og var með allt klárt til að fara langt í ár en hrasaði þegar á reyndi. Manchester City hefur aldrei komist í úrslitaleik Meistaradeildar Evrópu, Abu Dhabi er búið að eiga félagið í 10 ár núna og fullkomlega sturta í það peningum. Liverpool er gott dæmi þess að hugurinn ber þig svo sannarlega hálfa leik, jafnvel aðeins rúmlega það.

Liverpool rétt svo nær í hóp fyrir lokaleikina en ekki bara kemst í úrslit, liðið skorar fimm mörk eða meira í öllum tveggja leikja einvígjum sínum í þessari keppni á leiðinni. Það er betra að sjá hversu galið þetta er ef við setjum þetta upp svona:

Hoffenheim fékk 6 mörk á sig.
Spartak Moskva fékk 8 mörk á sig.
Sevilla fékk 5 mörk á sig.
Marribor fékk 10 mörk á sig.
Porto fékk 5 mörk á sig (á Dragao).
Man City fékk 5 mörk á sig.
Roma fékk 7 mörk á sig.

Auðvitað hefur liðið fengið á sig helling af mörkum á móti, flest þeirra voru samt áður en Van Dijk kom í vörnina. Eftir áramót hefur Liverpool nánast stillt upp liði sem ræður við klukkutíma leik á fullu gasi en hefur ekkert til skiptana eftir það. Það vandamál ætti ekki að vera eins stórt í Kiev enda liðið að fá 13 daga til að undirbúa sig og við hópinn eru að bætast varamenn eins og Lallana, Can og Clyne sem gæti hjálpað gríðarlega ef á reynir. Eins vinnur það vonandi með Liverpool að varnarlínan hefur aðeins náð að slípast saman undanfarið. Karius, TAA, Lovren, Van Dijk og Robertson hafa spilað töluvert saman undanfarið með sömu miðju fyrir framan sig í flestum leikjum.

Það eru engin geimvísindi á bak við það að Real Madríd kemur til með að herja á Trent Alexander-Arnold og Dejan Lovren. Þarna sjá öll lið veikan punkt á Liverpool liðinu og flest lið hafa spilað í takti við það. Einstaka sinnum hefur þetta tekist en gleymum ekki að þeir hafa líka báðir átt stórleiki inn á milli. Man City sá þá líka sem veika hlekkinn á Liverpool liðinu og siguðu sínum bestu mönnum á þá og áttu ekki glætu. TAA held ég að hafi keyrt Sane heim eftir leik og lesið fyrir hann áður en hann fór að sofa, svo hressilega var hann passaður.

Ronaldo verður klárlega hlaupandi í eyður milli þeirra og ljóst að miðjan þarf að kæfa alla þjónustu til hans. Van Dijk er líklega eini leikmaður Liverpool og raunar einn af fáum sem getur ráðið við Ronaldo í loftinu. Það eru svosem engar fréttir að Ronaldo er leikmaður sem hefur enga veikleika.

Marcelo spilar megnið af tímabilinu sem kantmaður og kemur klárlega til með að taka þátt í því að reyna á TAA en það skapar um leið pláss fyrir okkar hættulegasta mann. Roma sem var mjög vel mannað lið og sterkt varnarlega gáfu Salah nákvæmlega þetta pláss og hann fullkomlega jarðaði þá á Anfield. Samt er Roma það lið í heiminum sem þekkir Salah best.

Gegenpressing gengur ekki síst út á það að hlaupa yfir andstæðinginn og vinna þannig lið sem kannski eru betri í fótbolta. Ef að Wijnaldum, Henderson, Milner og Firmino halda áfram sömu vinnusemi og hefur komið okkur í úrslit á Liverpool séns á að vinna baráttuna á miðsvæðinu. Það er oft magnað að sjá hversu mistækir góðir leikmenn verða þegar þeir eru pressaðir út um allan völl og ekki leyft að spila sinn bolta. Kroos Control, Luka Modric og Casimero eru kannski betri leikmenn en okkar miðjumenn en vinnusemin er meiri Liverpool megin. Reyndar held ég að við stuðningsmenn Liverpool séum all hressilega að vanmeta þau gæði sem eru á miðjunni hjá Liverpool. James Milner er stórt nafn í Evrópuboltanum og að eiga eitt sitt besta tímabil á ferlinum. Hann hefur lagt upp fleiri mörk en nokkur annar leikmaður hefur gert í Meistaradeildinni frá upphafi og hann hleypur ca. tveimur kílómetrum meira en flestir aðrir. Wijnaldum er svona tegund af miðjumanni sem lítið fer fyrir en vinnur gríðarlega fyrir liðið og væri líklega öllu hærra skrifaður hjá okkur væri hann einn af miðjumönnunum hjá öðru liði. Liverpool saknar auðvitað Can aðeins og það er gott að hafa hann í hóp en Wijnaldum hefur verið mjög öflugur á leið Liverpool til Kiev. Jordan Henderson er svo glæpsamlega vanmetinn leikmaður, þetta er að lagast meðal stuðningsmanna Liverpool en minna meðal t.d. almennra stuðningsmanna enska landsliðsins. Liverpool finnur vel fyrir því þegar hann er ekki með og hann virðist vera í toppformi núna í fyrsta skipti síðan 2014. Liverpool var einmitt í titilbaráttu þá. Ef að hann lyftir eyrnastórum á loft sem fyrirliði Liverpool er eins gott að við förum að virða hann sem slíkan.

Liverpool skoraði 5-10 mörk á öllum einvígjum sínum á leiðinni í úrslit og Real Madríd er lið sem spilar sóknarfótbolta. Real Madríd fékk á sig 44 mörk í deildinni í vetur sem er bæði meira en mark í leik að meðaltali og eins sex mörkum meira en Liverpool fékk á sig í ensku deildinni. Tímabilið hjá Real núna minnir aðeins á síðustu atlögu Liverpool að titlinum þegar lagt var upp með að skora bara meira en andstæðingurinn og svo hressilega gefið skít í vörnina að Cissokho og Flanagan voru lykilmenn og Mignolet í markinu.

Leikaðferð Real Madríd er nokkurnvegin nákvæmlega eins og hentar pressufótbolta Liverpool best. Klopp hefur sérhæft sig í að búa til lið sem hlaupa yfir svona lið. Ef að Real Madríd gerir eins og Porto, City og Roma og leggur upp með að spila sinn fótbolta gegn Liverpool þá bara, all the best.

Real Madríd hefur samt sýnt það í þessari keppni undanfarin ár og sérstaklega á þessu tímabili að það er gríðarleg seigla í þeim og þeir kunna að bregðast við aðstæðum og eins að lifa af árásir sóknarliða eins og Liverpool. Það að þeir hafi komist í gegnum Bayern einvígið eitt og sér er viðvörunarbjalla fyrir Liverpool.

Eins er Real Madríd með lið sem þekkir nánast ekkert annað en spila til úrslita og hafa alltaf unnið þegar þeir hafa tekið þátt, það þarf að leita aftur til ársins 1981 til að finna síðasta tap þeirra í úrslitaleik. Sigurvegarinn í þeim leik var Liverpool. Úrslitaleikjum fylgir pressa sem gæti hafi meiri áhrif á ungt lið Liverpool heldur en Real Madríd vélina.

Lið Liverpool

Byrjunarlið Liverpool er sjálfvalið fyrir leik, hvort það er gott eða slæmt skal ósagt látið.

Can, Lallana og mögulega Clyne ættu allir að ná á bekkinn með Klavan, Moreno, Mignolet og öðrumhvorum af Ings eða Solanke.

Spá:

Liverpool hefur gengið frá nánast öllum andstæðingum sínum í þessari keppni og vaxið eftir því sem líður á mótið. Bestu frammistöður Liverpool undir stjórn Klopp og stærstu sigrarnir hafa verið að koma gegn liðum sem leggja leikinn upp ekki ósvipað því sem Real Madríd gerir og þar liggja möguleikar Liverpool. Liverpool þarf auðvitað að eiga toppleik og skila hungrinu sem býr í liðinu inn á völlinn. Takist það er ekkert því til fyrirstöðu að Liverpool verði komið í 3-0 áður en Real áttar sig á því að leikurinn er byrjaður, þannig hefur Liverpool tekið mest alla þessa keppni.

Ef að eitthvað lið ræður við það að spila sig í gegnum pressufótbolta Liverpool þá er það auðvitað Real Madríd en eins ótrúlegt og það er að segja það þa var ég eiginlega meira stressaður fyrir Brighton leiknum heldur en þessum.

Það er reyndar fullkomin lýsing á þessu snarklikkaða Liverpool liði, allt sem er skynsamlegt meikar engan sens fyrir þessu liði og það hefur skilað okkur í úrslit, auðvitað vinnum við þetta. 3-0 og það er við hæfi að Salah, Mane og Firmino skipti mörkunum á milli sín.

ALLEZ ALLEZ ALLEZ

Einar Matthías