Líklegar breytingar á leikmannahópnum 2023/24

Það er ástæða fyrir því að stuðningsmenn Liverpool hafa ekki verið sérstaklega ánægðir með neinn leikmannaglugga síðan kannski sumarið 2018/19 er Alisson og Fabinho (og Keita) komu til að fullkomna lið sem hafði verið að mótast árin á undan. Tímabilið áður komu t.a.m. Van Dijk og Robertson (ásamt Ox). Frábær blanda leikmanna og meðalaldur lykilmanna mjög heilbrigður.

Liverpool hefur alveg bætt við sig leikmönnum í staðin fyrir aðra sem hafa yfirgefið sviðið en það hefur aldrei virkað neitt sérstaklega metnaðarfullt eða í líkingu við það sem flest öll liðin sem við viljum vera að keppa við eru að gera á leikmannamarknaðnum. Ofan á það er ævintýraleg óheppni (eða hvað?) að missa út nánast heilt tímabil hjá nánast öllum nýjum leikmönnum liðsins undanfarin ár. Konate, Diaz, Elliott, Jones, Arthur, Thiago, Ramsey og Jota hafa allir lent í langtímameiðlsum og flestir nánast meira frá en þeir eru til taks, leikmenn á besta aldri. Keita, Ox, Van Dijk, Gomez og Matip eldri dæmi.

Á þessu tímabili fór það að bíta að hamra aldrei járnið almennilega meðan það var heitt. Allt í einu virkar Liverpool liðið gamalt og þreytt sem er gjörsamlega galið fyrir hugmyndafræði Jurgen Klopp og þann fótbolta sem hann vill spila. Aðstoðarstjóri Klopp skrifaði bók eftir síðasta tímabil sem ber titilinn Intensity, hversu heimskulega hefur sá titill hljómað mest allt þetta tímabil?

Það eru klárlega vandamál hjá Liverpool á öllum vígstöðum í vetur, helmingurinn af sóknarlínunni hefur verið frá vegna meiðsla en þar hefur þó líklega hvað mest endurnýjun átt sér stað nú þegar. Leikmenn sem gætu sannarlega gert miklu meira í betra liði.

Vörnin er klárlega að komast á aldur og hafa mögulega spilað of marga leiki saman miðað við vandamálin í vetur. Hjálpar reyndar alls ekki að það hefur bókstaflega ekkert cover verið á miðsæðinu allt tímabilið. Ferska blóðið í vörninni (Konate) hefur svo afrekað að spila heila fjóra fokkings leiki í deildinni það sem af er tímabili, minna en bæði Matip og Gomez sem er afrek í sjálfu sér.

Krabbameinið og mest afkallandi vandamál liðsins er hinsvegar mjög fyrirsjáanlega á miðjunni. Undanfarin 2-3 tímabil er búið að boða risa leikmannakaup á miðsævðinu sem aldrei verða að veruleika og það er mjög augljóslega að kosta okkur tímabilið núna. Miðjan hjá Liverpool, bæði sem heild og allir einstaklingarnir hafa verð fullkomlega hræðilegir í vetur. Það er ekki einn miðjumaður á mála hjá Liverpool núna sem maður myndi sakna eftir þetta tímabil.

Skoðum á þessum nótum hvað er líklegast að Liverpool sér að fara gera á leikmannamarkaðnum næsta sumar. Það er orðið nokkuð ljóst að félagið kemst ekki upp með það lengur að gera ekkert að ráði og bæði John W Henry og Klopp (ítrekað) hafa talað um að félagið verði að bregðast við. Eins eru nokkuð margir leikmenn að klára samninga sem gerir það að verkum að bregðast verður við hvort eð er. Þar hugsa ég að Liverpool sé helst að horfa til tækifæra frekar en að selja einhvern af lykilmönnum liðsins til að fjármagna leikmannakaup, útilokum þó ekkert þar heldur.

Svona segir internetið að samningar leikmanna Liverpool sé eins og staðan er í dag. Tökum þessum grunnlaunatölum með fyrirvara en samningslengd ætti að vera rétt. Þeir sem eru merktir með rauðu eru að verða samningslausir í sumar og appelsínugulir eru þeir sem eiga 15 mánuði eftir af samningi. Líklega fær enginn af þeim nýjan samning.

Með því að leyfa Adrian loksins að kveðja væri auðveldlega hægt að skapa annað pláss fyrir Home Grown leikmann í hlutverki þriðja markvarðar.

Þrátt fyrir umræðu um annað hugsa ég að Bobby Firmino fari á frjálsri sölu í sumar og Liverpool kaupi ekkert í hans stað. Það er búið að því. Fimm sóknarmenn sem vonandi verði ekki eins rosalega illa og mikið meiddir og við höfum verið að vinna með á þessu tímabili auk Ben Doak og/eða Kadie Gordon sem hljóta að koma inn í hópinn á næsta tímabili, allavega annarhvor þeirra.

Þarna eru svo þrír miðjumenn líklega að fara og einn miðjumaður til viðbótar (Ox) sem passar ekki vel í neina stöðu.

Gefum okkur að bara þeir sem eru að verða samningslausir kveðji í sumar:

Bara með því að losna við þessa sex leikmenn myndi Liverpool losa 108.þús að meðaltali í vikulaunum. Keita og Ox eru hræðilegir samningar m.v. framlag og Bobby kallgreyið er of mikið frá og úr formi til að réttlæta sinn launapakka lengur. Arthur Melo, guð minn góður!

Liverpool er mjög ólíklega að fara gera byltingu á leikmannahópnum a la Chelsea þrátt fyrir hörmulega spilamennsku margra í vetur og líklega er það ekki sigurformúlan. Klopp hefur alla tíð lagt mikið upp úr því að byggja ofan á það sem hann hefur verið að gera og breyta frekar litlu í einu. Af þeim sökum hugsa ég að markmiðið í sumar verði að fá 4-5 nýja leikmenn í hópinn sem allir eru nógu góðir til að koma til greina á leikdegi auk þess að taka inn unga leikmenn úr akademíunni.

Aðalatriði þarf að vera að lækka meðalaldurinn á miðjunni um svona 5-6 ár.

Fjögur ný andlit í nógu háum klassa til að koma inn í hópinn er nota bene töluverður biti í einu og gæti vel umturnað þessu Liverpool liði. Megnið af vandamálum varnarlínunnar og sóknarmanna Liverpool er hægt að laga með miðjumönnum sem geta hreyft sig og tengt saman liðið á nýjan leik. Það eru ansi margir leikmenn Liverpool að spila langt undir getu í dag sem er ekkert lögmál að verða varanlegt.

Nokkurnvegin svona: 

Miðjan – (tveir)

Keita, Arthur, Milner skapa pláss á miðsvæðinu sem líklega verður fyllt með tveimur nýjum miðjumönnum. Stefan Bajcetic hefur svo gott sem stimplað sig nógu vel inn að ekki þarf að kaupa þriðja manninn. Thiago á svo ár eftir í viðbót af sínum samningi sem líkega verður ekki lengri en það og mætti sannarlega við samkeppni í leikmanni sem hugsaður er sem arftaki hans.

Fyrir utan þá sem eru að klára samning er svo spurning, sérstaklega eftir undanfarnar vikur hvort að Curtis Jones hafi bara fengið nýjan samning vegna þess að hann er uppalin hjá félaginu? Klopp virðist alls ekki treysta honum lengur, þegar hann fær séns meiðist hann um leið og ég hef satt að segja ekki hugmynd hvaða stöðu hann spilar best af þeim sem Liverpool er að vinna með í sínu leikskipulagi. Hann var mikið efni en virðist núna 22 ára hafa staðnað all hressilega og þarfnast nýrrar áskorunar.

Krafan og væntingarnar eru klárlega að kaupa einn heimsklassaleikmann eins og Jude Bellingham, hann er Home Grown leikmaður í þokkabót. Declan Rice væri annað statement sem dæmi. Slíkur leikmaður gæti gert helling einn og sér og virkað sem vítamínsprauta á rest af liðinu. Tökum Bellingham og Rice sem nærtæk dæmi, það er enginn leikmaður með gæði í dag sem tölfræðinördadeild Liverpool veit ekki af og á hverju sumri koma ný nöfn á sviðið sem við vissum ekkert um. Það var ekki verið að tala um Enzo Fernandez í sambærilegum pistli fyrir ári síðan sem dæmi, hvað þá Caicedo frá Brighton.

Eins er ekkert lögmál að lausnin fyrir Liverpool sé að kaupa dýrasta bitann á markaði, það er ALLS EKKI eins og margir af dýrustu leikmönnum sögunnar hafi staðið undir verðmiðanum hjá nýju liði

Auk alvöru heimsklassa er þröf á einum miðjumanni til sem er nógu góður til að byrja leiki fyrir Liverpool. Leikmaður sem er augljóslega betri en t.d. Jordan Henderson og helst Thiago. Nunes hjá Wolves kemur upp í hugann sem mjög líklegur kandídat og EPL klassa leikmaður með hlaupagetu og kraft sem Liverpool saknar hrikalega. Hvort sem það er Nunes eða álíklega leikmaður skiptir ekki öllu, það er ekki lengur hægt að ljúga því að okkur að það sé enginn leikmaður fáanlegur sem bætir núverandi Liverpool lið. Það er voðalega fáir miðumenn að spila í Úrvalsdeildinni núna sem myndu ekki styrkja Liverpool liðið. Já markaðurinn sem Liverpool er að vinna með er miklu stærri en bara Úrvalsdeildin.

Ox er blessunarlega loksins að fara í sumar, það er aðeins vanmetið hversu hræðileg leikmannakaup hann hefur verið, hann átti aðeins ár eftir af samningi þegar hann kom frá Arsenal á £35m! Ox var nánast alltaf meiddur hjá Arsenal og það breyttist ekki neitt hjá Liverpool. Þar fyrir utan passar hann ekki í neina stöðu í leikkerfi Liverpool. Sama á við um leikmenn eins og Curtis Jones, Fabio Carvalho og Harvey Elliott. Þess vegna er ég ekkert sérstaklega spenntur fyrir slúðri í kringum leikmann eins og Mason Mount, flottur leikmaður en ég sé ekki hvar hann passar í Liverpool liðið.

Ef að Mason Mount er einn af þeim miðjumönnum sem Liverpool kaupir í sumar þarf félagið að kaupa þrjá nýja miðjumenn, eitthvað sem líklega er ekki raunhægt eftir innkomu Bajcetic.

Það eru þrjár stöður á miðjunni hjá Liverpool og félagið þarf að lágmarki sex leikmenn til að spila úr.

Thiago – Fabinho – Henderson og Bajectic verða líklega allir áfram a.m.k. eitt tímabil í í viðbót en liðinu vantar núna tvo sem eru betri en þeir allir.

Einn enn væri svo í þetta pláss á milli miðju og sóknar þar sem við eigum fyrir Elliott, Jones og Carvalho. Við höfum séð það í vetur að það stendur ekkert til að breyta í 4-2-3-1 leikkerfi eða álíka. Ef ekki var breytt um leikkerfi í sumar er nokkuð ljóst að það verður ekki gert og þá kannski málið að púsla helvítis liðinu saman í samræmi við það. Til hvers að spila Elliott á miðjunni og bæta Carvalho við hóp þar sem Ox og Jones eru fyrir ef það er ekki til eiginleg staða fyrir neinn þeirra?

Varnarmenn – (einn til tveir)

Nat Phillips greyið bara hlítur að fá að fara í sumar. Hann er ekki nógu góður til að spila fyrir Liverpool en er allt of góður til að spila ekki neitt. Auk hans ætti félagið sterklega að skoða það að losa annaðhvort Gomez eða Matip strax. Gomez er búinn að meiðast of oft og verður aldrei það sem við vonuðumst eftir að hann yrði. Hann er góður Úrvalsdeildarleikmaður en eins og Napoli og Real hafa sýnt á sársaukafullan hátt í vetur er hann enganvegin á neinu elítu leveli. Matip er svo 31 árs núna og meiðslahrúga. Liverpool verður að fara læra það að vera miklu meira brútal við leikmenn sem ítrekað eru á sjúkrabekknum.

Best væri ef Liverpool landar alvöru heimsklassa í hinum 21 árs púllara Josko Gvardiol frá Leipzig fyrir Philips og færir þannig Matip og Gomez sjálfkrafa afturfyrir hann. Taka eitt tímabil þannig áður en Gvardiol og Konate tækju við sem aðalmennirnir í hjarta varnarinnar.

Vonandi verður Gvardiol eða álíka gæði hugmyndin frekar en enn ein Ragnar Klavan týpan sem er ca á pari við Philips. Er svo ekki líklegast að van der Berg eða Billy Koumetio fylli “skarð” Rhys Williams/Nat Phillips næsta vetur? Ef ekki er líklega hægt að fá einhvern pening fyrir báða hollendinga.

Það er svo alveg spurning hvort ekki þurfi að skoða það að fá inn alvöru samkeppni fyrir Robertson eða Trent. Kaupin á Calvin Ramsey fóru eins og flest öll leikmannakaup Liverpool undanfarið, hann kom meiddur og var meiddur allt helvítis tímabilið. Þessi strákur er eflaust efni en mun líklega aldrei leysa Trent af og varla veita honum samkeppni. Liverpool er bara í alvörunni ennþá að henda Milner og Gomez í hægri bakvörðinn í neyð, hvernig í veröldinni er ekki ennþá búið að bregðast við þessu? Tsimikas er því síður að veita Roberston samkeppni eða nokkra hvíld.

Trent og Robbo hafa sýnt merki þess í vetur að ráða ekki við 50-60 leiki non stop ár eftir ár lengur.

Sóknarlínan (Enginn)

Eins mikið og ég dýrka Bobby Firmino efa ég stórlega eftir kaupin á Gakpo, Nunez og Diaz að honum verði gefin nýr samningur í vor úr því að það er ekki frágengið nú þegar. Það yrði þá á töluvert öðurvísi forsendum en núverandi samningur. Liverpool þarf líka bara að endurnýja gamla gullaldarliðið.

Liverpool er með fimm hágæða sóknarmenn auk þess að eiga fjóra unga leikmenn sem líður öllum best í framlínunni. Ben Doak eða Kadie Gordon þurfa að taka næsta skref á næsta tímabili, hvort sem það er nær aðalliði Liverpool eða á láni hjá öðru liði. Harvey Elliott hefur svo sýnt það í vetur að hann er alls ekki miðjumaður og guð má vita hvaða hlutverk Fabio Carvalho á að spila hjá Liverpool, hann er a.m.k. ekki Klopp miðjumaður. Þetta er strákur sem kom að 18 mörkum hjá Fulham í fyrra, þá 19 ára. Hann er miklu betri en hann hefur fengið eða náð að sýna hjá Liverpool og hefði satt að segja líklega átt miklu betra ár hjá Fulham.

Það er ekkert útilokað að Liverpool selji einn af hinum fimm í sumar, þá væru Salah eða Jota líklegastir. Ef að það kæmi alvöru tilboð í Salah myndi ég taka því eins og skot. Hann hefur ekkert getað eftir Afríkumótið á síðasta ári og er núna komin norður fyrir þrítugt. Fullkomlega óþolandi í vetur satt að segja. Aðalástæðan fyri því að ég efa að hann fari neitt er að ég sé ekkert félag bjóða það sem þarf. Töluvert breytt staða frá því fyrir svona 18 mánuðum.

Diogo Jota er svipað dæmi, hann hefur ekki skorað mark fyrir Liverpool í að verða eitt ár núna og varla spilað leik á þessu tímabili. Liverpool þarf að hafa miklu miklu minni þolinmæði fyrir svona leikmönnum, það skiptir engu máli hvað leikmaður er góður ef hann getur ekki spilað nema brot af leikjunum

Markmaður – (Enginn)

Liverpool kaupir efnilegan markmann á hverju sumri, einn af þeim hlítur að vera orðinn nógu gamall/góður til að fylla skarð Adrian sem þriðji markmaður. Vonandi höldum við Kelleher því hann gæti verið 1-2 árum frá því að banka fast á dyrnar á marki Liverpool. Hann er 24 ára en Alisson 30 ára. Höfum séð í vetur að þetta getur verið fljótt að gerast.

---

Til að draga þetta saman hugsa ég að líklegast sé að Liverpool fylli einfaldlega skarð þeirra sem eru að renna út á samningi í sumar. Keypt verði 3-4 alvöru leikmenn sem jafnvel kosta einhverjar fjárhæðir auk þess sem 1-2 komi sem meira svona uppfyllingarefni, (vara bakvörður, fimmti miðvöður eða þriðji markmaður).

Úr Akademíunni gætum við svo sé nokkra stíga skrefið, Tyler Morton, van der Berg og Koumetio koma allir til greina auk sérstaklega Ben Doak og vonandi Kadie Gordon. Svo er alltaf einhver sem maður býst ekkert sérstaklega við, Bajcetic var ekkert að fara í byrjunarliðið þegar við vorum að spá í stöðunni fyrir ári síðan. Núna er hann líklega framar en Henderson og Fabinho.

Það er svolítið síðan það þurfti að gera svona mikið í einu á leikmannamarkaðnum og þetta er fullkomlega sjálfskapaður vandi hjá félaginu. FSG er klárlega uppiskroppa með afsakanir og það er erfitt að sjá þá komast upp með sambærilega takta næsta sumar og þeir hafa jafnan verið með sem eigendur Liverpool.

Tímabilið 2017/18 og 2018/19 var félagið að setja um €180m í leikmannakaup, reyndar að stórum hluta á móti stórum leikmannasölum. Krafan er að taka þannig sumar núna og fjárhæðirnar hafa klárlega hækkað í nær €300m og þá án þess að selja lykilmann. Nóg er svigrúmið sem skapast á launaseðlinum fyrir leikmenn sem skila miklu betra framlagi.