Florian Wirtz

Það er sannarlega nóg að gera á kop.is skrifstofunni þessa dagana. Hér kemur enn ein færslan!

“I feel very happy and very proud. I was waiting for a long time”. 

Í dag staðfesti Liverpool Football Club kaup á Þjóðverjanum Florian Wirtz. Menn gera sér kannski ekki almennilega grein fyrir því hversu stórt þetta er:

• stærstu kaup sögunnar hjá Liverpool
• stærsta salan í sögu Bundesligunnar
• stærsta salan í sögu Bayer Leverkusen
• ef allar klásúlur verða greiddar eru þetta stærstu kaup í sögu ensku úrvalsdeildarinnar

Og þetta er ekkert smá.

Hver er Florian Wirtz?

Florian Wirtz er fæddur 3.maí árið 2003 og er því nýorðinn 22 ára. Hann er frá Norður-Rín/Westfalíu, sem er hérað í norð-vesturhorni Þýskalands, með landamæri að Hollandi og Belgíu. Hann fór 7 ára til 1.FC Köln og svo 16 ára til Bayer Leverkusen, í janúar 2020. Það olli reyndar fjaðrafoki þar sem Kölnarar voru ekki par sáttir við aðferðir Leverkusen til að fá hann til félagsins.

Hann lék fyrsta leik sinn í meistaraflokki sama ár, þann 18.maí 2020, nýorðinn 17 ára. Hann var yngsti leikmaðurinn til að spila og skora í Bundesligunni en reyndar er búið að slá þau met síðan.

Næstu tímabil hélt hann síðan áfram að slá met. Hann festi sig í liði Leverkusen og sló eftirfarandi met:

• fyrstur til að skora fimm mörk í Bundesligunni fyrir 18 ára aldur
• fyrstur til að skora yfir 10 mörk í Bundesligunni fyrir 19 ára aldur
• yngsti leikmaðurinn í Bundesligunni til að spila 50 leiki

Það er því sannarlega ljóst og hefur verið lengi að þessi strákur hefur lengi verið algjör gullmoli. En lífið hefur ekki verið eintómur dans á rósum hjá honum því í mars 2022 sleit hann liðbönd í ökkla og var frá í 10 mánuði, allt fram í janúar 2023. Það eru einu teljandi meiðslin sem hann hefur átt í síðan hann hóf meistaraflokksferil sinn þótt eitthvað smávægilegt hafi hrjáð hann annað slagið.

Tímabilið eftir er síðan kannski tímabilið sem hann sprakk út fyrir alvöru, þ.e. tímabilið 2023-2024. Bayer Leverkusen vann þýska meistaratitilinn, þýska bikarinn og komst í úrslit í Evrópudeildinni. Hann lét það þó ekki duga heldur var hann valinn besti leikmaður deildarinnar og kom að 23 mörkum í 32 leikjum, 11 mörk og 12 stoðsendingar. Síðasta tímabil var svipað hjá honum, 31 leikur, 10 mörk og 13 stoðsendingar í deildinni.

Alls á hann 31 a-landsleik fyrir Þýskaland (munum að hann er 22 ára) og hefur skorað 7 mörk. Hann hefur verið fastamaður í landsliðinu síðan í mars 2021 fyrir utan auðvitað meiðslatímabilið 2022. Til að mynda lék hann 15 leiki árið 2024 og skoraði 6 mörk fyrir landsliðið. Hann lék með landsliðinu í lokakeppni EM um sumarið.

Hvers konar leikmaður er Florian Wirtz?

Flestir kannast líklega við ungstirnið Musiala hjá Bayern Munchen. Hér er samanburður á Wirtz og Musiala á helstu tölum:

Og einhverjir gætu líka kannast við stoðsendingakónginn Mohammed Salah. Florian Wirtz er nú bara ekkert mjög langt fyrir aftan okkar allra besta Mo:

Þetta eru bara ansi magnaðar tölur. Væntanlega eru flestir búnir að sjá klippur af þessum frekar mjóa gutta, sem spilar með kaffimál fyrir legghlífar og er eiginlega með sokkana niðri – a la Ásgeir Sigurvinsson. Hann er ekki stór, 1,77 á hæð og honum finnst gaman að sóla, er alveg skuggalega teknískur og útsjónarsamur að sjá leiðir að marki andstæðinga í sóknarleiknum. Hann er líklega það sem svo marga dreymir um að vera, tía af gamla skólanum. Eiginleikar hans hafa gert það að verkum að Xabi Alonson hefur haft hann í þessu mikilvæga sóknarhlutverki í stórskemmtilegu liði Bayer Leverkusen og landsliðsþjálfarar Þýskalands, Joachim Löw, Hansi Flick og núna Julian Nagelsmann hafa verið á sömu skoðun.

Það sem við eigum eftir að sjá af honum í nýju adidas-treyjunni hjá Liverpool verður akkúrat það sem hann hefur verið að gera undanfarin ár. Slot sér hann sem lykil að þéttum varnarpökkum andstæðinganna, hvort sem er með því að sigla framhjá varnarmönnum með bolta eða finna hlaup samherja og taka þríhyrningaspil. Hann bætist í hóp teknískra sóknarmanna og eykur til mikilla muna sköpunarkraft sóknarlínunnar. Hann er líka duglegur, með mjög góðar hlaupatölur. Einar kemur inn á áhrif á miðjuna hér að neðan:

Hann var að mestu framarlega á miðjunni vinstra megin hjá Leverkusen sem spilaði með þriggja manna vörn, tvo fljúgandi bakverði og tvo varnarsinnaða miðjumenn fyrir aftan sig. Það er erfitt að sjá Slot stilla honum þannig upp næsta vetur. Mun líklegra er eitthvað í ætti við 4-2-3-1 þar sem Wirtz er í gömlu góðu Gerrard holunni eða einhverja útgáfu af 4-3-3 þar se Wirtz er fremstur.

Önnur pæling er hvort koma Wirtz verði til þess að öll miðjulínan okkar færist aftar, Szoboszlai verði meira átta, MacAllister og Jones meira í holunni og Gravenberch í miðverði líkt og við sáum stundum í leikjum á síðasta tímabili?

Það verður sannarlega fróðlegt að fylgjast með ferli hans hjá Liverpool á næstu árum. Áhrifin hans verða án efa víðtæk og það er óhætt að láta sig fara að hlakka til næsta tímabils. Tökum fagnandi á móti Florian Wirtz!