Rubin Kazan á morgun

Nú þurfa menn að fara að girða sig all hressilega í brók þegar kmeur að þessari blessuðu Evrópudeild, ætli menn sér að blanda sér í baráttuna á þeim vígstöðvum. Ég efast ekki um það í eina einustu mínútu að meistari Klopp vilji ná langt í henni. Hingað til hefur verið afskaplega lítið að frétta, 3 jafntefli í þessum fyrstu þremur leikjum. Allt 1-1 jafntefli og hafa þau verið ansi hreint svipað “skemmtileg”. Fyrir utan þessa jafnteflisleiki okkar, þá hefur Sion bæði sigrað Rubin Kazan og Bordeaux og sitja þeir í efsta sæti riðilsins með 7 stig. Það er með hreinum ólíkindum að okkar menn skuli svo vera í öðru sæti, stigi fyrir ofan hin tvö liðin. Það er því allt gjörsamlega opið upp á gátt. Líklegast voru 2 erfiðustu verkefni riðilsins (svona fyrirfram) útileikir gegn Bordeaux og svo þegar haldið yrði til Rússlands. Það er einmitt á planinu núna, langt og strangt ferðalag á slóðir heldur ólíkum þeim sem menn eiga að venjast.

Þetta Rubin Kazan lið hefur ekki verið að heilla menn mikið með sínum leik í heimalandinu. Liðið er sem stendur í 12 sæti deildarinnar og komu sér þangað “upp” með sigri á botnliði Anzhi, 1-2, í síðustu umferð. Þeir eru sem sagt með 13 stig eftir 14 umferðir, hafa skorað heil 14 mörk og fengið 21 á sig. Sem sagt lítið að frétta á þeim bænum og þótt ferðalagið sé langt og erfitt, þá er verkefnið svo langt því frá að vera óyfirstíganlegt. Sigur í þessum leik setur okkar menn í bara ansi fína stöðu. Markahæsti leikmaður þeirra í deildinni er með 2 mörk, þeir eru reyndar 4 jafnir með þann markafjölda. Vitleysan í þessu öllu er reyndar að hafa ekki klárað þennan leik gegn þeim á heimavelli okkar í síðustu umferð. Manni fleiri stóran hluta leiksins og með allt í höndum okkar. En svona er þetta nú og það góða við þetta allt saman að menn fá núna strax tækifæri á að bæta fyrir það.

Lið mótherja okkar spilar heimaleiki sína á Kazan Arena, sem er svipað stór völlur og Anfield. Hann er reyndar ööööörlítið nýrri en Anfield, en hann var kláraður í Júlí 2013. Virkilega flott mannvirki. Veðurspáin segir til um að það verði um 4 gráðu hiti, rakastig nærri 90% og því eins og að spila í kringum frostmarkið. Létt rigning mun væta völlinn aðeins og sem betur fer er þetta fínn völlur, sem heldur mesta vindinum í skefjum. Þetta verður eflaust sjokk fyrir einhverja leikmenn sem eru vanir aðeins heitari aðstæðum og finnst líklegast nóg um hvernig þetta er á Bretlandi. En hvað um það, það er fótboltinn sem skiptir öllu máli og menn hljóta að vera nægilega góðir í þeim leik til að láta aðstæður hafa sem minnst áhrif á sig og einbeita sér að því að klára þetta verk sem framundan er.

Klopp gerir sér fullkomlega grein fyrir því að nú verður að sverfa til stáls og fer með alla sína bestu leikmenn sem á annað borð mega eða geta spilað. Menn eins og Benteke, Firmino og Coutinho flugu allir með, þrátt fyrir að vera nýkomnir úr meiðslum og að það sé hörku leikur á Anfield næsta sunnudag gegn Crystal Palace. Hann veit sem er, við þurfum sigur úr þessum leik og það má heldur ekki gleymast að sigur í Evrópudeildinni gefur sæti í Meistaradeildinni á næsta tímabili. Því miður þá setti Brendan Rodgers Texeira ekki í Evrópudeildarhópinn og því má hann ekki spila leikinn og verður ekki gjaldgengur fyrr en eftir riðlakeppnina. Furðulegt mál það. Við vitum öll stöðuna á Danny Ings, Joe Gomez og Jon Flanagan, það er langt í land með þá alla. Kolo Toure, Jordan Henderson, Jordan Rossiter og Daniel Sturridge eru svo allir meiddir, en ættu að ná að snúa aftur í þessum mánuði. Sem sagt 8 leikmenn fjarverandi, restin af okkar sterkasta liði var um borð í vélinni sem flaug til Rússlands.

En hvernig stillir hann upp liðinu? Mun hann stilla upp sínu allra sterkasta liði í þessum aðstæðum strax frá byrjun? Er Benteke klár í að byrja leikinn? Fullt af spurningum, sér í lagi þar sem Klopp er ekki búinn að vera lengi við stjórnvölinn og því kannski erfiðara að ráða í hvað hann er að hugsa. Ég er þó á því að hann stilli upp sínu sterkasta liði, fyrir utan Benteke. Ég held að Benteke sé ekki ennþá kominn á þann stað að vera klár í startið og menn vilja að sjálfsögðu ekki taka neina óþarfa áhættu með hann. Öftustu 5 eru því nokkuð klárir að mínu mati, eða þeir Mignolet, Clyne, Skrtel, Sakho og Moreno. Þar fyrir framan verður svo Lucas, sem að mínum dómi er óðum að nálgast sitt allra besta form. Ég sagði það við félaga mína þegar Klopp var ráðinn að ég teldi að Lucas myndi blómstra undir hans stjórn og ég sé ekkert enn sem komið er, sem kemur til með að breyta þeirri spá minni. Hann verður sem sagt á sínum stað á morgun. Milner og Can verða svo fyrir framan hann á miðjunni. Eina spurningin í mínum huga er sú hvort hann stilli upp eins og gegn Chelsea, með í rauninni engann eiginlegan framherja inná og setji Firmino efstan, eða hvort Origi fái sénsinn aftur. Ég hallast að Origi, bara til að auka hraða uppi á topp. Þá er þetta fyrst og fremst spurning um hvort Lallana eða Firmino verði í startinu. Ég ætla að tippa á að liðið verði svona:

Auðvitað er Firmino betri fótboltamaður en Origi, en ég held að Klopp muni stilla upp með framherja í leiknum og reyni að keyra hratt á þetta Kazan lið. Sjálfstraustið í liðinu hefur verið að vaxa undanfarið og sé hugarfarið rétt, þá klárum við þennan leik. Ég er bara nokkuð bjartsýnn á þetta og held að við komum til með að fara með 3 stig heim til Liverpool. Þetta verður ekki létt og menn þurfa svo sannarlega að hafa fyrir þessu, en ég ætla að tippa á að við tökum þennan leik 0-1 og eigum við ekki að segja að það verði Milner sem setji markið.